ଭୁୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜୁ ସ୍ୱାସ୍ଥ୍ୟ ସ୍ମାର୍ଟ କାର୍ଡ ବାଣ୍ଟିବା ପାଇଁ ଆସନ୍ତାକାଲି କଳାହାଣ୍ଡି ଗସ୍ତ କରୁଛନ୍ତି । ଭବାନୀପାଟଣାରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମ ପାଇଁ ବ୍ୟାପକ ଆୟୋଜନ କରାଯାଇଛି । ତେବେ ମୁଖ୍ୟମନ୍ତ୍ରୀଙ୍କ ଏହି ଗସ୍ତ ପୂର୍ବରୁ ଶାସକ ଓ ବିରୋଧୀ ଦଳ ମୁହାଁମୁହିଁ ଅବସ୍ଥାକୁ ଚାଲି ଆସିଛନ୍ତି । ମୁଖ୍ୟମନ୍ତ୍ରୀଙ୍କ ଗସ୍ତକୁ ବିରୋଧ କରିବାକୁ ବିଜେପି ଓ କଂଗ୍ରେସ ବ୍ୟାପକ ଯୋଜନା କରିଥିବା ବେଳେ କାର୍ଯ୍ୟକ୍ରମକୁ ସଫଳ କରିବା ପାଇଁ ବିଜେଡ଼ି ସମ୍ପୂର୍ଣ୍ଣ ପ୍ରସ୍ତୁତ ରହିଛି । କୌଣସି ଅଘଟଣକୁ ଏଡ଼ାଇବା ପାଇଁ ଭବାନୀପାଟଣା ସହର ଓ ମୁଖ୍ୟମନ୍ତ୍ରୀଙ୍କ ସଭାସ୍ଥଳକୁ ଜଗିଛନ୍ତି ୨୨ ପ୍ଲାଟୁନ୍ ପୁଲିସ ଫୋର୍ସ ।
ମମିତା ମେହେର ହତ୍ୟା ଘଟଣାରେ ବିରୋଧୀ ଦଳ ଦ୍ୱାରା ଦ୍ୱାରା ଛନ୍ଦି ହୋଇଥିବା ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ହୋମ୍ ଟାଉନ୍ ରେ ମୁଖ୍ୟମନ୍ତ୍ରୀଙ୍କ ଏହି କାର୍ଯ୍ୟକ୍ରମ ଉପରେ ଏବେ ସମସ୍ତଙ୍କ ନଜର । ଉକ୍ତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀଙ୍କ ପାଖରେ ଦିବ୍ୟଶଙ୍କର ବସିବେ ତ? ମୁଖ୍ୟମନ୍ତ୍ରୀଙ୍କ ବାରିପଦା କାର୍ଯ୍ୟକ୍ରମରୁ ଦିବ୍ୟଶଙ୍କର ବାଦ୍ ପଡ଼ିଥିବାରୁ ଏବେ ନିଜ ଜିଲ୍ଲାରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମରେ ସେ ସାମିଲ ହେବେ ନା ନାହିଁ ତାହା ସମସ୍ତଙ୍କର ଉକ୍ରଣ୍ଠା ବଢ଼ାଇ ଦେଇଛି । ଦିବ୍ୟଶଙ୍କରଙ୍କ ପ୍ରତି ମୁଖ୍ୟମନ୍ତ୍ରୀଙ୍କ ଆଭିମୁଖ୍ୟ ଏଥିରୁ ସ୍ପଷ୍ଟ ଜଣାପଡ଼ିବ ବୋଲି କୁହାଯାଉଛି ।
ଦିବ୍ୟଶଙ୍କର ମିଶ୍ରଙ୍କ ବିରୋଧରେ ଆନ୍ଦୋଳନ କରୁଥିବା ବିଜେପି ମୁଖ୍ୟମନ୍ତ୍ରୀଙ୍କ ଭବାନୀପାଟଣା ଗସ୍ତକୁ ବିରୋଧ କରିବାକୁ ଘୋଷଣା କରିଛି । ଖୋଦ୍ ମୁଖ୍ୟମନ୍ତ୍ରୀଙ୍କୁ କଳାପତାକା ଦେଖାଇବାକୁ ଭୁବନେଶ୍ୱର ଓ ଭବାନୀପାଟଣାରେ ଆୟୋଜନ କରିଛି । ମୁଖ୍ୟମନ୍ତ୍ରୀ ନବୀନ ନିବାସରୁ ବାହାରିବା ବେଳେ କଳାପତାକା ଦେଖାଇବାକୁ ଭୁବନେଶ୍ୱର ବିଜେପି ଜିଲ୍ଲା ସଭାପତି ବାବୁ ସିଂ ଧମକ ଦେଇଛନ୍ତି ।
ସେପଟେ ଭବାନୀପାଟଣାରେ ମୁଖ୍ୟମନ୍ତ୍ରୀଙ୍କୁ କଳାପତାକା ଦେଖାଇବାକୁ ସାଂସଦ ବସନ୍ତ ପଣ୍ଡାଙ୍କ ନେତୃତ୍ୱରେ ଜିଲ୍ଲା ବିଜେପି ସଜ ହୋଇ ବସିଛି । ଖାଲି ସେତିକି ନୁହେଁ, ମୁଖ୍ୟମନ୍ତ୍ରୀଙ୍କ ଗସ୍ତ ପରିପ୍ରେକ୍ଷୀରେ ସମଗ୍ର କଳାହାଣ୍ଡି ଜିଲ୍ଲାରେ ବିଜେପି ଚକାଜାମ୍ ଆନ୍ଦୋଳନ ଡାକରା ଦେଇଛି । ସବୁ ବ୍ଲକ୍ ଆଗରେ ଦଳ ବିକ୍ଷୋଭ ପ୍ରଦର୍ଶନ କରିବାକୁ ଯୋଜନା କରିଛି ।
ଅନ୍ୟପକ୍ଷରେ କଂଗ୍ରେସ ବି ଆନ୍ଦୋଳନକୁ ସକ୍ରିୟ ରଖିଛି । ଦିବ୍ୟଶଙ୍କରଙ୍କ ବିରୋଧରେ କଳାହାଣ୍ଡିରେ ଆନେ୍ଦାଳନର ନେତୃତ୍ୱ ନେଉଛନ୍ତି ପୂର୍ବତନ ସାଂସଦ ଭକ୍ତଚରଣ ଦାସ । ମୁଖ୍ୟମନ୍ତ୍ରୀଙ୍କ ଗସ୍ତ ବେଳେ ଘଣ୍ଟାଏ ପାଇଁ ଜନତା କର୍ଫ୍ୟୁ ପାଳନ କରିବାକୁ ସେ ଜନସାଧାରଣଙ୍କୁ ନିବେଦନ କରିଛନ୍ତି ।
ମୁଖ୍ୟମନ୍ତ୍ରୀଙ୍କ ଗସ୍ତ ପରିପ୍ରେକ୍ଷୀରେ ବିଜେପି ଓ କଂଗ୍ରେସର ଆନ୍ଦୋଳନକୁ ପ୍ରତିହତ କରିବା ପାଇଁ ବିଜେଡ଼ି କିନ୍ତୁ ପଛରେ ପଡ଼ିନାହିଁ । କର୍ମୀମାନଙ୍କୁ ସଂଗଠିତ କରି ବ୍ୟାପକ ରଣନୀତି ପ୍ରସ୍ତୁତ କରିଛି । ବିଜେଡ଼ି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ପ୍ରତ୍ୟକ୍ଷ ତତ୍ତବାବଧାନରେ ଆଜି ଜୁନାଗଡ଼ରେ ଏକ ବିରାଟ ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା । ସ୍ଥାନୀୟ ବିଧାୟକ ଭାବେ ମନ୍ତ୍ରୀ ଦିବ୍ୟଶଙ୍କର ସାମନାରେ ରହିଥିଲେ । ଏଥିରେ ହଜାରରୁ ଅଧିକ ବିଜେପି ଓ କଂଗ୍ରେସ କର୍ମୀ ବିଜେଡ଼ିରେ ସାମିଲ ହୋଇଥିଲେ ।
ମିଶ୍ରଣ ପର୍ବରେ ଯୋଗଦେବା ପାଇଁ ଯାଉଥିବା ମନ୍ତ୍ରୀଙ୍କ ଗାଡ଼ିକୁ ବିଜେପି କର୍ମୀମାନେ ଅଣ୍ଡାମାଡ଼ ଓ କଳାପତାକା ଦେଖାଇବାକୁ ଉଦ୍ୟମ କରିଥିଲା ବେଳେ ବିଜେଡ଼ି କର୍ମୀମାନେ ଏହାର କଡ଼ା ମୁକାବିଲା କରିଥିଲେ ।
ସେପଟେ ଦିବ୍ୟଶଙ୍କରଙ୍କ ବିରୋଧରେ ଆନ୍ଦୋଳନକୁ ତୀବ୍ର କରିବା ପାଇଁ ମେଳି କରୁଥିବା ସାଂସଦ ବସନ୍ତ ପଣ୍ଡା ଆଜି ମହାଲିଙ୍ଗରେ ହଟହଟାର ସମ୍ମୁଖୀନ ହୋଇଥିଲେ । କିଛି ଗ୍ରାମବାସୀ ତାଙ୍କୁ ଓଲଟା ପ୍ରଶ୍ନବାଣ କରିବାରୁ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା ।
ଇତିମଧ୍ୟରେ ପୂର୍ବତନ ସାଂସଦ ଭକ୍ତ ଚରଣ ଦାସଙ୍କ ଭୂମିକା ବେଶୀ ଚର୍ଚ୍ଚା ସୃଷ୍ଟି କରିଛି । ଗଣମାଧ୍ୟମରେ ଦିବ୍ୟଶଙ୍କରଙ୍କ ଚରିତ୍ର ଉପରେ ଖୋଲାଖୋଲି ଅଙ୍ଗୁଳି ଉଠାଇଥିବା ଭକ୍ତ ଯେ ଏକା ନାଆର ଯାତ୍ରୀ ତାହା ଲୋକଙ୍କୁ ଜଣାଇବାକୁ ବିଜେଡ଼ି ସମର୍ଥକମାନେ ଆଗକୁ ବାହାରିଛନ୍ତି । ଚାଲୁଣି କହୁଛି ଛୁଞ୍ଚିକୁ ନ୍ୟାୟରେ ଦିବ୍ୟଶଙ୍କରଙ୍କ ବିରୋଧରେ ଭକ୍ତଙ୍କ ଆରୋପ ତାଙ୍କ ନିଜ ପାଇଁ ପ୍ରଯୁଜ୍ୟ ହୋଇଥିବାରୁ ପରିସ୍ଥିତି ଭିନ୍ନ ମୋଡ଼ ନେଉଛି । ଗୋବିନ୍ଦ ସାହୁ ସହ ଭକ୍ତ ଦାସଙ୍କ ଏକାଧିକ ନିବିଡ଼ ଫଟୋ ଏବେ ସୋସିଆଲ୍ ମିଡ଼ିଆରେ ଭାଇରାଲ୍ ହେଉଛି ।
ତେବେ ସେ ଯାହା ହେଉ, ବିରୋଧୀ ଓ ଶାସକ ଦଳର ଛକାପଂଝା ଭିତରେ ମୁଖ୍ୟମନ୍ତ୍ରୀଙ୍କ କାଲିର ଭବାନୀପାଟଣା ଗସ୍ତ ରାଜନୈତିକ ଦୃଷ୍ଟିରୁ ବେଶ୍ ଗୁରୁତ୍ୱ ବହନ କରୁଥିବାରୁ ସମସ୍ତଙ୍କ ନଜର ସେୟାଡକୁ ଚାଲିଯାଇଛି ।
