ଭୁବନେଶ୍ୱର: ସ୍କୁଲ ସମୟରୁ ପିଲା ଅଲିମ୍ପିକ ମୂଲ୍ୟବୋଧ କ’ଣ ଜାଣିବେ । ବ୍ୟକ୍ତିତ୍ୱ ବିକାଶରେ ଶିକ୍ଷା ସହ କ୍ରୀଡ଼ାର ଭୂମିକା କେତେ ଗୁରୁତ୍ୱପୂର୍ଣ୍ଣ ତାହା ବୁଝିବେ । ଦେଶର ପ୍ରଥମ ରାଜ୍ୟ ଭାବେ ଓଡ଼ିଶାରେ ଅଲିମ୍ପିକ ମୂଲ୍ୟବୋଧଭିତ୍ତିକ ଶିକ୍ଷା ଯୋଜନା ଆରମ୍ଭ ହୋଇଛି । ଇଣ୍ଟରନ୍ୟାସନାଲ୍ ଅଲିମ୍ପିକ କମିଟି(ଆଇଓସି) ସହଭାଗିତାରେ ଏହି ଯୋଜନାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଭର୍ଚୁଆଲ୍ ମୋଡ୍ ରେ ଶୁଭାରମ୍ଭ କରିଛନ୍ତି । ପାଇଲଟ୍ ପ୍ରୋଜେକ୍ଟ ଭାବେ ଭୁବନେଶ୍ୱର ଓ ରାଉରକେଲାର ୯୦ଟି ସ୍କୁଲକୁ ନିଆଯାଇଥିଲା ବେଳେ ଆଗାମୀ ଦିନରେ ଅନ୍ୟ ସ୍କୁଲଗୁଡ଼ିକରେ ଏହି ଯୋଜନା କାର୍ଯ୍ୟକାରୀ ହେବ ।
ମୁଖ୍ୟମନ୍ତ୍ରୀ ତାଙ୍କ ଭାଷଣରେ କହିଥିଲେ, ସାରା ଦେଶରେ ଏକ ନୂଆ ଅଲିମ୍ପିକ ଅଭିଯାନର ଏହା ଅୟମାରମ୍ଭ । ଏହି କାର୍ଯ୍ୟକ୍ରମ ଜରିଆରେ ଆମ ପିଲାମାନେ ଅଲିମ୍ପିକର ଅନୁଭବ ପାଇପାରିବେ । ପରଷ୍ପରକୁ ସମ୍ମାନ, ବନ୍ଧୁତ୍ୱର ଭାବ ଏବଂ ଉତ୍କର୍ଷତା ହାସଲର ବିଦ୍ୟା ହାସଲ କରିପାରିବେ ।
ଛାତ୍ରମାନଙ୍କ ଶିକ୍ଷା ଏବଂ ବ୍ୟକ୍ତିତ୍ୱ ବିକାଶରେ କ୍ରୀଡ଼ାର ଭୂମିକାକୁ ଗୁରୁତ୍ୱ ଦିଆଯାଇଛି । ଶିକ୍ଷା ଏବଂ କ୍ରୀଡ଼ା କ୍ଷେତ୍ରରେ ଉତ୍କର୍ଷତା ହାସଲ ପାଇଁ ରାଜ୍ୟ ସରକାରଙ୍କ ଉଦ୍ୟମ ଜାରି ରହିଛି । ଭାରତରେ ଓଡ଼ିଶା ଏକ ବୃହତ୍ତ ସ୍ପୋର୍ଟସ୍ ହବ ଭାବେ ଉଭା ହୋଇଛି । ସହଭାଗିତାରେ ଏହି କାର୍ଯ୍ୟକ୍ରମ ଜାରି ରହିବ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିବା ସହିତ ଅଲିମ୍ପିକ ମୂଲ୍ୟବୋଧଭିତ୍ତିକ ଶିକ୍ଷା ଯୋଜନାରେ ଆଇଓସିର ସହଭାଗିତା ପାଇଁ ଧନ୍ୟବାଦ ଦେଇଥିଲେ ।
ଓଡ଼ିଶାରେ କ୍ରୀଡ଼ାର ବିକାଶରେ ସହଭାଗିତା ପାଇଁ ଆଇଓସି ସଦସ୍ୟ ଶ୍ରୀମତୀ ନୀତା ଅମ୍ବାନୀ, ଭାରତୀୟ ଅଲମ୍ପିକ ସଂଘର ଅଧ୍ୟକ୍ଷ ନରେନ୍ଦ୍ର ବାତ୍ରା, ଅଲିମ୍ପିଆନ୍ ଅଭିନବ ବିନ୍ଦ୍ରାଙ୍କ ଅବଦାନକୁ ମୁଖ୍ୟମନ୍ତ୍ରୀ ସ୍ମରଣ କରିଥିଲେ ।
ଏହି କାର୍ଯ୍ୟକ୍ରମରେ ଆଇଓସି ଶିକ୍ଷା କମିସନ ଅଧ୍ୟକ୍ଷ ଶ୍ରୀମତୀ ମିକାଏଲା ସି. ଜାୱରସ୍କି, ଆଇଓସି ସଂସ୍କୃତି ଓ ଐତିହ୍ୟ କମିଟି ନିଦେ୍ର୍ଦଶକ ଶ୍ରୀମତୀ ଆଞ୍ଜେଲିଟା, ଆଇଓସି ସଦସ୍ୟ ଶ୍ରୀମତୀ ଅମ୍ବାନୀ, ଅଲିମ୍ପିଆନ ଶ୍ରୀ ବିନ୍ଦ୍ରା, ଭାରତୀୟ ଅଲମ୍ପିକ ସଂଘର ଅଧ୍ୟକ୍ଷ ଶ୍ରୀ ବାତ୍ରା ପ୍ରମୁଖ ନିଜର ବକ୍ତବ୍ୟ ରଖିଥିଲେ । ଶ୍ରୀମତୀ ଅମ୍ବାନୀ କହିଥିଲେ, ସବୁ ଛୁଆ ଯଦିଓ ଅଲିମ୍ପିଆନ୍ ହୋଇପାରିବେନି କିନ୍ତୁ ସମସ୍ତେ ଏଥିରୁ ଶିକ୍ଷାଲାଭ କରିପାରିବେ । ବର୍ତ୍ତମାନ ସମୟରେ ଓଡ଼ିଶା ସ୍ପୋର୍ଟସ୍ ହବ୍ ହୋଇଥିବା ସେ ପ୍ରକାଶ କରିବା ସହ ଦେଶରେ ଅଲିମ୍ପିକ ଶିକ୍ଷା ଅଭିଯାନରେ ସେ ସାମିଲ ହୋଇଥିବାରୁ ଖୁସି ପ୍ରକଟ କରିଥିଲେ ।
ବିଦ୍ୟାଳୟ ଓ ଗଣଶିକ୍ଷାମନ୍ତ୍ରୀ ସମୀର ଦାଶ, ଓଡ଼ିଶା ହକି ପ୍ରମୋସନ କାଉନସିଲ୍ ଅଧ୍ୟକ୍ଷ ଦିଲ୍ଲୀପ ତିର୍କୀ ମଧ୍ୟ ବକ୍ତବ୍ୟ ରଖିଥିଲେ । ଗଣଶିକ୍ଷା ସଚିବ ବିଷ୍ଣୁପଦ ସେଠୀ ଧନ୍ୟବାଦ ଅର୍ପଣ କରିଥିଲେ ।
କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା, ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, କ୍ରୀଡ଼ା ସଚିବ ଭିନୀଲ୍ କ୍ରୀଷ୍ଣା ପ୍ରମୁଖ ଉପସ୍ଥିତ ଥିଲେ ।
