ଭୁବନେଶ୍ୱର: ଗୋପାଳପୁର କଳା ମୁଗୁନି ପଥର ଖଣି ମାଲିକ ମାନସ ରାଉତ ଜଣେ କରିତକର୍ମା ବ୍ୟକ୍ତି । ଢ଼େଙ୍କାନାଳର ପ୍ରଚଣ୍ଡ ପ୍ରଭାବଶାଳୀ ଖଣି ବ୍ୟବସାୟୀଙ୍କର ସେ ବାଲ୍ୟବନ୍ଧୁ । ବିଗତ ସରକାର ଅମଳରେ ଏହି ଖଣି ବ୍ୟବସାୟୀଙ୍କର ଫାର୍ମ ହାଉସ୍ କୁ ପ୍ରଭାବ ନେତାଙ୍କର ଯା ଆସ ହେଉଥିଲା । ଏହି ସମ୍ପର୍କରେ ମାନସ ରାଉତଙ୍କ ହାତ ବହୁତ ଲମ୍ବା । ସ୍ଥାନୀୟ ପ୍ରଶାସନ ଓ ପୁଲିସ ତାଙ୍କ ହାତମୁଠାରେ । ଏହାର ନିରପେକ୍ଷ ତଦନ୍ତ ହେଲେ ସବୁ ସତ ସାମନାକୁ ଆସିଯିବ ।
ଢ଼େଙ୍କାନାଳ ଜିଲ୍ଲା ଓଡ଼ାପଡ଼ା ବ୍ଲକ୍ ମୋଟଙ୍ଗା ଥାନା ଅର୍ନ୍ତଗତ ଗୋପାଳପୁର ଗ୍ରାମ ନିକଟରେ ଏକ କଳା ମୁଗୁନି ପଥର ଖାଦାନରେ ଘଟିଥିବା ବିସ୍ଫୋରଣରେ ଦୁଇଜଣଙ୍କର ମୃତ୍ୟୁ ହୋଇଛି । ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ଦୀର୍ଘ ୧୨ ଘଣ୍ଟାର ଉଦ୍ଧାର କାର୍ଯ୍ୟ ଶେଷରେ ମୋଟଙ୍ଗା ପୁଲିସ ପକ୍ଷରୁ ଏହା ସ୍ପଷ୍ଟ କରାଯାଇଛି । ପଥର ଖାଦାନରେ ଏକାଧିକ ଶ୍ରମିକ କାମ କରୁଥିବାରୁ ମୃତ୍ୟୁ ସଂଖ୍ୟା ୪ ରୁ ଅଧିକ ବୋଲି ପୂର୍ବରୁ ଆଶଙ୍କା କରାଯାଉଥିଲା ।
ଶନିବାରର ଏହି ଘଟଣା ପରେ ରାଜ୍ୟ ସରକାରଙ୍କର ଚେତା ପଶିଛି । ଖଣିମନ୍ତ୍ରୀ ବିଭୂତି ଜେନା ଏହି ଦୁର୍ଘଟଣାରେ ଉଦବେଗ ପ୍ରକାଶ କରି ଦୃଢ଼ କାର୍ଯ୍ୟାନୁଷ୍ଠାନର ଚେତାବନୀ ଦେଇଛନ୍ତି । ସଂପୃକ୍ତ ଖଣିରେ ବେଆଇନ ଭାବରେ ବ୍ଲାଷ୍ଟିଂ କରାଯାଉଥିଲା । ଡିସେମ୍ବରରୁ ୩୦ରେ ବ୍ଲାଷ୍ଟିଂ ଲାଇସେନ୍ସ ଅବଧି ସରିଯାଇଥିଲା । ଏଭଳି ବେଆଇନ ଖଣି ଉତ୍ତୋଳନ ଅକ୍ଷମଣୀୟ ଅପରାଧ । ଏହାର ତଦନ୍ତ ହୋଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଖଣିମନ୍ତ୍ରୀ କହିଛନ୍ତି ।
ସାରା ରାଜ୍ୟରେ ବର୍ଷ ବର୍ଷ ଧରି ଲଘୁ ଖଣିଜ ପଦାର୍ଥର ବେଆଇନ ଉତ୍ତୋଳନ ଏକ ସାଧାରଣ ଘଟଣା ହୋଇଯାଇଛି । ଗାଁ ଗାଁରେ ଜଙ୍ଗଲରୁ ପଥର ଉତ୍ତୋଳନ ନିମନ୍ତେ ଶକ୍ତିଶାଳୀ ବିସ୍ଫୋରକ ସାମଗ୍ରୀ ବ୍ୟବହାର କରାଯାଉଛି । ଅଧିକାଂଶ ଜାଗାରେ ଖଣି ବିଭାଗର ବିନା ଅନୁମତିରେ ଏହି ବେଆଇନ କାର୍ଯ୍ୟ ଚାଲୁଛି । ରାଜନୈତିକ ପୃଷ୍ଠପୋଷକତାରେ ଏହା ଚାଲୁଥିବାରୁ ସ୍ଥାନୀୟ ପ୍ରଶାସନ ଓ ପୁଲିସ ନିରବ ରହୁଛନ୍ତି । ସେହି କାରବାରରୁ ସେମାନଙ୍କ ପକେଟ ଗରମ ହେଉଛି । ବିଭିନ୍ନ ଅଞ୍ଚଳରୁ ଏହାର ମାଳ ମାଳ ଅଭିଯୋଗ ସରକାରଙ୍କ ପାଖକୁ ଆସୁଛି । ମାତ୍ର ସେହି ଧାରାରେ ବ୍ରେକ୍ ଲାଗୁନି କି କାହାର କିଛି ହେଉ ନାହିଁ ।
ବାଲି ଚୋରା ଚାଲାଣ ହେଉ କି ଖଣି ଖାଦାନରେ ବେଆଇନ କାର୍ଯ୍ୟ ହେଉ, ଏସବୁ ବନ୍ଦ କରିବାକୁ ନୂଆ ସରକାର ତାଙ୍କର ଆଭିମୁଖ୍ୟ ପ୍ରଥମରୁ ସ୍ପଷ୍ଟ କରିଛନ୍ତି । ଏଭଳି ଅପରାଧୀଙ୍କୁ ପ୍ରଶୟ ଦିଆଯିବ ନାହିଁ ବୋଲି ମୁଖ୍ୟମନ୍ତ୍ରୀ ବାରମ୍ବାର କହି ଆସୁଛନ୍ତି । ଅତୀତରେ ଖଣିମନ୍ତ୍ରୀ ଶ୍ରୀ ଜେନା ବିଭିନ୍ନ ଅଞ୍ଚଳ ବୁଲି ଏହାର ତଦାରଖ କରିଥିଲେ । ସେହି ଡ଼ରରେ ଅଧିକାଂଶ ଖଣି ଖାଦାନରେ ବେଆଇନ କାରବାର ବନ୍ଦ ହୋଇଯାଇଥିଲା । ମାତ୍ର କିଛି ମାସ ପରେ ପୁଣି ଚାଲିଲା । ତାହାପୁଣି ସ୍ଥାନୀୟ ପ୍ରଶାସନ ଓ ପୁଲିସର ସହଯୋଗରେ । କିଛି ଜାଗାରେ ବିଜେପି ଓ ବିଜେଡିର ସ୍ଥାନୀୟ କୁଜି ନେତାମାନେ ଏହି କାମରେ ହାତ ମିଳାଇଛନ୍ତି । ସ୍ଥାନୀୟ ଅଞ୍ଚଳର ବିଧାୟକମାନେ ଏଭଳି କାର୍ଯ୍ୟକୁ ପ୍ରୋତ୍ସାହନ ଦେଉଥିବା ଅଭିଯୋଗ ହେଉଛି ।
ଢ଼େଙ୍କାନାଳ ଜିଲ୍ଲା ଓଡ଼ାପଡ଼ା ବ୍ଲକ୍ ଗୋପାଳପୁରର ଯେଉଁ କଳା ମୁଗୁନି ପଥର ଖଣିରେ ବିସ୍ଫୋରଣ ଘଟି ୨ ଶ୍ରମିକଙ୍କ ମୃତ୍ୟୁ ହୋଇଛି ସେହି ଖଣିର ମାଲିକ ହେଉଛନ୍ତି ମାନସ ରାଉତ । ପଥର ଉତ୍ତୋଳନ ପାଇଁ ତାଙ୍କର ଲାଇସେନ୍ସ ଥିଲା ନା ନାହିଁ, ଯଦି ଥିଲା କେତେ ଜାଗା ପାଇଁ ଅନୁମତି ଥିଲା ତାହା ତଦନ୍ତସାପେକ୍ଷ । ମାତ୍ର ବିସ୍ଫୋରଣ ବା ବ୍ଲାଷ୍ଟିଂ ପାଇଁ ଲାଇସେନ୍ସ ନ ଥିଲା ବୋଲି ଖଣିମନ୍ତ୍ରୀ ସ୍ପଷ୍ଟ କରିଛନ୍ତି ।
ଆମ ଅନୁସନ୍ଧାନ ଅନୁଯାୟୀ, ମାନସ ରାଉତ ଜଣେ କରିତକର୍ମା ବ୍ୟକ୍ତି । ଢ଼େଙ୍କାନାଳର ଜଣେ ପ୍ରଚଣ୍ଡ ପ୍ରଭାବଶାଳୀ ଖଣି ବ୍ୟବସାୟୀଙ୍କର ସେ ବାଲ୍ୟବନ୍ଧୁ । ବିଗତ ସରକାର ଅମଳରେ ଏହି ଖଣି ବ୍ୟବସାୟୀଙ୍କର ଫାର୍ମ ହାଉସ୍ କୁ ପ୍ରଭାବ ନେତାଙ୍କର ଯା ଆସ ହେଉଥିଲା । ଏହି ସମ୍ପର୍କରେ ମାନସ ରାଉତଙ୍କ ହାତ ବହୁତ ଲମ୍ବା । ସ୍ଥାନୀୟ ପ୍ରଶାସନ ଓ ପୁଲିସ ତାଙ୍କ ହାତମୁଠାରେ ବୋଲି କୁହାଯାଏ । ଏହାର ନିରପେକ୍ଷ ତଦନ୍ତ ହେଲେ ସବୁ ସତ ସାମନାକୁ ଆସିଯିବ ।
Good one. Keep it up..