ଭୁବନେଶ୍ୱର: ଓଡ଼ିଶା ରାଜନୀତିରେ ଏବେ ସବୁଠୁ ଅଧିକ ଚର୍ଚ୍ଚାରେ ଥିବା ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଭି.କେ.ପାଣ୍ଡିଆନଙ୍କୁ ନେଇ ପୁଣି ହଲ୍ଲାଗୁଲ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ ସଚିବ ପାଣ୍ଡିଆନ ବାବୁଙ୍କୁ ଜିଲ୍ଲା ବୁଲିବା ପାଇଁ ପଠାଉଥିବା ସ୍ପଷ୍ଟ କରିଥିଲେ ମଧ୍ୟ ବିରୋଧୀ ଶିବିର ଏହାକୁ ଗ୍ରହଣ କରିନାହାନ୍ତି । ପାଣ୍ଡିଆନଙ୍କ ଜିଲ୍ଲା ଗସ୍ତକୁ ରାଜନୈତିକ କାର୍ଯ୍ୟକ୍ରମର ଆଖ୍ୟା ଦେଇ କେନ୍ଦ୍ର ସରକାରଙ୍କଠାରେ ଫେରାଦ ହୋଇଛନ୍ତି । କେନ୍ଦ୍ର କାର୍ମିକ ଓ ପ୍ରଶିକ୍ଷଣ ମନ୍ତ୍ରଣାଳୟ ଏହି ଅଭିଯୋଗକୁ ରାଜ୍ୟ ମୁଖ୍ୟ ଶାସନ ସଚିବଙ୍କ ପାଖକୁ ପଠାଇ ଉପଯୁକ୍ତ କାର୍ଯ୍ୟାନୁଷ୍ଠାନ ପାଇଁ ଚିଠି ଲେଖିଛନ୍ତି ।
ପାଣ୍ଡିଆନଙ୍କ ବିରୋଧରେ ଦୁଇ ପୂର୍ବତନ ବ୍ୟୁରୋକ୍ରାଟ୍ ବିଜେପି ସାଂସଦ ଅପରାଜିତା ଷଡ଼ଙ୍ଗୀ ଏବଂ କଂଗ୍ରେସ ନେତା ବିଜୟ ପଟ୍ଟନାୟକ ଏକଜୁଟ୍ ହୋଇଛନ୍ତି । ପାଣ୍ଡିଆନଙ୍କ ବିରୋଧରେ ଅପରାଜିତାଙ୍କ ରାସ୍ତା ଧରିଛନ୍ତି ଏହି ପୂର୍ବତନ ବସ୍ । ଉଭୟ ପୃଥକ ଭାବେ ଆଗପଛ ହୋଇ ଏହି ମାମଲା ଦିଲ୍ଲୀକୁ ନେଇଛନ୍ତି । ଶ୍ରୀ ପାଣ୍ଡିଆନ୍ ଅଲ ଇଣ୍ଡିଆ ସର୍ଭିସ୍ କଣ୍ଡକ୍ଟ ରୁଲ୍ ର ଉଂଲ୍ଲଘନ କରିଥିବା ଅଭିଯୋଗ କରି କେନ୍ଦ୍ର ସରକାରଙ୍କ କାର୍ମିକ ଓ ପ୍ରଶିକ୍ଷଣ(ଡିଓପିଟି) ମନ୍ତ୍ରଣାଳୟର ହସ୍ତକ୍ଷେପ ଲୋଡ଼ିଛନ୍ତି ।
ବିଜେପି ରାଜ୍ୟ ସଭାପତି ମନମୋହନ ସାମଲଙ୍କୁ ସାଙ୍ଗରେ ଧରି ଅପରାଜିତା ଗତ ୨୪ ତାରିଖ ଶନିବାର ଦିନ କେନ୍ଦ୍ର କାର୍ମିକ ରାଷ୍ଟ୍ରମନ୍ତ୍ରୀ ଡ. ଜିତେନ୍ଦ୍ର ସିଂହଙ୍କୁ ଭେଟି ଶ୍ରୀ ପାଣ୍ଡିଆନଙ୍କ ବିରୋଧରେ ଲିଖିତ ଅଭିଯୋଗ ଦେଇଥିଲେ । ପାଣ୍ଡିଆନଙ୍କର ଜିଲ୍ଲାଗସ୍ତ ଓ ସଭାସମିତି ଭାଷଣର ଭିଡିଓ କ୍ଲିପ୍ ଓ ଫଟୋକୁ ଏକ ପେନ୍ ଡ୍ରାଇଭ୍ ରେ ରଖି ସେଥିରେ ଗୁନ୍ଥିଥିଲେ । ସେଦିନ ଗଣମାଧ୍ୟମକୁ ଏହି ଖବର ଦିଆଯାଇ ନ ଥିଲା । ଅଭିଯୋଗ ଉପରେ ବିଭାଗ ପକ୍ଷରୁ କାର୍ଯ୍ୟାନୁଷ୍ଠାନ ଚିଠି କରାଇବା ପରେ ଯାଇ ଅପରାଜିତା ଆଜି ଗଣମାଧ୍ୟମକୁ ଖବର ଛାଡ଼ିଛନ୍ତି ।
ଆଜି ଅପରାଜିତାଙ୍କ ଟୁଇଟର ହାଣ୍ଡଲରୁ ଏ ସୂଚନା ମିଳିବାର କିଛି ସମୟ ପୂର୍ବରୁ ପୂର୍ବତନ ମୁଖ୍ୟ ଶାସନ ସଚିବ ତଥା କଂଗ୍ରେସ ପ୍ରଚାର କମିଟି ମୁଖ୍ୟ ବିଜୟ କୁମାର ପଟ୍ଟନାୟକ ଡିଓପିଟିକୁ ସମାନ ଅଭିଯୋଗ ଦେଇଥିଲେ । ଶ୍ରୀ ପାଣ୍ଡିଆନଙ୍କର ଜିଲ୍ଲାଗସ୍ତ ଉପରେ ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ସେ ତାଙ୍କ ଚିଠିରେ ଦାବି କରିଥିଲେ । ଗତକାଲି ଶ୍ରୀ ପଟ୍ଟନାୟକ ଏକ ପ୍ରେସ୍ ମିଟ୍ କରି ଏ ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ପ୍ରଶ୍ନ କରିଥିଲେ ।
