ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ସଂଧ୍ୟାରେ ଭୁବନେଶ୍ୱର ଫେରିଛନ୍ତି । ଗତ ୪ ତାରିଖରୁ ମୁଖ୍ୟମନ୍ତ୍ରୀ ଜାପାନ ଗସ୍ତରେ ଥିଲେ । ତାଙ୍କ ସହ ଏକ ଉଚ୍ଚସ୍ତରୀୟ ପ୍ରତିନିଧି ଦଳ ଗସ୍ତରେ ସାମିଲ ହୋଇଥିଲେ । ଓଡ଼ିଶାର ଶିଳ୍ପ କ୍ଷେତ୍ରରେ ଅଗ୍ରଗତି ଏବଂ ପୁଞ୍ଜିନିବେଶ ଦୃଷ୍ଟିରୁ ମୁଖ୍ୟମନ୍ତ୍ରୀଙ୍କର ଜାପାନ ଗସ୍ତ ବେଶ୍ ଗୁରୁତ୍ୱପୂର୍ଣ୍ଣ ଥିଲା ।
ମୁଖ୍ୟମନ୍ତ୍ରୀଙ୍କ ଜାପାନ ଗସ୍ତର ପ୍ରଥମ ଦିନରେ ବଡ଼ ସଫଳତା ମିଳିଥିଲା । ନିପ୍ପନ ଷ୍ଟିଲ୍ କର୍ପୋରେସନ୍ ର ଅଧ୍ୟକ୍ଷ ଏଇଜି ହାସିମୋତୋଙ୍କ ସହ ମୁଖ୍ୟମନ୍ତ୍ରୀ ସେଦିନ ବୈଠକ କରିଥିଲେ । ଓଡ଼ିଶାରେ ୩୦ ମିଲିୟନ୍ ଟନ୍ ର ଏକ ଷ୍ଟିଲ୍ ପ୍ଲାଣ୍ଟ ସ୍ଥାପନ ପାଇଁ ଶ୍ରୀଯୁକ୍ତ ହାସିମୋତୋ ସେଠାରେ ଘୋଷଣା କରିଥିଲେ । ବିଶ୍ୱର ଏହା ସର୍ବବୃହତ୍ତ ଷ୍ଟିଲ୍ ପ୍ଲାଣ୍ଟ ହେବ ବୋଲି କୁହାଯାଉଛି ।
୫ ତାରିଖରେ ଟୋକିଓଠାରେ ଆୟୋଜିତ ଓଡ଼ିଶା ବିଜିନେସ୍ ମିଟ୍ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଯୋଗଦେଇଥିଲେ । ତାଙ୍କ ଆହ୍ୱାନକ୍ରମେ ଜାପାନର ନିବେଶକମାନେ ଓଡ଼ିଶାରେ ଲଜିଷ୍ଟିକ୍ ଧାତବ, ଆନୁଷଙ୍ଗିକ, ଇସ୍ପାତ, ଗି୍ରନ୍ ହାଇଡ୍ରୋଜେନ୍, ଗ୍ରିନ୍ ଆମୋନିଆ, ଗ୍ରିନ୍ ଏନର୍ଜି ଉପକରଣ ଉତ୍ପାଦନ, ଆଇଟି ଓ ତତ୍ ସଂକ୍ରାନ୍ତୀୟ କ୍ଷେତ୍ରରେ ପୁଞ୍ଜିନିବେଶ କରିବାକୁ ଆଗ୍ରହ ଦେଖାଇଥିଲେ । ସେଠାରୁ ମୋଟ ୨୬ ହଜାର କୋଟି ଟଙ୍କାର ପୁଞ୍ଜିନିବେଶ ପ୍ରସ୍ତାବ ଆସିଥିଲା ।
ଗସ୍ତର ତୃତୀୟ ଦିନରେ ମୁଖ୍ୟମନ୍ତ୍ରୀ ଓ ତାଙ୍କ ପ୍ରତିନିଧି ଦଳ ସହ ଆଲୋଚନା କରିଥିଲେ ଫୁଜି ସଫ୍ଟ ଆଇଟି କମ୍ପାନୀ । ଭୁବନେଶ୍ୱରରେ ଏକ ଉତ୍କର୍ଷ କେନ୍ଦ୍ର ସ୍ଥାପନ କରିବାକୁ ଏହି ବିଶ୍ୱସ୍ତରୀୟ କମ୍ପାନୀ ପ୍ରସ୍ତାବ ଦେଇଥିଲା । ନିହୋନ୍-ଉତ୍କଳ(ନିଟକାଲ୍) ଭୁବନେଶ୍ୱରରେ ଏକ ଦକ୍ଷତା ବିକାଶ କେନ୍ଦ୍ର ସ୍ଥାପନ କରିବାକୁ ମଧ୍ୟ ପ୍ରସ୍ତାବ ଦେଇଛି ।
ଜାପାନର ଲଜିଷ୍ଟିକ୍ ଓ ଷ୍ଟୋରେଜ୍ କ୍ଷେତ୍ରର ଦୁଇ ପ୍ରମୁଖ କମ୍ପାନୀ ଏନୱାଇକେ ଲାଇନସ୍ ପାରାଦ୍ୱୀପ, ଗୋପାଳପୁର ଓ ଧାମରା ବନ୍ଦର ଜରିଆରେ ଗ୍ରିନ୍ ଆମୋନିଆ ପରିବହନ କରିବା ନିମନ୍ତେ ଏକ ଉତ୍ସର୍ଗୀକୃତ ସିପିଙ୍ଗ୍ ଲାଇନ୍ ସ୍ଥାପନ ଲାଗି ପ୍ରସ୍ତାବ ରଖିଛି । ଗ୍ରିନ୍ ହାଇଡ୍ରୋଜେନ୍ ଓ ଗ୍ରିନ୍ ଆମୋନିଆ ଲାଗି ଟ୍ୟାଙ୍କ୍ ଓ ଷ୍ଟୋରେଜ୍ ବ୍ୟବସ୍ଥା ପ୍ରସ୍ତୁତ କରିବା ପାଇଁ ସୁମିଟୋମୋ କର୍ପୋରେସନ ପ୍ରସ୍ତାବ ଦେଇଥିଲା । ଗୋପାଳପୁରସ୍ଥିତ ଏସଇଜେଡ୍ ନିକଟରେ ଏହି ପ୍ରକଳ୍ପ ସ୍ଥାପନ ଲାଗି କମ୍ପାନୀ ଆଗ୍ରହ ଦେଖାଇଛି ।
ଓଡ଼ିଶାରେ ନିପ୍ପନ୍ କେବଳ ଇସ୍ପାତ କାରଖାନା ନୁହେଁ, କ୍ରୀଡ଼ା କ୍ଷେତ୍ରରେ ମଧ୍ୟ ସହଯୋଗର ହାତ ବଢ଼ାଇଛି । କଳିଙ୍ଗ ଷ୍ଟାଡିୟମ୍ ରେ ଜିମ୍ନାଷ୍ଟିକ୍ ଉଚ୍ଚ ଗୁଣବତ୍ତା କେନ୍ଦ୍ର(ଏଚପିସି) ସ୍ଥାପନ ଲାଗି କମ୍ପାନୀ ସହ ଏମଓୟୁ ସ୍ୱାକ୍ଷରିତ ହୋଇଥିଲା । ପୁରୀ, ଜୟପୁର ଓ ରାଉରକେଲାରେ ଜିମ୍ନାଷ୍ଟିକ୍ସ ଏକାଡେମୀ କରିବାକୁ କମ୍ପାନୀ ଆଗ୍ରହ ଦେଖାଇଛି ।
ଜାପାନ ଗସ୍ତକାଳରେ ମୁଖ୍ୟମନ୍ତ୍ରୀ ରାଜ୍ୟ କ୍ୟାବିନେଟ୍ ବୈଠକ ଡାକି ପ୍ରବାସୀଙ୍କ ପାଇଁ ଏକ ବଡ଼ ପଦକ୍ଷେପ ନେଇଥିଲେ । ବିଦେଶରେ ରହୁଥିବା ପ୍ରବାସୀ ଓଡ଼ିଆଙ୍କ ପାଇଁ ରାଜ୍ୟ ସରକାର ସ୍ୱତନ୍ତ୍ର ଭାବେ “ଓଡ଼ିଶା ପରିବାର ନିଦେ୍ର୍ଦଶାଳୟ’ ଗଠନ କରିବେ । ପ୍ରବାସୀ ଓଡ଼ିଶାବାସୀଙ୍କ ସହ ଉତ୍ତମ ସମ୍ପର୍କ ସ୍ଥାପନ କରିବା ନିମନ୍ତେ ଏହି ନିଦେ୍ର୍ଦଶାଳୟ ଗଠନ ହେବ । ପ୍ରବାସୀ ଓଡ଼ିଆଙ୍କ ଜ୍ଞାନ, କୌଶଳ ତଥା ବିଶ୍ୱସ୍ତରୀୟ ଉପସ୍ଥିତିକୁ ଓଡ଼ିଶାର ଅଗ୍ରଗତିରେ ନିୟୋଜିତ କରିବା ସହ ସେମାନେ ସାମ୍ନା କରୁଥିବା ଅସୁବିଧାର ସମାଧାନ ପାଇଁ ନିର୍ଦ୍ଦେଶାଳୟ ଉଦ୍ୟମ କରିବ ।
