ଭୁବନେଶ୍ୱର: କରୋନା ସଂକ୍ରମଣ ବଢ଼ି ଚାଲିଥିବା ବେଳେ ଟିକାର ଅଭାବକୁ ନେଇ ଚିନ୍ତାପ୍ରକଟ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଆଜି ଏକ ଚିଠି ଲେଖି ମୁଖ୍ୟମନ୍ତ୍ରୀ ଏହା ଜଣାଇବା ସହ ଖୋଲା ବଜାରରେ ଟିକା ଉପଲବ୍ଧ କରାଇବାକୁ ପ୍ରସ୍ତାବ ଦେଇଛନ୍ତି । ଏହା ହେଲେ ଆଗ୍ରହୀ ବ୍ୟକ୍ତି ବଜାରରୁ ଟିକା ପାଇପାରିବେ ଏବଂ ତଳିଆ ବର୍ଗଙ୍କ ଟିକାକରଣ ଉପରେ ଧ୍ୟାନ ଦେବାକୁ ସରକାର ସୁଯୋଗ ପାଇବେ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ପ୍ରଧାନମନ୍ତ୍ରୀଙ୍କୁ ମୋଟ ୪ ଟି ପ୍ରସ୍ତାବ ଦେଇଛନ୍ତି ମୁଖ୍ୟମନ୍ତ୍ରୀ ।
୧.ଖୋଲା ବଜାରରେ ଟିକା ମିଳୁ ।
୨. ବିଶ୍ୱରେ ସ୍ୱୀକୃତ କୋଭିଡ୍ ଟିକାକୁ ଭାରତରେ ବ୍ୟବହାର ପାଇଁ ଅନୁମତି ମିଳୁ । ଏହାଦ୍ୱାରା ଟିକା ଯୋଗାଣ ବୃଦ୍ଧି କରାଯାଇପାରିବ ।
୩.ଭାରତରେ ଟିକା ଉତ୍ପାଦନ ପାଇଁ ପ୍ରଚୁର ସମ୍ଭାବନା ଅଛି । ଉଭୟ କେନ୍ଦ୍ର ଓ ରାଜ୍ୟ ସରକାର ମିଳିତ ଭାବେ ଟିକା ଉତ୍ପାଦନ ୟୁନିଟ୍ ଗୁଡ଼ିକୁ ସହଯୋଗ କରନ୍ତୁ ଓ ଉତ୍ପାଦନ ବଢ଼ାନ୍ତୁ । ଏହି ଅସାଧାରଣ ସମୟରେ ସରକାର ଦୁଇପାଦ ଆଗକୁ ଯାଇ କାର୍ଯ୍ୟ କରିବା ଆବଶ୍ୟକ ।
୪.କରୋନା ସଂକ୍ରମଣ ହାର ଅଧିକ ଥିବା ମେଟ୍ରୋ ପଲିଟାନ୍ ସହରଗୁଡ଼ିକୁ ଟିକାକରଣରେ ଅଗ୍ରାଧିକାର ଦିଆଯାଉ । ସେହିଭଳି ଜାଗାରେ ଟିକାକରଣ ପାଇଁ ବୟସସୀମା ମଧ୍ୟ କୋହଳ ହେବା ଦରକାର । କାରଣ ଆର୍ଥିକ କାରବାରର କେନ୍ଦ୍ରବିନ୍ଦୁ ଏହି ସହରଗୁଡ଼ିକରେ ଲକଡାଉନ ହେଲେ ଏହା ଦେଶର ଅନ୍ୟ ଅଞ୍ଚଳକୁ ପ୍ରଭାବିତ କରିବ ।
ଚିଠିରେ ଓଡ଼ିଶାକୁ ୨୫ ଲକ୍ଷ ଟିକା ଯୋଗାଇବା ସଂକ୍ରାନ୍ତରେ ପ୍ରଧାନମନ୍ତ୍ରୀଙ୍କୁ ମନେ ପକାଇ ଦେଇଛନ୍ତି ମୁଖ୍ୟମନ୍ତ୍ରୀ । ରାଜ୍ୟରେ ବର୍ତ୍ତମାନ ସୁଦ୍ଧା ୪୭ ଲକ୍ଷ ଡୋଜ୍ ସ୍ୱାସ୍ଥ୍ୟକର୍ମୀ, ଫ୍ରଣ୍ଟଲାଇନ୍ ଯୋଦ୍ଧା ଏବଂ ୪୫ ବର୍ଷରୁ ଉଦ୍ଧ୍ୱର୍ ବ୍ୟକ୍ତିଙ୍କୁ ଦିଆସରିଲାଣି । କୋଭିଡ ଟିକା କ୍ଷତିହାର ଆମର ଯଥେଷ୍ଟ କମ୍ ଏବଂ ଆମେ ଦୈନିକ ୩ ଲକ୍ଷରୁ ଅଧିକ ଡୋଜ୍ ଟିକାକରଣର କ୍ଷମତା ରଖିଛୁ । ଏହି ପୃଷ୍ଠଭୂମିରେ ୪୫ ବର୍ଷରୁ ଉଦ୍ଧ୍ୱର୍ ସମସ୍ତଙ୍କୁ ଟିକାକରଣ କଲେ ଆମକୁ ୧୬୦ ଦିନ ଲାଗିଯିବ । ଟିକା ନେବା ପାଇଁ ଲୋକେ ପ୍ରବଳ ଉତ୍ସାହୀ ଥିଲେ ମଧ୍ୟ ଯୋଗାଣ କମ୍ ଥିବାରୁ ଆମ ପାଇଁ ଚାଲେଂଜ ସୃଷ୍ଟି କରିଥିବା ମୁଖ୍ୟମନ୍ତ୍ରୀ ଜଣାଇଛନ୍ତି ।
ଟିକାକରଣ ଅଭିଯାନ ଆଗକୁ ବଢ଼ାଇବାକୁ ହେଲେ ଯୋଗାଣ ବୃଦ୍ଧି ଉପରେ ମୁଖ୍ୟମନ୍ତ୍ରୀ ଗୁରୁତ୍ୱ ଦେଇ ଉପରୋକ୍ତ ୪ ଟି ପ୍ରସ୍ତାବ ସହ ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି ।
