ବଲାଙ୍ଗୀର ରାଜପରିବାରରେ ଘରୋଇ ହିଂସା !

ଭୁବନେଶ୍ୱର: ବଲାଙ୍ଗୀର ରାଜପରିବାର ଗୁମର ପଦାରେ ପଡ଼ିଛି । ଅନଙ୍ଗ ଉଦୟ ସିଂହଦେଓ ଓ ତାଙ୍କ ପରିବାର ବିରୋଧରେ ସାନବୋହୁ ଅଦ୍ରିଜା ମଞ୍ଜରୀ ସିଂହଦେଓ ସଙ୍ଗୀନ ଅଭିଯୋଗ ଆଣିଛନ୍ତି । ଡେରାଡୁନ୍ ପୁଲିସରେ ଏନେଇ ଏତଲା ଦେଇଥିବା ବେଳେ ଗଣମାଧ୍ୟମ ସାମନାରେ ତାଙ୍କ ନିର୍ଯ୍ୟାତନାର କାହାଣୀ ବର୍ଣ୍ଣନା କରିଛନ୍ତି । ସ୍ୱାମୀ ଓ ଶାଶୁ ଘର ଲୋକେ ତାଙ୍କୁ ମାଡ଼ପିଟ୍ କରି ଘରୁ ବାହାର କରିଦେଇଛନ୍ତି ଏବଂ ମାମଲାକୁ ଚପାଇବା ପାଇଁ ପୁଲିସ ଉପରେ ଚାପ ପକାଇଛନ୍ତି ବୋଲି ସେ ଅଭିଯୋଗ କରିଛନ୍ତି । ତାଙ୍କ ଜୀବନ ପ୍ରତି ବିପଦ ଥିବାରୁ ସୁରକ୍ଷା ଦେବାକୁ ଅଦ୍ରିଜା ପୁଲିସର ସହଯୋଗ ଲୋଡିଛନ୍ତି ।

ଅନଙ୍ଗ ଉଦୟ ସିଂହଦେଓଙ୍କ ସାନପୁଅ ଅର୍କେଶ ନାରାୟଣ ସିଂହଦେଓଙ୍କ ପତ୍ନୀ ହେଉଛନ୍ତି ଅଦ୍ରିଜା । ପୂର୍ବତନ ପ୍ରଧାନମନ୍ତ୍ରୀ ବିଶ୍ୱନାଥ ପ୍ରତାପ ସିଂହଙ୍କର ସେ ନାତୁଣୀ । ୨୦୧୭ ମସିହା ନଭେମ୍ବର ୨୩ ତାରିଖରେ ଅର୍କେଶଙ୍କ ସହ ତାଙ୍କର ବିବାହ ହୋଇଥିଲା । ସ୍ୱାମୀ ଅର୍କେଶଙ୍କୁ ରାଜନୀତିରେ ସହଯୋଗ କରିବା ସହ ବଲାଙ୍ଗୀର ଅଞ୍ଚଳର ବିଭିନ୍ନ ସାମାଜିକ ସାଂସ୍କୃତିକ କାର୍ଯ୍ୟକ୍ରମରେ ଯୋଗଦେଉଥିଲେ ।

ତେବେ ଅର୍କେଶ ଓ ଅଦ୍ରିଜାଙ୍କ ଦାମ୍ପତ୍ୟ ଜୀବନରେ ଝଡ଼ ସୃଷ୍ଟି ହୋଇଥିବା କିଛି ଗଣମାଧ୍ୟମରେ ଚର୍ଚ୍ଚା ହୋଇଥିଲେ ମଧ୍ୟ ବଲାଙ୍ଗୀର ରାଜପରିବାର କିମ୍ବା ଅଦ୍ରିଜାଙ୍କ ପକ୍ଷରୁ କିଛି ସ୍ପଷ୍ଟ ହୋଇପାରି ନ ଥିଲା । ଗତକାଲି ଅଦ୍ରିଜା ହଠାତ୍ ଗଣମାଧ୍ୟମ ସାମନାକୁ ଆସି ସ୍ୱାମୀ ଅର୍କେଶ, ଶ୍ୱଶୁର ଅନଙ୍ଗ ଉଦୟ, ଶାଶୁ ବିଜୟଲକ୍ଷ୍ମୀ ଦେବୀ, ଦେଢ଼ଶୁର କଳିକେଶ ଏବଂ ଯାଆ ମେଘନା ରାଣାଙ୍କ ବିରୋଧରେ ଶାରୀରିକ ଓ ମାନସିକ ନିର୍ଯ୍ୟାତନା ଅଭିଯୋଗ ଆଣିଥିଲେ । ବଲାଙ୍ଗୀର ଏବଂ ଡେରାଡୁନ୍ ପୁଲିସଠାରୁ ସହଯୋଗ ପାଉ ନ ଥିବାରୁ ସେ ଗଣମାଧ୍ୟମର ସାହାରା ନେବାକୁ ବାଧ୍ୟ ହେଲେ ବୋଲି କହିଥିଲେ ।

ସେ କହିଛନ୍ତି, ବିବାହ ପରଠାରୁ ଶ୍ୱଶୁର ଘର ଲୋକେ ତାଙ୍କୁ ନିର୍ଯ୍ୟାତନା ଦେଇ ଆସୁଥିଲେ । ରାଜପରିବାରର ଷ୍ଟାଫ୍ ଙ୍କୁ ଲଗାଇ ମାଡ଼ ମରାଯାଉଥିଲା । ତାଙ୍କ ବେଡରୁମ୍ ରେ ସିସିଟିଭି କ୍ୟାମେରା ଲଗାଯାଇ ପ୍ରାଇଭେସି ନଷ୍ଟ କରାଯାଉଥିଲା । ୨୦୧୯ ନିର୍ବାଚନ ବେଳେ ସ୍ୱାମୀ ଅର୍କେଶଙ୍କ ନିର୍ବାଚନ ଖର୍ଚ୍ଚ ପାଇଁ ଟଙ୍କା ଆଣିବାକୁ ଶ୍ୱଶୁର ଅନଙ୍ଗ ଉଦୟ ତାଙ୍କୁ ବାଧ୍ୟ କରିଥିଲେ । ତେବେ ରାଜପରିବାରର ମର୍ଯ୍ୟାଦା ଦୃଷ୍ଟିରୁ ସେବୁକୁ ମୁଣ୍ଡପାତି ସହିଯାଉଥିଲେ । ୨୦୧୯ରେ ସ୍ୱାମୀ ଅର୍କେଶ ବିଧାନସଭା ନିର୍ବାଚନ ହାରିବା ପରେ ସ୍ୱାମୀ-ସ୍ତ୍ରୀ ଦୁହେଁ ଅଧିକାଂଶ ସମୟ ଡେରାଡୁନ୍ ରେ ରହୁଥିଲେ ।

ଅଦ୍ରିଜା କହିଛନ୍ତି, ଗତବର୍ଷ ଜାନୁଆରୀ ମାସରେ ମୋ ମାଆଙ୍କର କ୍ୟାନସର୍ ଚିହ୍ନଟ ହୋଇଥିଲା । ସେଥିପାଇଁ ବିବ୍ରତ ଥିଲି । ଠିକ୍ ସେହି ସମୟରେ ସ୍ୱାମୀ ଓ ଶ୍ୱଶୁର ଘର ଲୋକେ ପଞ୍ଚାୟତ ନିର୍ବାଚନ ପ୍ରଚାର ପାଇଁ ବଲାଙ୍ଗୀର ଆସିବାକୁ ବାଧ୍ୟ କରିଥିଲେ । ବୋହୁ ହିସାବରେ ମୋର କର୍ତ୍ତବ୍ୟ ପାଳନ କରିଥିଲି ଏବଂ ରୋଗୀଣା ମା’ଙ୍କୁ ଡେରାଡୁନ୍ ରେ ଏକୁଟିଆ ଛାଡ଼ି ବଲାଙ୍ଗୀର ଆସିଥିଲି । ପଞ୍ଚାୟତ ନିର୍ବାଚନ ସରିଲା ପରେ ଆମ ଭିତରେ ସେମିତି କୌଣସି ସମସ୍ୟା ନ ଥିଲା । ମାତ୍ର ଅଗଷ୍ଟ ମାସରେ ହଠାତ୍ ଅର୍କେଶ ଛାଡ଼ପତ୍ର ଚାହିଁଥିଲେ । ବୁଝାମଣାରେ ଛାଡ଼ପତ୍ର ପାଇଁ ବାଧ୍ୟ କରିଥିଲେ । ମାତ୍ର ମୁଁ ନିଷ୍ପତ୍ତି ନେବା ଅବସ୍ଥାରେ ନ ଥିଲି । ଏହାପରେ ସମସ୍ତଙ୍କର ଅତ୍ୟାଚାର ବଢ଼ିଥିଲା । ସ୍ୱାମୀ ଅର୍କେଶ, ଘରେ କାମ କରୁଥିବା ହରି ସିଂହ ଓ ଅନ୍ୟମାନେ ମାଡ଼ମାରି ଘରୁ ବାହାର କରିଦେଇଥିଲେ ବୋଲି ସେ ଅଭିଯୋଗ କରିଛନ୍ତି ।

ତାଙ୍କ ଜୀବନ ପ୍ରତି ବିପଦ ଥିବାରୁ ସେ ୬ ମାସ ତଳେ ପୁଲିସରେ ଘରୋଇ ହିଂସା ଅଭିଯୋଗ ଆଣିଥିଲେ ମଧ୍ୟ କୋ÷ଣସି କାର୍ଯ୍ୟାନୁଷ୍ଠାନ ହେଉ ନ ଥିବା କହିଛନ୍ତି । ଶ୍ୱଶୁର ଘର ଲୋକେ ପ୍ରଭାବଶାଳୀ ହୋଇଥିବାରୁ ବଲାଙ୍ଗୀର ଓ ଉତ୍ତତ୍ତରାଖଣ୍ଡ ପୁଲିସ ଉପରେ ଚାପ ପକାଇ ମାମଲାକୁ ଚାପି ଦେବା ପାଇଁ ଉଦ୍ୟମ କରୁଥିବା ସେ ଅଭିଯୋଗ କରିଛନ୍ତି । ତେବେ ତାଙ୍କ ପ୍ରତି ହୋଇଥିବା ନିର୍ଯ୍ୟାତନା ବିରୋଧରେ ସେ ଅଲବତ୍ ଲଢ଼େଇ କରିବେ ଏବଂ ନ୍ୟାୟ ପାଇବେ ବୋଲି କହିଛନ୍ତି ।

ଅନ୍ୟପକ୍ଷରେ ଏହି ଅଭିଯୋଗ ଉପରେ ଅର୍କେଶ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । ଏହି ବ୍ୟକ୍ତିଗତ ମାମଲା କୋର୍ଟରେ ବିଚାରାଧୀନ ଥିବାରୁ ବିଶେଷ କିଛି କହିବି ନାହିଁ ବୋଲି ସେ କହିଥିଲା ବେଳେ ତାଙ୍କ ଶ୍ୱଶୁର ଜଣେ ଜମି ମାଫିଆ ଏବଂ ସେମାନଙ୍କ ଡିମାଣ୍ଡ ଫୁଲଫିଲ ନ ହେବାରୁ ଏହି ଅଭିଯୋଗ ଆଣିଥିବା କହିଛନ୍ତି । ଏହି ମର୍ମରେ ସେ ଡେରାଡୁନ୍ ଘରେ ଗଣ୍ଡଗୋଳର କିଛି ଭିଡିଓ ଜାରି କରିଛନ୍ତି । ଏହି ଭିଡିଓରେ ଅର୍କେଶଙ୍କ ସହ ତାଙ୍କ ଶ୍ୱଶୁର ପାଟିତୁଣ୍ଡ କରୁଥିଲା ବେଳେ ଅଦ୍ରିଜା, ତାଙ୍କ ଭଉଣୀ ଗୋଟିଏ ଘରର ତାଲା ପକାଉଛନ୍ତି ।