ନୂଆଦିଲ୍ଲୀ: ପ୍ରତିପକ୍ଷଙ୍କୁ ବଦନାମ ଏବଂ ଜନସାଧାରଣଙ୍କୁ ଭ୍ରମିତ କରିବା ପାଇଁ ନେତା କେଉଁସ୍ତରକୁ ଯାଆନ୍ତି ତାହାର ଜ୍ୱଳନ୍ତ ଉଦାହରଣ ହେଉଛନ୍ତି ବିଜେପି ରାଷ୍ଟ୍ରୀୟ ପ୍ରବକ୍ତା ଡକ୍ଟର ସମ୍ବିତ ପାତ୍ର । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ଙ୍କୁ ବଦନାମ କରିବା ଉଦ୍ଦେଶ୍ୟ ରେ ସୋସିଆଲ୍ ମିଡ଼ିଆରେ ଏକ ଫେକ୍ ଭିଡ଼ିଓ ସେୟାର୍ କରିଥିବା ଏହି ନେତା କୋର୍ଟ ହାବୁଡ଼ରୁ ଖସିପାରିନାହାନ୍ତି । ତାଙ୍କ ବିରୋଧରେ ମାମଲା ରୁଜୁ ପାଇଁ କୋର୍ଟ ଆଜି ଦିଲ୍ଲୀ ପୁଲିସକୁ ନିର୍ଦ୍ଦେଶ ଦେଇଛନ୍ତି ।
ଗତ ଜାନୁଆରୀ ମାସରେ ବିଜେପିର ଏହି ରାଷ୍ଟ୍ରୀୟ ପ୍ରବକ୍ତା ତାଙ୍କ ଟୁଇଟର ଆକାଉଣ୍ଟରେ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ୍ ଙ୍କ ୧୮ ସେକେଣ୍ଡର ଏକ ଭାଷଣ ଅପଲୋଡ଼ କରିଥିଲେ । ଉକ୍ତ ଭିଡ଼ିଓରେ କେଜ୍ରିୱାଲ୍ ଙ୍କ ମୁହଁରୁ ତିନୋଟି ଯାକ ନୂଆ କୃଷି ଆଇନର ଉପକାରିତା ସମ୍ପର୍କରେ ଏମିତି ଶୁଣିବାକୁ ମିଳିଥିଲା..
‘ନୂଆ କୃଷି ଆଇନରେ ଆପଣଙ୍କ ଜମି, ଏମଏସପି ଓ ମଣ୍ଡି ଛଡ଼ାଇ ନିଆଯିବ ନାହିଁ । ଦେଶର ଯେ କୌଣସି ସ୍ଥାନରେ ଚାଷୀମାନେ ନିଜର ଶସ୍ୟ ବିକ୍ରି କରିପାରିବେ । ଗତ ୭୦ ବର୍ଷରେ ଏହା ଦେଶର ସବୁଠାରୁ ବୈପ୍ଲବିକ ପଦକ୍ଷେପ ।’
ବିଜେପି ପ୍ରବକ୍ତା ନିଜ ଟୁଇଟରରେ ଏହି ଭିଡ଼ିଓ ଅପଲୋଡ଼ କରିବା ପରେ ରାଜନୈତିକ ଝଡ଼ ସୃଷ୍ଟି ହୋଇଥିଲା । ତେବେ ଆମ୍ ଆଦମୀ ପାର୍ଟି ଏହାର ତୀବ୍ର ପ୍ରତିବାଦ କରିଥିଲା । ପରବର୍ତ୍ତୀ ସମୟରେ ଉକ୍ତ ପୋଷ୍ଟଟିକୁ ଟୁଇଟର୍ କର୍ତ୍ତୃପକ୍ଷ ‘ମାନିପୁଲେଟେଡ୍ ଭିଡ଼ିଓ’ ଶ୍ରେଣୀଭୁକ୍ତ କରିବା ପରେ ସତ ପଦାକୁ ଆସିଯାଇଥିଲା ।
ଜଣାପଡ଼ିଥିଲା ଯେ ଦିଲ୍ଲୀ ମୁଖ୍ୟମନ୍ତ୍ରୀଙ୍କର ୪୧ ମିନିଟ୍ ୨୫ ସେକେଣ୍ଡ୍ ର ଏକ ସାକ୍ଷାତକାର ଭିଡ଼ିଓର ଏହା ଏକ ସମ୍ପାଦିତ ଅଂଶ । କେଜ୍ରିୱାଲ୍ ଙ୍କୁ ବଦନାମ ତଥା ଜନସାଧାରଣଙ୍କୁ ଭ୍ରମିତ କରିବା ଉଦ୍ଦେଶ୍ୟରେ ତାଙ୍କର ଭିନ୍ନ ଭିନ୍ନ ମନ୍ତବ୍ୟକୁ ଏଭଳି ଭାବରେ ଯୋଡାଯାଇ ଫେକ୍ ଭିଡ଼ିଓ ପ୍ରସ୍ତୁତ ହୋଇଥିଲା । ବାସ୍ତବରେ ଶ୍ରୀ କେଜ୍ରିୱାଲ୍ କୃଷି ବିଲ୍ ବିରୋଧରେ ପ୍ରବଳ ବିଷୋଦଗାର କରିଥିଲେ ।
ଏହି ସତ୍ୟକୁ ନେଇ ଆମ୍ ଆଦମୀ ପାର୍ଟି ସମ୍ବିତ ପାତ୍ରଙ୍କ ବିରୋଧରେ ପୁଲିସର ଦ୍ୱାରସ୍ଥ ହୋଇଥିଲା । ମୁଖ୍ୟମନ୍ତ୍ରୀଙ୍କୁ ବଦନାମ କରିବା ଉଦ୍ଦେଶ୍ୟରେ ଶ୍ରୀ ପାତ୍ର ଏହି ଫେକ୍ ଭିଡ଼ିଓକୁ ସୋସିଆଲ୍ ମିଡ଼ିଆରେ ସେୟାର୍ କରିଛନ୍ତି ବୋଲି ଦର୍ଶାଯାଇଥିଲା । ମାତ୍ର ଦିଲ୍ଲୀ ପୁଲିସ ଏହି ମାମଲାକୁ ଗ୍ରହଣ କରି ନ ଥିଲା ।
ଦିଲ୍ଲୀ ପୁଲିସଠାରୁ ନିରାଶ ହେଲା ପରେ ଆପ୍ ନେତା ଅତିଶି କୋର୍ଟକୁ ଯାଇଥିଲେ । ତିସ୍ ହଜାରି କୋର୍ଟର ମେଟ୍ରୋପଲିଟାନ୍ ମାଜିଷ୍ଟ୍ରେଟ୍ ରିଷଭ୍ କୁମାର ଆଜି ତାଙ୍କ ଆବେଦନର ବିଚାର କରିବା ବେଳେ ବାସ୍ତବତା ହୃଦୟଙ୍ଗମ କରିଛନ୍ତି । ବିଜେପି ପ୍ରବକ୍ତା ସମ୍ବିତ୍ ପାତ୍ରଙ୍କ ବିରୋଧରେ ଆଇପିସିର ଆବଶ୍ୟକ ଧାରାରେ ମାମଲା ରୁଜୁ ପାଇଁ ଦିଲ୍ଲୀ ପୁଲିସକୁ ନିର୍ଦ୍ଦେଶ ଦେଇଛନ୍ତି ।
