ଭୁବନେଶ୍ୱର: ଓଡ଼ିଶା ଖଣି ନିଗମ ସହ ଅନୁବନ୍ଧିତ କେନ୍ଦୁଝର ଗନ୍ଧମାର୍ଦ୍ଦନ ଲୋଡିଂ ଏଜେନ୍ସିରେ ଶହ ଶହ କୋଟି ଟଙ୍କାର ଆର୍ଥିକ ଅନିୟମିତା ଓ ଦୁର୍ନୀତି ଘଟଣାରେ ରାଜ୍ୟ ଯୁବ ବିଜେଡିର ଉପସଭାପତି ସୌମ୍ୟ ଶଙ୍କର ଚକ୍ର ଓରଫ ରାଜା ଚକ୍ରଙ୍କୁ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା(ଇଓଡବ୍ଲୁ) ଆଜି ଗିରଫ କରିଛି । ତାଙ୍କର ୪୨ଟି ବଡ଼ ଗାଡ଼ି ଜବତ କରାଯାଇଥିବା ବେଳେ କେନ୍ଦୁଝରରେ ଥିବା ଦୁଇଟି ପ୍ଲାଣ୍ଟ ସିଲ୍ କରାଯାଇଛି । ଆକାଉଣ୍ଟରେ ଥିବା ୨୫ ଲକ୍ଷ ଟଙ୍କା ଫ୍ରିଜ୍ କରାଯାଇଛି । ରାଜାଙ୍କର ବେଆଇନ କାରବାର ନେଇ ସାଂଘାତିକ ତଥ୍ୟ ସବୁ ସାମନାକୁ ଆସିଛି । କ୍ରାଇମବ୍ରାଞ୍ଚ ଡିଜି ବିନୟତୋଷ ମିଶ୍ର ଆଜି ଏକ ସାମ୍ବାଦିକ ସମ୍ମିଳନୀରେ ତାଙ୍କ କଳା ସାମ୍ରାଜ୍ୟର ଚିଠା ଖୋଲିଛନ୍ତି ।
ଗନ୍ଧମାର୍ଦ୍ଦନ ଲୋଡିଂ ଏଜେନ୍ସି ଓ ଟ୍ରାନ୍ସପୋର୍ଟିଂ କୋଅପରେଟିଭ୍ ସୋସାଇଟି ନାଁରେ କୋଟି କୋଟି ଟଙ୍କା ଖୋଳ କରିଦେଇଛନ୍ତି ରାଜା ଚକ୍ର । ୨୦୧୭-୧୮ରୁ ମାର୍ଚ୍ଚ ୨୦୨୪ ମସିହା ମଧ୍ୟରେ ଏଜେନ୍ସିର ଆୟ ଥିଲା ୧୮୫ କୋଟି ଟଙ୍କା । ମାତ୍ର ଆୟଠାରୁ ଏହା ବହୁ ଅଧିକ ହୋଇପାରେ ବୋଲି ଅନୁମାନ କରାଯାଉଛି ।
ପାରିପାଶ୍ୱିର୍କ ବିକାଶ ପାଇଁ ୩୪ କୋଟି ଖର୍ଚ୍ଚ ହୋଇଥିବା କାଗଜପତ୍ରରେ ଦର୍ଶାଯାଇଛି । କିନ୍ତୁ ସେଭଳି କୌଣସି କାର୍ଯ୍ୟ ବି ହୋଇନାହିଁ । ଏକଥା ସ୍ଥାନୀୟ ଅଞ୍ଚଳର ୨ ଜଣ ବିଡିଓ ସ୍ୱୀକାର କରିଛନ୍ତି । ସୁତରାଂ ସବୁତକ ଟଙ୍କା ହଡ଼ପ ହୋଇଛି ।
ଏଜେନ୍ସି ପାଇଁ ତେଲ ପକା ବାବଦରେ ମା କାଳୀ ନାମକ ପେଟ୍ରୋଲ ପମ୍ପକୁ ୯.୧ କୋଟି ଟଙ୍କା ପେମେଣ୍ଟ ହୋଇଥିବା ଦର୍ଶାଯାଇଛି । କିନ୍ତୁ ପେଟ୍ରୋଲ ପମ୍ପ ମାଲିକଙ୍କ କହିବାନୁଯାୟୀ ସବୁ ତେଲ ରାଜାଙ୍କ ଗାଡ଼ି ଓ ମେସିନାରୀରେ ପଡ଼ିଛି । ଗନ୍ଧମାର୍ଦ୍ଦନ ଏଜେନ୍ସି ପାଇଁ ଟଙ୍କାକର ବି ତେଲ ପଡ଼ିନାହିଁ ।
ଏଜେନ୍ସି ପକ୍ଷରୁ ୪ ବର୍ଷ ଭିତରେ ୩୩ କୋଟି ଟଙ୍କା ଦୁଇ ଗାଁ ଲୋକଙ୍କୁ ବଣ୍ଟା ହୋଇଛି । ତେବେ ଏହି ଟଙ୍କା ଲୋକଙ୍କୁ ସହାୟତା ପାଇଁ ନୁହେଁ, ବରଂ ନିଜ ବେଆଇନ କାମ ପାଇଁ ଲୋକଙ୍କ ସମର୍ଥନ ସକାଶେ ଦିଆଯାଇଛି । ଯେପରିକି ଅନ୍ୟ କୌଣସି ଲୋଡିଂ ଏଜେନ୍ସିକୁ ସେଠାରେ ପୂରାଇ ଦିଆଯିବନି ।
୭୪ କୋଟି ଟଙ୍କା ଲୋଡିଂ ଓ ଲେବର ପେମେଣ୍ଟ ବାବଦରେ ଖର୍ଚ୍ଚ ହୋଇଥିବା ଏଜେନ୍ସି ଖାତାରେ ଦର୍ଶାଯାଇଛି । କିନ୍ତୁ ଅସଲରେ ମଣିଷ ନୁହେଁ, ସବୁ କାମ ମେସିନରେ ହୋଇଛି । ଏପରି ଭାବେ ଶ୍ରମିକ ପାଉଣା ବାବଦ ସବୁ ଟଙ୍କା ହଡ଼ପ ହୋଇଛି ।
କୁହାଯାଉଛି, ଏଭଳି ଭାବେ ଶହ ଶହ କୋଟିର ବେଆଇନ କାରବାରରେ ଏକାକୀ ରାଜା ଚକ୍ର ସାମିଲ ନାହାନ୍ତି । ତାଙ୍କ ପଛରେ ପୂର୍ବ ସରକାରର ଏକାଧିକ ପ୍ରଭାବଶାଳୀ ନେତାଙ୍କର ପ୍ରଚ୍ଛନ୍ନ ଆଶୀର୍ବାଦ ଓ ସହଯୋଗ ଥିଲା । ରାଜାଙ୍କ ବର୍ଷ ବର୍ଷର ବେଆଇନ କାରବାର ପଛରେ ତକ୍ରାଳୀନ ଜିଲ୍ଲାପାଳ ଓ ଏସପିଙ୍କର ମଧ୍ୟ ସହଯୋଗ ଥିଲା ।
କ୍ରାଇମବ୍ରାଞ୍ଚ ଡିଜି ସିଧାସଳଖ ଏହାର କୌଣସି ଉତ୍ତର ଦେଇ ନ ଥିଲେ ମଧ୍ୟ ରାଜା ଚକ୍ର ଲିଙ୍କ୍ ର ଖୋଳତାଡ଼ ଜାରି ରହିଛି ବୋଲି ସୂଚନା ଦେଇଥିଲେ ।
ସୂଚନାଯୋଗ୍ୟ, ୧୧ଟି ଗାଁ ମିଶି ଗନ୍ଧମାର୍ଦ୍ଦନ ଲୋଡିଂ ଏଜେନ୍ସି କୋଅପରେଟିଭ୍ ସୋସାଇଟି ଗଠନ କରିଥିଲେ । ଲୋଡିଂ ଏଜେନ୍ସିରୁ ଲାଭ ଅର୍ଥ ଅଞ୍ଚଳର ବିକାଶରେ ଲଗାଇବା ଏହାର ଉଦ୍ଦେଶ୍ୟ ଥିଲା । ମାତ୍ର ଅସଲରେ କୋଟି କୋଟି ଟଙ୍କା ଖୋଳ କରିବାକୁ ଯୋଜନା ହୋଇଥିବା ତଦନ୍ତରୁ ଜଣାପଡ଼ିଛି ।
ଏହି ଆର୍ଥିକ ଅନିୟମିତତା ଘଟଣାରେ ଏଜେନ୍ସିର ପୂର୍ବତନ ସଭାପତି ମାନସ ରଞ୍ଜନ ବାରିକ ଓ ସମ୍ପାଦକ ଉତ୍କଳ ଦାସଙ୍କୁ ପୂର୍ବରୁ ଇଓଡବ୍ଲୁ ଗିରଫ କରିଥିଲା ।
ଗନ୍ଧମାର୍ଦ୍ଦନ ଲୋଡିଂ ଏଜେନ୍ସି କେଳେଙ୍କାରୀରେ ରାଜା ଚକ୍ରଙ୍କ ସହ ବିଜେଡିର ବହୁ ବଡ଼ବଡ଼ିଆଙ୍କ ସଂପୃକ୍ତି ଥିବା ସମସ୍ତଙ୍କର ସନେ୍ଦହ ହେଉଛି । କାରଣ ପ୍ରଣବ ପ୍ରକାଶ(ବବି) ଦାସଙ୍କର ସେ ଥିଲେ ଏକାନ୍ତ ଅନୁଗତ । ପାଣ୍ଡିଆନ୍-ବବି ଦାସଙ୍କ ଛତ୍ରଛାୟାରେ ରହି ସେ ଧରାକୁ ସରା ମଣୁ ନ ଥିଲେ । ବବି ଦାସଙ୍କର ଚେଲା ଭାବେ ବିଜେଡିରେ ତାଙ୍କୁ ସମସ୍ତେ ଜାଣନ୍ତି । ବବି ଧ’ କହିଲେ ରାଜା ଧାଆଁନ୍ତି । ବିଜେଡି ଆହୁରି ୫୦ ବର୍ଷ କ୍ଷମତାରେ ରହିବ ବୋଲି ଭାବିଦେଇଥିବାରୁ ଏହି ଗ୍ୟାଙ୍ଗ୍ ଇନ୍ଦ୍ରଚନ୍ଦ୍ର ମାନିବା ଅବସ୍ଥାରେ ନ ଥିଲେ ।
ବବିଙ୍କ ଅନୁପସ୍ଥିତିରେ ଆଉ ଜଣେ ପ୍ରଭାବଶାଳୀ ନେତାଙ୍କ ସହ ରାଜାଙ୍କର ନିୟମିତ ସାକ୍ଷାତ ହେଉଥିଲା । ନିର୍ଦ୍ଦିଷ୍ଟ ଭାବେ କଳିଙ୍ଗନଗରସ୍ଥିତ ଏକ ମଲ୍ ର ଉପର ମହଲାରେ ସେମାନେ ଗୋପନ ବୈଠକ କରୁଥିଲେ । ସେଠାରେ ବ୍ୟବସାୟିକ କାରବାର ସମ୍ପର୍କରେ ଆଲୋଚନା ହେଉଥିଲା ବୋଲି ଇଓଡବ୍ଲୁ ପାଖରେ ସୂଚନା ପହଞ୍ଚିଛି ।
ରାଜାଙ୍କ ସହିତ ପ୍ରଭାବଶାଳୀ ଗୋଷ୍ଠୀର ଏତେ ମଧୁର ସମ୍ପର୍କ ଥିଲା ଯେ ଗତ ନିର୍ବାଚନ ବେଳେ ତାଙ୍କୁ ଚିଲିକା ନିର୍ବାଚନମଣ୍ଡଳୀର ପର୍ଯ୍ୟବେକ୍ଷକ ଦାୟିତ୍ୱ ଦିଆଯାଇଥିଲା । ଦଳରେ ଅଭିଜ୍ଞ ନେତାମାନେ ସୁଯୋଗ ନ ପାଇ ଘରେ ମଶା ବାଡ଼ୋଉଥିବା ବେଳେ ରାଜା ଚକ୍ରଙ୍କ ଭଳି ରାଜନୀତିରେ ଅନାମଧ୍ୟେୟ ଯୁବକ ଉପକୂଳ ଓଡ଼ିଶାର ଏକ ଗୁରୁତ୍ୱପୂର୍ଣ୍ଣ ନିର୍ବାଚନମଣ୍ଡଳୀର ପର୍ଯ୍ୟବେକ୍ଷକ ଦାୟିତ୍ୱ ପାଇବା ପଛର ରହସ୍ୟ ଏବେ ସମସ୍ତଙ୍କୁ ମାଲୁମ୍ ପଡୁଛି ।
ରାଜାଙ୍କୁ ରିମାଣ୍ଡରେ ନେଇ ଅଧିକ ପଚରାଉଚୁରା କରିବାକୁ ଇଓଡବ୍ଲୁ ଯୋଜନା ରଖିଥିବାରୁ ଆଗକୁ କାହାରି ପାଳି ପଡ଼ିବ ତାହାକୁ ସମସ୍ତେ ଅପେକ୍ଷା କରିଛନ୍ତି ।
