ଭୁବନେଶ୍ୱର: ଦିଲ୍ଲୀ ଗସ୍ତରେ ଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିଛନ୍ତି । ତେବେ ଉଭୟଙ୍କ ମଧ୍ୟରେ କୌଣସି ରାଜନୈତିକ ଆଲୋଚନା ହୋଇନାହିଁ ବୋଲି ନବୀନ କହିଛନ୍ତି । ଓଡ଼ିଶାର ସ୍ୱାର୍ଥ ସମ୍ବଳିତ ପ୍ରସଙ୍ଗ ବିଶେଷକରି ପୁରୀରେ ଶ୍ରୀଜଗନ୍ନାଥ ଇଣ୍ଟନ୍ୟାସନାଲ୍ ଏୟାରପୋର୍ଟ ନେଇ ପ୍ରଧାନମନ୍ତ୍ରୀଙ୍କ ସହ ଆଲୋଚନା କରିଥିବା କହିଛନ୍ତି ।
ଦୁଇିଦିନ ତଳେ ନବୀନ ନିବାସରେ ନବୀନଙ୍କୁ ଭେଟିଥିଲେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର । ବିଜେପି ବିରୋଧୀ ମେଣ୍ଟ ପ୍ରୟାସରେ ଥିବା ନୀତୀଶ, ନବୀନଙ୍କୁ ମନେଇବାକୁ ଆସିଥିବା ଚର୍ଚ୍ଚା ହୋଇଥିଲା । ତେବେ ଉଭୟ ମୁଖ୍ୟମନ୍ତ୍ରୀଙ୍କ ମଧ୍ୟରେ ପ୍ରାୟ ଦେଢ଼ଘଣ୍ଟା ଆଲୋଚନା ହୋଇଥିଲେ ମଧ୍ୟ କୌଣସି ରାଜନୈତିକ ଆଲୋଚନାକୁ ସେମାନେ ଏଡ଼ାଇ ଦେଇଥିଲେ । ତା’ ପରଦିନ ଅର୍ଥାତ ଗତକାଲି ନବୀନ ଦିଲ୍ଲୀ ଆସି ଆଜି ପ୍ରଧାନମନ୍ତ୍ରୀଙ୍କୁ ଅପରାହ୍ନରେ ଭେଟିଥିଲେ ।
ସାମ୍ପ୍ରତିକ ରାଜନୈତିକ ଦୃଶ୍ୟପଟ୍ଟରେ ମୋଦୀ ଏବଂ ନବୀନଙ୍କ ସାକ୍ଷାତକାରକୁ ଜାତୀୟ ଗଣମାଧ୍ୟମ ବି ଗୁରୁତ୍ୱ ଦେଇଥିଲା । ପ୍ରଧାନମନ୍ତ୍ରୀଙ୍କୁ ସାକ୍ଷାତ କରି ଫେରିଲା ବେଳେ ସାମ୍ବାଦିକମାନେ ମୁଖ୍ୟମନ୍ତ୍ରୀଙ୍କ ପ୍ରତିକ୍ରିୟା ଲୋଡ଼ିଥିଲେ । ମୁଖ୍ୟମନ୍ତ୍ରୀ କହିଥିଲେ, ଓଡ଼ିଶାର ସ୍ୱାର୍ଥ ସମ୍ବଳିତ ଦାବି ଉପରେ ପ୍ରଧାନମନ୍ତ୍ରୀଙ୍କ ସହ ଆଲୋଚନା କରିଛି । ଭୁବନେଶ୍ୱର ଏୟାର୍ ଟ୍ରାଫିକ ଅଧିକ ହୋଇଗଲାଣି । ସେଥିପାଇଁ ପୁରୀ ଶ୍ରୀଜଗନ୍ନାଥ ଇଣ୍ଟରନ୍ୟାସନାଲ୍ ଏୟାରପୋର୍ଟ ପାଇଁ କହିଥିଲି । ଏୟାରପୋର୍ଟ ପାଚେରୀ କାମ ସରିଯାଇଛି ବୋଲି ଜଣାଇଥିଲି । ପ୍ରଧାନମନ୍ତ୍ରୀ ସହଯୋଗ କରିବେ ବୋଲି କହିଛନ୍ତି ।
ରାଜନୈତିକ ଆଲୋଚନା କ’ଣ ହୋଇଛି ବୋଲି ସାମ୍ବାଦିକମାନେ ପଚାରିବାରୁ ପ୍ରଧାନମନ୍ତ୍ରୀଙ୍କ ସହ କୌଣସି ରାଜନୈତିକ ଆଲୋଚନା ହୋଇନାହିଁ ବୋଲି ମୁଖ୍ୟମନ୍ତ୍ରୀ ସଂକ୍ଷିପ୍ତ ଉତ୍ତର ଦେଇଥିଲେ । ତୃତୀୟ ସାମ୍ମୁଖ୍ୟ ସମ୍ପର୍କରେ ସାମ୍ବାଦିକମାନେ ପଚାରିବାରୁ ମୁଖ୍ୟମନ୍ତ୍ରୀ କହିଥିଲେ ଏବେ ସେମିତି କିଛି ନାହିଁ । ତୃତୀୟ ସାମ୍ମୁଖ୍ୟରେ ମୁଁ ନାହିଁ । ଆମେ ସମଦୂରତ୍ୱ ବଜାୟ ରଖିଛୁ ।
ପ୍ରଧାନମନ୍ତ୍ରୀଙ୍କ ସହ ଆଲୋଚନା କାଳରେ ମୁଖ୍ୟମନ୍ତ୍ରୀ ପୁରୀ ଏୟାରପୋର୍ଟ ସହ ଆଉ ତିନୋଟି ପ୍ରସଙ୍ଗ ରଖିଥିବା କୁହାଯାଇଛି । ଅଧାପନ୍ତରିଆ ଜାତୀୟ ରାଜପଥ ନିର୍ମାଣ କାର୍ଯ୍ୟ ଶୀଘ୍ର ସାରିବା, ଭାରତମାଳା ଫେଜ୍-୨ ରେ ଓଡ଼ିଶାକୁ ସାମିଲ କରିବା ଏବଂ ପଞ୍ଚାୟତ ଗୁଡ଼ିକରେ ବ୍ୟାଙ୍କିଂ ସୁବିଧା କରିବା ପାଇଁ ମୁଖ୍ୟମନ୍ତ୍ରୀ ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ ।
