ଭୁବନେଶ୍ୱର: ନିଟ୍ ପ୍ରଶ୍ନପତ୍ର ଲିକ୍ ଘଟଣାରେ କେନ୍ଦ୍ରମନ୍ତ୍ରୀ ପଦ ହରାଇଥିବା ଧର୍ମେନ୍ଦ୍ର ପ୍ରଧାନ ତାଙ୍କ ନିର୍ବାଚନମଣ୍ଡଳୀ ସମ୍ବଲପୁରକୁ ପ୍ରଥମ ଗସ୍ତରେ ଆସିଛନ୍ତି । ଆଜି ରେଢ଼ାଖୋଲରେ ଆୟୋଜିତ ଏକ କାର୍ଯ୍ୟକ୍ରମରେ ସେ ସିଧାସଳଖ ନବୀନ ପଟ୍ଟନାୟକଙ୍କୁ ନିଶାନା କରିଛନ୍ତି । ସ୍ଥାନୀୟ ବିଧାୟକ ତଥା ବିରୋଧୀ ଦଳର ଉପନେତା ପ୍ରସନ୍ନ ଆଚାର୍ଯ୍ୟଙ୍କ ଉପସ୍ଥିତିରେ ଧର୍ମେନ୍ଦ୍ରଙ୍କର ଏହି ବକ୍ତବ୍ୟ ରାଜନୈତିକ ମହଲରେ ଚର୍ଚ୍ଚା ସୃଷ୍ଟିି କରିଛି ।
ଆଜି ରେଢ଼ାଖୋଲରେ କେନ୍ଦ୍ରୀୟ ବିଦ୍ୟାଳୟର ସ୍ଥାୟୀ କ୍ୟାମ୍ପସ୍ ନିର୍ମାଣର ଭୂମିପୂଜନ ଏବଂ ଅସ୍ଥାୟୀ ଭବନର ଶୁଭ ଉଦଘାଟନ କାର୍ଯ୍ୟକ୍ରମରେ ଯୋଗଦେଇଥିଲେ ଧର୍ମେନ୍ଦ୍ର ପ୍ରଧାନ, ପ୍ରସନ୍ନ ଆଚାର୍ଯ୍ୟ ଏବଂ ମନ୍ତ୍ରୀ ରବି ନାଏକ । ଧର୍ମେନ୍ଦ୍ର ତାଙ୍କ ଭାଷଣରେ ସ୍ଥାନୀୟ ଅଞ୍ଚଳର ବିକାଶ ପ୍ରସଙ୍ଗରେ କହିଲା ବେଳେ ମିଡିଆ ପାଇଁ ଗୁଗୁଲି ଛାଡ଼ିବାକୁ ଭୁଲି ନ ଥିଲେ । ପ୍ରସନ୍ନ ଆଚାର୍ଯ୍ୟଙ୍କ ଇଚ୍ଛା ଓ ଅନୁମତିରେ ସେ ଏଠାକୁ ଆସିଛନ୍ତି ବୋଲି ଆଗୁଆ ଜଣାଇ ଜେନ୍-ଜି ଆନ୍ଦୋଳନକୁ ସମର୍ଥନ କରି ତାଙ୍କର ଇସ୍ତଫା ଦାବି କରିଥିବା ନବୀନ ପଟ୍ଟନାୟକଙ୍କୁ ତେର୍ଚ୍ଛାବାଣ ମାରିଥିଲେ ।
ଧର୍ମେନ୍ଦ୍ର କହିଥିଲେ ଯେ ୧୨ ବର୍ଷ କାଳ କେନ୍ଦ୍ରରେ ମନ୍ତ୍ରୀ ରହିବା ଭିତରେ ସେ ଓଡ଼ିଆ ଲୋକଙ୍କ ମୁଣ୍ଡ କେବେ ତଳକୁ କରିନାହାନ୍ତି । ମାତ୍ର ନବୀନ ବାବୁ ତାଙ୍କୁ ବଦମାସ, କୁଳାଙ୍ଗାର ବୋଲି କହୁଛନ୍ତି । ଛୋଟ ଦୁଇ ଭାଇ ଭଉଣୀ(ଚିନ୍ମୟ ଓ ଇପ୍ସିତା)ଙ୍କୁ କାମରେ ଲଗାଇଛନ୍ତି । ସେମାନେ ଧର୍ମେନ୍ଦ୍ର ପ୍ରଧାନ ଗୋ ବ୍ୟାକ୍ ନାରା ଦେଉଛନ୍ତି । ଧର୍ମେନ୍ଦ୍ର ପ୍ରଧାନ ଏଠୁ ପଳଉ ବୋଲି କହୁଛନ୍ତି । ତେବେ ମହାପ୍ରଭୁ, ମା’ ସମଲେଶ୍ୱରୀ ଏବଂ ଓଡ଼ିଶାବାସୀଙ୍କ ଆଶୀର୍ବାଦରୁ ଓଡ଼ିଶା ଲୋକଙ୍କ ମୁଣ୍ଡ କେବେ ସେ ତଳକୁ କରିନାହାନ୍ତି । ଓଡ଼ିଶାର ସମ୍ମାନହାନି ଭଳିଆ କୌଣସି ପାପ କେବେ କରିବେ ନାହିଁ ।
ଧର୍ମେନ୍ଦ୍ର ଏହା କହିବା ପୂର୍ବରୁ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟଙ୍କର ଅନୁମତି ଭିକ୍ଷା କରି ଭିନ୍ନ ବାର୍ତ୍ତା ଦେବାକୁ ଉଦ୍ୟମ କରିଥିଲେ । ସଂଯୋଗକୁ ଆଜି ପ୍ରସନ୍ନ ଆଚାର୍ଯ୍ୟଙ୍କର ଜନ୍ମଦିନ ଥିବାରୁ ଧର୍ମେନ୍ଦ୍ର ତାଙ୍କୁ କେକ୍ କାଟି ଖୁଆଇଥିଲେ ଏବଂ ତାଙ୍କର ଆଶୀର୍ବାଦ ନେଇଥିଲେ ।
ସଭାରେ ନବୀନଙ୍କୁ ଧର୍ମେନ୍ଦ୍ରଙ୍କର କଟାକ୍ଷ ଉପରେ ଗଣମାଧ୍ୟମକୁ ଶ୍ରୀ ଆଚାର୍ଯ୍ୟ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି, ନବୀନ ପଟ୍ଟନାୟକ କି ବିଜୁ ଜନତା ଦଳ କାହାକୁ ଶିଖାଇବାର ଆବଶ୍ୟକତା ନାହିଁ । ଆଜି ଭାରତବର୍ଷରେ ସ୍ୱତଃସ୍ପୃତ ପ୍ରତିକ୍ରିୟା ସୃଷ୍ଟି ହୋଇଛି । ତା’ର ପ୍ରତିଫଳନ ଓଡ଼ିଶାରେ ହୋଇଛି । କିଏ ତାକୁ ବାଧା ଦେବ କି କିଏ ତାକୁ ମନା କରିବ । ଏସବୁ ଯେ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ହୋଇଛି ତାହା କହିବା ଠିକ୍ ନୁହେଁ ।
ସେହିଭଳି ଏକ ସାମ୍ବାଦିକ ସମ୍ମିଳନୀ କରି ଧର୍ମେନ୍ଦ୍ରଙ୍କୁ ଜବାବ ଦେଇଛନ୍ତି ପୂର୍ବତନ ମନ୍ତ୍ରୀ ତଥା ସମ୍ବଲପୁର ଜିଲ୍ଲା ବିଜେଡି ସଭାପତି ରୋହିତ ପୂଜାରୀ । ସେ କହିଛନ୍ତି ନବୀନ ବାବୁ କାହାକୁ କାହିଁକି ବଦନାମ କରିବେ? ଦେଶ ଜାଣିଛି କ’ଣ ହୋଇଛି । ନିଟ୍ ପ୍ରଶ୍ନପତ୍ର ଲିକ୍ ଯୋଗୁଁ ୨୧ ପିଲା ଜୀବନ ହରାଇଲେ । ଯନ୍ତରମନ୍ତରରେ ଶାନ୍ତିପୂର୍ଣ୍ଣ ଆନ୍ଦୋଳନ କରୁଥିବା ପିଲାମାନଙ୍କୁ ଅମାନୁଷିକ ଆକ୍ରମଣ କରାଗଲା । ସେମାନଙ୍କୁ ଲାଠି ମାଡ଼ ହେଲା । ପେଲେଟ୍ ବନ୍ଧୁକ ବ୍ୟବହାର କରାଗଲା । ଏତେ ସବୁ କାଣ୍ଡ ପରେ ନବୀନ ପଟ୍ଟନାୟକ ତାଙ୍କୁ ବଦନାମ କରିଛନ୍ତି ବୋଲି ଧର୍ମେନ୍ଦ୍ର ପ୍ରଧାନ କହିବା ହାସ୍ୟାସ୍ପଦ ବୋଲି ସେ କହିଛନ୍ତି ।
