ଭୁବନେଶ୍ୱର: କୋଭିଡ୍ ପରେ ପ୍ରଥମ ଥର ପାଇଁ ଉପନିର୍ବାଚନ ପ୍ରଚାରରେ ପଦ୍ମପୁର ଆସିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି କେନ୍ଦ୍ର ସରକାରଙ୍କ ବିରୋଧରେ ପ୍ରବଳ ବର୍ଷିଥିଲେ । କେନ୍ଦୁପତ୍ରରେ ୧୮ ପ୍ରତିଶତ ଜିଏସଟି, ଫସଲ ବୀମା ଯୋଜନା, ଏମଏସପି, ଧାନକିଣା, ସାର ଯୋଗାଣ, ଚାଷୀ ଋଣ, ରେଳ ପ୍ରକଳ୍ପ, ଆବାସ ଯୋଜନା ଆଦି ପ୍ରସଙ୍ଗରେ କେନ୍ଦ୍ର ବିଜେପି ସରକାରଙ୍କ ବିରୋଧରେ ରଣହୁଙ୍କାର ଦେଇଥିଲେ । ନିଜର ପଞ୍ଚମ ପାଳି ସରକାରରେ ନବୀନଙ୍କର କେନ୍ଦ୍ର ବିଜେପି ସରକାର ବିରୋଧରେ ଏଭଳି କଡ଼ା ଆଭିମୁଖ୍ୟ ପୂର୍ବରୁ ଦେଖିବାକୁ ମିଳି ନ ଥିଲା ।
ପଦ୍ମପୁରର ତିନୋଟି ଯାକ ପ୍ରଚାର ସଭାରେ ମୁଖ୍ୟମନ୍ତ୍ରୀଙ୍କର ଏକ ଭିଡ଼ିଓ ବାର୍ତ୍ତା ପ୍ରଦର୍ଶିତ ହୋଇଥିଲା । ଏଥିରେ ସେ ଗୋଟି ଗୋଟି କରି କେନ୍ଦ୍ର ସରକାରଙ୍କ ଅବହେଳାର ତାଲିକା ଦେଇଥିଲେ ।
କେନ୍ଦୁପତ୍ର ତୋଳାଳୀଙ୍କ ସମସ୍ୟା ପ୍ରସଙ୍ଗରେ ମୁଖ୍ୟମନ୍ତ୍ରୀ କହିଥିଲେ, କେନ୍ଦ୍ରର ବିଜେପି ସରକାର କେନ୍ଦୁପତ୍ର ଉପରେ ୧୮% ଜିଏସଟି ଲଗାଇଛନ୍ତି । ଅଥଚ ସୁନା ଉପରେ ୩% ଜିଏସଟି ଲାଗିଛି । ଏହା କି ପ୍ରକାର ବିଚାର? କେନ୍ଦୁପତ୍ର ତୋଳାଳୀଙ୍କ ସମସ୍ୟା ପ୍ରତି ରାଜ୍ୟ ସରକାର ସମ୍ପୂର୍ଣ୍ଣ ଉଦାସୀନ ବୋଲି କହିଥିଲେ ।
କେନ୍ଦ୍ରର ଫସଲ ବୀମା ଯୋଜନାରେ ରାଜ୍ୟ ସରକାର ୫୦% ପ୍ରିମିୟମ୍ ବାବଦକୁ ୬୩୦ କୋଟି ଟଙ୍କା ଦେଉଛନ୍ତି । ପଦ୍ମପୁର ଚାଷୀଙ୍କ ଫସଲ ବୀମା ଟଙ୍କା ୧୮ ମାସ ହେଲା ପଡ଼ିଥିଲା । ରାଜ୍ୟ ସରକାର ଇନପୁଟ ସବସିଡି ଘୋଷଣା କରିବା ପରେ କେନ୍ଦ୍ର ଛାନିଆ ହୋଇପଡ଼ିଛି ବୋଲି ମୁଖ୍ୟମନ୍ତ୍ରୀ କହିଥିଲେ ।
ଆବାସ ଯୋଜନାରେ ରାଜ୍ୟକୁ ଘର ନ ମିଳିବା ନେଇ ମୁଖ୍ୟମନ୍ତ୍ରୀ ବିଜେପି ନେତାଙ୍କ ଉପରେ ଖୁବ୍ ଜୋର୍ ରେ ବର୍ଷିଥିଲେ । ୨୦୨୨ ସୁଦ୍ଧା ସମସ୍ତେ ପକ୍କାଘର ପାଇବେ ବୋଲି କେନ୍ଦ୍ର କହିଥିଲା । ଓଡ଼ିଶା ପ୍ରତିବର୍ଷ ୫ ଲକ୍ଷରୁ ଅଧିକ ଘର ନିର୍ମାଣ କରିଥିଲା । ଏଥିପାଇଁ କେନ୍ଦ୍ର ସରକାର ଓଡ଼ିଶାକୁ ପୁରସ୍କୃତ କରିଥିଲେ । ହେଲେ ବିଜେପି ସାଂସଦମାନେ କେନ୍ଦ୍ରମନ୍ତ୍ରୀଙ୍କ ଉପରେ ଚାପ ପକାଇ ଗ୍ରାମୀଣ ଆବାସ ଯୋଜନାକୁ ବନ୍ଦ କରିଦେଲେ । ଏଥିଯୋଗୁଁ ଦୁଇବର୍ଷରେ ୧୦ ଲକ୍ଷ ଗରିବ ଲୋକ ଘର ପାଇବାରୁ ବଞ୍ଚିତ ହୋଇଛନ୍ତି । ପଦ୍ମପୁରରେ ୨୫ ହଜାର ଗରିବ ଆବସ ଯୋଜନାରୁ ବଞ୍ଚିତ ହୋଇଛନ୍ତି । ତେବେ ଗରିବଙ୍କ ହକ୍ ପାଇଁ ସେ ଲଢ଼ିବେ ବୋଲି ନବୀନ କହିଥିଲେ ।
ପଦ୍ମପୁରକୁ ରେଳଲାଇନ୍ ପ୍ରସଙ୍ଗରେ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ଓ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ୍ କରିଥିଲେ ନବୀନ । ସେମାନଙ୍କ ନାଁ ନ ନେଇ ପ୍ରଶ୍ନ କରିଥିଲେ । ପଚାରିଥିଲେ ଏହି ରେଳଲାଇନ୍ ପାଇଁ କେବେ ସର୍ଭେ ହୋଇଥିଲା? କେଉଁ ଗାଁ ଦେଇ ରେଳାଲାଇନ୍ ଯିବ ତାହାର ଡିପିଆର ପ୍ରସ୍ତୁତ ହୋଇଛି କି? ଲୋକଙ୍କୁ ମିଛ କଥା କହି ଭୂଆଁ ବୁଲାନ୍ତୁ ନାହିଁ ବୋଲି ମୁଖ୍ୟମନ୍ତ୍ରୀ କଡା ଟିପ୍ପଣୀ ଦେଇଥିଲେ ।
ରାଜ୍ୟ ସରକାର ଜନ୍ମରୁ ମୃତୁ୍ୟ ପର୍ଯ୍ୟନ୍ତ ମାଳ ମାଳ ଯୋଜନା କରିଥିଲେ ମଧ୍ୟ କେନ୍ଦ୍ର ସରକାର ଅନୁଦାନ ଦେଉନାହାନ୍ତି କି ସହଯୋଗ କରୁନାହାନ୍ତି । ବିଜେପି କେବଳ କୁମ୍ଭୀର କାନ୍ଦଣା କାନ୍ଦୁଛି । ତେବେ କେନ୍ଦ୍ରର ଅବହେଳା ବିରୋଧରେ ସଂଗ୍ରାମ ଜାରି ରହିବ । ୨୦୨୪ ବେଳକୁ ନିଜେ ବିକାଶ ତାଲିକା ଧରି ଆସିବେ ବୋଲି ନବୀନ କହିଥିଲେ ।
ଦଳୀୟ ପ୍ରାର୍ଥୀ ବର୍ଷା ସିଂ ବରିହାଙ୍କ ବିରୋଧରେ ସୋସିଆଲ୍ ମିଡିଆରେ ଚାଲିଥିବା ଅପପ୍ରଚାରକୁ ମୁଖ୍ୟମନ୍ତ୍ରୀ ନିନ୍ଦା କରିଥିଲେ । ଏହା ମା’ ମାନଙ୍କ ପ୍ରତି ଅସମ୍ମାନ ବୋଲି କହିଥିଲେ । ପଦ୍ମପୁର ଅଞ୍ଚଳର ସର୍ବାଙ୍ଗୀନ ବିକାଶ ପାଇଁ ତାଙ୍କ ସରକାର କାର୍ଯ୍ୟ କରୁଛି । କଥାରେ ନୁହେଁ, କାମରେ ବିଶ୍ୱାସ କରନ୍ତି । ପଦ୍ମପୁରବାସୀଙ୍କ ସବୁ ସ୍ୱପ୍ନ ପୂରଣ ହେବ । ୨୦୨୩ ସୁଦ୍ଧା ପଦ୍ମପୁର ଜିଲ୍ଲା ସ୍ୱପ୍ନ ସାକାର ହେବ ବୋଲି ମୁଖ୍ୟମନ୍ତ୍ରୀ କହିଥିଲେ ।
ଅନ୍ୟପକ୍ଷରେ ମୁଖ୍ୟମନ୍ତ୍ରୀଙ୍କର ବକ୍ତବ୍ୟକୁ ବିଜେପି କଡ଼ା ସମାଲୋଚନା କରିଛି । ପଦ୍ମପୁର ଭୋଟ ହାତେଇବା ପାଇଁ ମୁଖ୍ୟମନ୍ତ୍ରୀ ଅସତ୍ୟ କଥା କହିଛନ୍ତି ବୋଲି ବିରୋଧୀ ଦଳ ନେତା ଜୟନାରାୟଣ ମିଶ୍ର କହିଛନ୍ତି ।
