ଭୁବନେଶ୍ୱର: ସବୁଠାରୁ ଖରାପ ସ୍ଥିତିର ସାମନା କରିବା ପାଇଁ ଯେଉଁ ପ୍ରସ୍ତୁତି ଦରକାର ତାହା କର । ଅକ୍ସିଜେନ୍ ସପୋର୍ଟ ସହ ଅଧିକ ବେଡ୍ ପ୍ରସ୍ତୁତ ରଖ । ପ୍ରବାସୀ ଫେରିପାରନ୍ତି, ସେଥିପାଇଁ ପ୍ରସ୍ତୁତ ରୁହ ।
ଆଜି କୋଭିଡ୍ ସ୍ଥିତିର ସମୀକ୍ଷା କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଶାସନକୁ ଏହି ନିର୍ଦ୍ଦେଶ ଦେଇଛନ୍ତି । ବର୍ତ୍ତମାନ ଆମ ରାଜ୍ୟରେ ବେଡ୍ ଓ ଅକ୍ସିଜେନ୍ ସମସ୍ୟା ନ ଥିଲେ ମଧ୍ୟ ସବୁଠାରୁ ଖରାପ ସ୍ଥିତି ପାଇଁ ଆମକୁ ପ୍ରସ୍ତୁତ ରହିବାକୁ ପଡ଼ିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ମୁଖ୍ୟମନ୍ତ୍ରୀ କହିଛନ୍ତି, କରୋନାର ଦ୍ୱିତୀୟ ଲହର ଅନେକ ରାଜ୍ୟରେ ଭୟଙ୍କର ପରିସ୍ଥିତି ସୃଷ୍ଟି କରିଛି । ପଜିଟିଭ୍ ସଂଖ୍ୟା ବୃଦ୍ଧି ପାଉଥିବାରୁ କିଛି ସହରରେ ସ୍ୱାସ୍ଥ୍ୟସେବା ପ୍ରବଳ ଚାପର ସମ୍ମୁଖୀନ ହୋଇଛି । କିଛି ଦିନ ଧରି ଓଡ଼ିଶାରେ ପଜିଟିଭ୍ ହାର ବଢ଼ିବାରେ ଲାଗିଛି । ବିନା ଲକଡାଉନ୍ ରେ ପରିସ୍ଥିତିର ମୁକାବିଲା କରିବା ଆମେ ସମସ୍ତେ ଚାହୁଁ । ତେଣୁ ସମସ୍ତଙ୍କୁ ସାବଧାନ ହେବାକୁ ପଡ଼ିବ । ମାସ୍କ ଓ ସାମାଜିକ ଦୂରତ୍ୱ ନିୟମକୁ କଡ଼ାକଡ଼ି ମାନିବାକୁ ପଡ଼ିବ । ପ୍ରତ୍ୟେକ ରୋଗୀ ଯେଭଳି ମର୍ଯ୍ୟାଦାର ସହ ଉପଯୁକ୍ତି ଚିକିତ୍ସା ସେବା ପାଇପାରିବେ ଏବଂ ପ୍ରତିଟି ମୂଲ୍ୟବାନ ଜୀବନ ବଞ୍ଚାଇବାକୁ ଶତଚେଷ୍ଟା ରହିବ ମୁଖ୍ୟମନ୍ତ୍ରୀ ତାହା ଉପରେ ଗୁରୁତ୍ୱ ଦେଇଛନ୍ତି ।
ପ୍ରଶାସନକୁ ମୁଖ୍ୟମନ୍ତ୍ରୀଙ୍କ ୬ ସୂତ୍ରୀ ମନ୍ତ୍ର
୧-କୋଭିଡ୍ ହସ୍ପିଟାଲ୍ ଓ କୋଭିଡ୍ କେୟାର୍ ସେଣ୍ଟର ଗୁଡ଼ିକରେ ବେଡ୍ ଆହୁରି ବଢ଼ାଅ । ଅଧିକରୁ ଅଧିକ ଅକ୍ସିଜେନ୍ ସପୋର୍ଟ ବେଡ୍ ଉପରେ ଧ୍ୟାନ ଦିଅ । ନିର୍ଦ୍ଦିଷ୍ଟ ସମୟସୀମା ମଧ୍ୟରେ ଯୁଦ୍ଧକାଳୀନ ଭିତ୍ତିରେ ବ୍ୟବସ୍ଥା କାମ କରୁ ।
୨-ଅକ୍ସଜେନ୍ ଯୋଗାଣ ସ୍ଥିତିକୁ ଭଲଭାବେ ତଦାରଖ କର । ଡାକ୍ତରଖାନା ଗୁଡ଼ିକରେ ଆବଶ୍ୟକ ଉପକରଣକୁ ପ୍ରାଥମିକତା ଭିତ୍ତିରେ ଉପଲବ୍ଧ କରାଅ ।
୩- ପର୍ଯ୍ୟାପ୍ତ ଔଷଧ ମହଜୁଦ ରଖ ।
୪- ଆଇଇସି ଅଭିଯାନ ଆହୁରି ଜୋରଦାର ହେଉ । ଜନସାଧାରଣଙ୍କ ସହିତ ମିଶନ ଶକ୍ତି ଏବଂ ପଞ୍ଚାୟତିରାଜ ପ୍ରତିନିଧିମାନଙ୍କୁ କୋଭିଡ୍ ସଚେତନତା କାର୍ଯ୍ୟକ୍ରମରେ ସାମିଲ କରାଯାଉ ।
୫-ସମସ୍ତ କୋଭିଡ୍ ନିୟମ ଅନୁପାଳନକୁ ଦୃଢ଼ ଭାବରେ ଲାଗୁ କରିବା କାର୍ଯ୍ୟକ୍ରମ ଜାରି ରହୁ ।
୬-କୋଭିଡ୍ ପରିସ୍ଥିତି ସାଂଘାତିକ ଥିବା ରାଜ୍ୟରୁ ପ୍ରବାସୀମାନେ ଆସିପାରନ୍ତି । ସେଥିପାଇଁ ଜିଲ୍ଲାପାଳମାନେ ପ୍ରସ୍ତୁତ ରହିବା ଆବଶ୍ୟକ । ପ୍ରବାସୀଙ୍କ ଆଗମନ ପରିଚାଳନା ପାଇଁ ପୂର୍ବରୁ ଯେଉଁ ପ୍ରୋଟୋକଲ୍ ଥିଲା, ତାକୁ ବର୍ତ୍ତମାନର ଟାଡା ବେସ୍ ଅନୁଯାୟୀ ପୁନର୍ବାର କାର୍ଯ୍ୟକାରୀ କର । ପ୍ରବାସୀଙ୍କ ଟେଷ୍ଟିଂ ଓ ସଙ୍ଗରୋଧ ବ୍ୟବସ୍ଥାକୁ ସୁନିଶ୍ଚିତ କର ।
ବୈଠକରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ସ୍ୱାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର, ଉନ୍ନୟନ କମିଶନର ପ୍ରଦୀପ ଜେନା ଏବଂ ଅନ୍ୟ ବରିଷ୍ଠ ଅଧିକାରୀମାନେ ଯୋଗଦେଇଥିଲେ । ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଭି.କେ.ପାଣ୍ଡିଆନ୍ ବୈଠକ ପରିଚାଳନା କରିଥିଲେ ।
