ଭୁବନେଶ୍ୱର: କିଛି ବିଡିଓ ମୋ ସହ ଭଲ ସମ୍ପର୍କ ରଖିନାହାନ୍ତି । ଭିଡିଓ କନଫରେନ୍ସରେ ମୋ ଭାଷଣ ଆସିଲେ ଟିଭି ବନ୍ଦ କରିଦେଉଛନ୍ତି । ଲୋକଙ୍କୁ ପଳେଇବାକୁ କହୁଛନ୍ତି ।
ଏହି ବକ୍ତବ୍ୟ ହେଉଛି ମୁଖ୍ୟମନ୍ତ୍ରୀ ମୋହନ ମାଝୀଙ୍କର । ରାଜ୍ୟ ସର୍ବୋଚ୍ଚ କର୍ତ୍ତାଙ୍କର ଏହା ଅସହାୟତା, ରାଗ କି ଅଭିମାନ ତାହା ବୁଝିବା କଷ୍ଟକର ହୋଇଛି । ମାତ୍ର ଭୁବନେଶ୍ୱରରେ ଅନୁଷ୍ଠିତ ଦୁଇଦିନିଆ ସିଡିଓ ଏବଂ ବିଡିଓ ସମ୍ମିଳନୀରେ ମୁଖ୍ୟମନ୍ତ୍ରୀ ମୁକ୍ତ କଣ୍ଠରେ ଆଜି ଏହା ସ୍ୱୀକାର କରିଛନ୍ତି । ଏଥିସହ ଅମାନିଆ ଓ ଦୁର୍ନୀତିଗ୍ରସ୍ତ ବିଡିଓମାନଙ୍କୁ ମୁଖ୍ୟମନ୍ତ୍ରୀ କଡ଼ା ଶବ୍ଦରେ ତାଗିଦ୍ କରିଛନ୍ତି ।
କହିଛନ୍ତି, ମୋ ଛୋଟ ବ୍ରେନ୍ ରେ ସବୁ ସେଭ୍ ହୋଇ ରହିଛି । ମୁଖ୍ୟମନ୍ତ୍ରୀ ଭିସିରେ ଭାଷଣ ଦେଉଥିଲେ ଆପଣମାନେ କାଟିଦେବେ? ବିଧାୟକ ଅଭିଯୋଗ କରୁଛନ୍ତି ବିଡିଓ ଆମ କଥା ଶୁଣୁନାହାନ୍ତି । ଏହାକୁ ମୁଁ କ୍ଷମା ଦେବିନି । ଏହା ପରେ ପରିସ୍ଥିତି କ’ଣ ହେବ ଆପଣମାନେ ଜାଣିଛନ୍ତି । ମୁଁ ଆଦିବାସୀ ଲୋକ । ତଳୁ ଆସିଛି । ମୋ ସରଳତାକୁ ମୋ ଦୁର୍ବଳତା ବୋଲି ଭାବନ୍ତୁ ନାହିଁ । ହାର୍ଡ ନିଷ୍ପତ୍ତି ବି ନେଇପାରେ । ଆଶା କରୁଛି ଏହାକୁ ସୁଧାରି ନେବେ । ଆପଣମାନେ ରାଜନୈତିକ ଚାପର ବଶବର୍ତ୍ତୀ ହେବେ ନାହିଁ । ପୁରୁଣା ଅଭ୍ୟାସ ଛାଡ଼ିବେ । ଆମ ସରକାରରେ ଆମ ଲାଇନରେ ଯିବେ । କାହା ଚାପରେ କାମ ନକରି ଲୋକଙ୍କ କାମ କରନ୍ତୁ ।
ମନରେଗାରେ ହେଉଥିବା ଦୁର୍ନୀତି ସମ୍ପର୍କରେ ମୁଖ୍ୟମନ୍ତ୍ରୀ କହିଥିଲେ ଯେ ସେଠି ଲେବର ଲଗାଇ କାମ ନ କରି ମେସିନରେ କାମ ହେଉଛି । ମଷ୍ଟର ରୋଲ୍ ରେ ବିଭିନ୍ନ ଲୋକଙ୍କ ନା ପକାଇ କାମ ହେଉଛି । ଏପରିକି କଲେଜ ଅଧ୍ୟାପକ ଏବଂ ଏମବିବିଏସ୍ ଡାକ୍ତରଙ୍କ ନାଁ ମଷ୍ଟର୍ ରୋଲ୍ ରେ ଅଛି । ମୁଁ ସରପଞ୍ଚରୁ ମୁଖ୍ୟମନ୍ତ୍ରୀ ହୋଇଛି । ମୋ ପାଖରେ ସବୁ ରିପୋର୍ଟ ରହିଛି । ସେ କାଳ ପଖାଳ ଆଉ ନାହିଁ । ନୂଆ ସରକାରଙ୍କ ଆଭିମୁଖ୍ୟକୁ ନେଇ କାମ କରିବାକୁ ପଡ଼ିବ । ଯିଏ କାମ ନ କରିବ କ୍ଷମା ନାହିଁ । ତୁରନ୍ତ ଶ୍ରମିକଙ୍କୁ ନିଯୁକ୍ତି କରି କାମ କରିବାକୁ ମୁଖ୍ୟମନ୍ତ୍ରୀ ତାଗିଦ୍ କରିଥିଲେ ।
ମୁଖ୍ୟମନ୍ତ୍ରୀ ଏହା ମଧ୍ୟ ଜଣାଇ ଦେଇଥିଲେ ଯେ ଜିଲ୍ଲାପାଳଙ୍କ ଜରିଆରେ ବିଡିଓଙ୍କ ରିପୋର୍ଟ କାର୍ଡ ମଗାଯିବ । ନନପରଫର୍ମର ଅଧିକାରୀଙ୍କୁ ଗ୍ରହଣ କରାଯିବ ନାହିଁ । ପୁରୁଣା ଅଭ୍ୟାସ ନ ଛାଡ଼ିଲେ ଅଧିକାରୀଙ୍କୁ କ୍ଷମା ଦିଆଯିବ ନାହିଁ ।
