ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତା ୨୮ ତାରିଖରେ ବିଦେଶ ଗସ୍ତରେ ଯିବେ । ମୁଖ୍ୟମନ୍ତ୍ରୀ ଇଟାଲି ଏବଂ ଦୁବାଇ ଯିବାର କାର୍ଯ୍ୟକ୍ରମ ରହିଛି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏହାର ବିଧିବଦ୍ଧ ସୂଚନା ଆସି ନ ଥିଲେ ମଧ୍ୟ ଇଟାଲି ଗସ୍ତ କାଳରେ ପୋପ୍ ଙ୍କ ସହ ନବୀନଙ୍କ ଭେଟଘାଟ ହୋଇପାରେ ବୋଲି ଜଣାପଡ଼ିଛି । ଏହା ହେଲେ, ପୋପ୍ ଙ୍କୁ ଭେଟିବାରେ ନବୀନ ହେବେ ପ୍ରଥମ ଭାରତୀୟ ମୁଖ୍ୟମନ୍ତ୍ରୀ । ଏହା ପୂର୍ବରୁ କୌଣସି ମୁଖ୍ୟମନ୍ତ୍ରୀଙ୍କୁ ଏଭଳି ସୁଯୋଗ ଆସିନାହିଁ ।
ପ୍ରୋଟୋକଲ୍ ଅନୁଯାୟୀ, ଦେଶର କୌଣସି ମୁଖ୍ୟମନ୍ତ୍ରୀ ବିଦେଶ ଯାଇ ପୋପ୍ ଙ୍କୁ ଭେଟିବାକୁ ହେଲେ କେନ୍ଦ୍ର ସରକାରଙ୍କ ଅନୁମତି ନେବାକୁ ପଡ଼ିବ । ଗତବର୍ଷ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଏହି ସୁଯୋଗରୁ ବଞ୍ଚିତ ହୋଇଥିଲେ । ରୋମ୍ ସହରରେ ବିଶ୍ୱ ଶାନ୍ତି ଉପରେ ଏକ କନଫରେନ୍ସରେ ଯୋଗଦେବାକୁ ମମତାଙ୍କୁ ଆମନ୍ତ୍ରଣ ମିଳିଥିଲା ଏବଂ ସେହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ପୋପ୍ ଥିଲେ । ସେହି କାରଣରୁ ମମତାଙ୍କୁ କେନ୍ଦ୍ର ସରକାରଙ୍କ ଅନୁମତି ଦରକାର ଥିଲା । ମାତ୍ର ମୋଦି ସରକାର ତାଙ୍କୁ ରୋମ୍ ଯିବାକୁ ଅନୁମତି ଦେଇ ନ ଥିଲେ । ସେଭଳି କାର୍ଯ୍ୟକ୍ରମରେ ଯୋଗଦେବା ମୁଖ୍ୟମନ୍ତ୍ରୀଙ୍କ ଷ୍ଟାଟସ୍ ସହ ଖାପ ଖାଉନି ବୋଲି ଜଣାଇ ଦିଆଯାଇଥିଲା ।
ତେବେ ନବୀନଙ୍କ କ୍ଷେତ୍ରରେ କେନ୍ଦ୍ର ସରକାରଙ୍କ ଆଭିମୁଖ୍ୟ କୁଆଡ଼େ ଭିନ୍ନ ହୋଇଛି । ମୁଖ୍ୟମନ୍ତ୍ରୀଙ୍କ ସମ୍ଭାବ୍ୟ ରୋମ୍ ଗସ୍ତ ଉପରେ କେନ୍ଦ୍ର ସରକାର ମୋହର ମାରିଥିବା କୁହାଯାଉଛି । ଆଗକୁ ରାଷ୍ଟ୍ରପତି ନିର୍ବାଚନ ଥିବାରୁ ବିଜେଡିର ସମର୍ଥନ ଆଶାରେ କେନ୍ଦ୍ର ସରକାର ନବୀନଙ୍କ ପ୍ରତି ନରମ ଆଭିମୁଖ୍ୟ ପୋଷଣ କରିଥିବା ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ଏଥିସହ ଜାତୀୟ ରାଜନୀତିରେ ନବୀନଙ୍କ ଗୁରୁତ୍ୱକୁ ଏହା ଅଧିକ ପ୍ରମାଣିତ କରୁଛି ।
ସୂଚନା ଅନୁଯାୟୀ, ମୁଖ୍ୟମନ୍ତ୍ରୀ ୧୦ ଦିନ ପାଇଁ ବିଦେଶ ଗସ୍ତରେ ଯିବେ । ୨୮ ତାରିଖରୁ ଏହି ଗସ୍ତ ଆରମ୍ଭ ହେବ । ମୁଖ୍ୟମନ୍ତ୍ରୀ ଇଟାଲିର ରୋମ୍ ସହରରେ ଏକ ଇନଭେଷ୍ଟର୍ସ ମିଟ୍ ଏବଂ ବିଶ୍ୱ ଖାଦ୍ୟ କାର୍ଯ୍ୟକ୍ରମରେ ଯୋଗଦେବେ । ଦୁବାଇରେ ମଧ୍ୟ ଇନଭେଷ୍ଟର୍ସ ମିଟ୍ କାର୍ଯ୍ୟକ୍ରମ ରହିଛି । ଶିଳ୍ପଦ୍ୟୋଗୀ ଏବଂ ପୁଞ୍ଜିପତିଙ୍କ ବୈଠକରେ ମୁଖ୍ୟମନ୍ତ୍ରୀ ଯୋଗଦେବେ । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ବିଧିବଦ୍ଧ ସୂଚନା ଆସି ନ ଥିବାରୁ ସମ୍ପୂର୍ଣ୍ଣ କାର୍ଯ୍ୟକ୍ରମ ଜଣାପଡ଼ିନାହିଁ ।
ରାଜନୀତିକୁ ଆସିବାର ଦୀର୍ଘ ୨୫ ବର୍ଷ ଭିତରେ ମୁଖ୍ୟମନ୍ତ୍ରୀଙ୍କର ଏହା ଦ୍ୱିତୀୟ ବିଦେଶ ଗସ୍ତ ହେବ । ୨୦୧୨ ମେ’ ମାସ ଶେଷ ଭାଗରେ ସେ ଲଣ୍ଡନ ଯାଇଥିଲେ । ମେ’ ୨୯ ତାରିଖରେ ପ୍ୟାରୀମୋହନ ମହାପାତ୍ରଙ୍କ ତଥାକଥିତ ମିଡନାଇଟ୍ ଅପରେସନ୍ ପରେ ମୁଖ୍ୟମନ୍ତ୍ରୀ ଗସ୍ତ କାଣ୍ଟଛାଣ୍ଟ କରି ଫେରି ଆସିଥିଲେ । ୧୦ ବର୍ଷ ହେଲାଣି ସେ ଆଉ ବିଦେଶ ଗସ୍ତ କରିନାହାନ୍ତି ।
