ଭୁବନେଶ୍ୱର: ଭୁବନେଶ୍ୱର ‘ସମ୍ବାଦ’ ଅଫିସରେ ପଶିଛି ଇଓଡବ୍ଲୁ ଟିମ୍ । ଇଓଡବ୍ଲୁର ଏକ ୧୨ ଜଣିଆ ଟିମ୍ ଆଜି ଦିନ ପ୍ରାୟ ସାଢ଼େ ୧ଟା ବେଳେ ରସୁଲଗଡ଼ ଶିଳ୍ପାଞ୍ଚଳସ୍ଥିତ ସମ୍ବାଦ ଅଫିସରେ ପଶି ଛାନଭିନ୍ କରୁଛି । ଏହି ଟିମ୍ ରେ ଅଛନ୍ତି ୪ ଜଣ ଡିଏସପି ଏବଂ ୬ ଜଣ ଇନସପେକ୍ଟର । ସମ୍ବାଦ କର୍ମଚାରୀଙ୍କୁ ଠକେଇ ଓ ଜାଲିଆତି କରି ବ୍ୟାଙ୍କ ଋଣ ମାମଲାରେ ଏହି ଚଢ଼ଉ ହୋଇଛି ।
‘ସମ୍ବାଦ’ ମାଲିକ ତଥା ବିଧାୟକ ସୌମ୍ୟରଞ୍ଜନ ପଟ୍ଟନାୟକଙ୍କ ବିରୋଧରେ ଆସିଛି ଋଣ ଠକେଇ ଓ ଜାଲିଆତି ଭଳି ସଙ୍ଗୀନ ଅଭିଯୋଗ । ଜଣେ ପୂର୍ବତନ କର୍ମଚାରୀଙ୍କ ଅଭିଯୋଗ ଆଧାରରେ ଅର୍ଥନୈତିକ ଅପରାଧ ଶାଖା(ଇଓଡବ୍ଲୁ) ତାଙ୍କ ବିରୋଧରେ ଆଇପିସି ଦଫା ୫୦୬, ୪୬୭, ୪୬୮, ୪୭୧, ୪୨୦ ଓ ୧୨୦(ଖ)ରେ ମାମଲା ରୁଜୁ କରିଛି । ସଂସ୍ଥାର ମାନବ ସମ୍ବଳ(ଏଚଆର) ବିଭାଗ ମୁଖ୍ୟ ବୈଜୟନ୍ତୀ କରଙ୍କ ନାଁରେ ମଧ୍ୟ ସମାନ ଦଫା ଲାଗିଛି ।
ଗତକାଲି ଇଓଡବ୍ଲୁରେ ମାମଲା ରୁଜୁ ହେବା ପରେ ଛାନଭିନ୍ ଆରମ୍ଭ ହୋଇଥିଲା । ୧ ନମ୍ବର ଅଭିଯୁକ୍ତ ସୌମ୍ୟ ପଟ୍ଟନାୟକଙ୍କୁ ସମ୍ଭାବ୍ୟ ଜେରା ସଂକ୍ରାନ୍ତରେ କୌଣସି ସୂଚନା ମିଳି ନ ଥିବା ବେଳେ ଦୁଇ ନମ୍ବର ଅଭିଯୁକ୍ତ ବୈଜୟନ୍ତୀ କର ଇଓଡବ୍ଲୁ ହାଜିରା ନୋଟିସକୁ ମାନିନାହାନ୍ତି । ତେବେ ଖବରକାଗଜର ପ୍ରକାଶକ ତଥା ସିଇଓ କମଳାକାନ୍ତ ମହାପାତ୍ରଙ୍କୁ ସଂଧ୍ୟାରେ ଇଓଡବ୍ଲୁ ଅଫିସକୁ ଡକାଯାଇ ପ୍ରାୟ ତିନି ଘଣ୍ଟା କାଳ ଜେରା କରାଯାଇଥିଲା ।
ଆଗକୁ ଇଓଡବ୍ଲୁ କାର୍ଯ୍ୟାନୁଷ୍ଠାନ ଉପରେ ସମସ୍ତଙ୍କର ନଜର ଥିବା ବେଳେ ଆଜି ‘ସମ୍ବାଦ’ ଖବରକାଗଜର ପ୍ରଥମପୃଷ୍ଠାରେ ‘କଣ୍ଠରୋଧ କରିବାକୁ ଚାପ କୌଶଳ’ ଶୀର୍ଷକରେ ଏକ ଖବର ପ୍ରକାଶ ପାଇଛି । ସୌମ୍ୟ ଓ ତାଙ୍କ ସମୁଦି ତପନ ମହାନ୍ତିଙ୍କ ବିରୋଧରେ ଚାପ ପକାଇ ଇଓଡବ୍ଲୁ ମାମଲା କରାଯାଇଛି ବୋଲି ଏହି ଖବରରେ ଦାବି କରାଯାଇଛି । ୫-ଟି ସଚିବ ଭି.କେ.ପାଣ୍ଡିଆନଙ୍କ ବିରୋଧରେ ସମ୍ପାଦକୀୟ ଲେଖାଯିବାରୁ ପ୍ରତିଶୋଧ ପରାୟଣ ହୋଇ ସୌମ୍ୟଙ୍କ ଉପରେ ଦାଉ ସାଧିବା ଆରମ୍ଭ ହୋଇଥିବା କୁହାଯାଇଛି ।
ମୋଟାମୋଟି ଭାବେ ନିଜ ଖବରକାଗଜ ଜରିଆରେ ସୌମ୍ୟବାବୁ ଏହା ଜଣାଇବାକୁ ଚାହିଁଛନ୍ତି ଯେ ମୁଁ କି ମୋ ସମୁଦି କିଛି ଭୁଲ୍ କରିନୁ । ଆମକୁ ମିଥ୍ୟା ମାମଲାରେ ଫସାଇ ଦେବାକୁ ଷଡ଼ଯନ୍ତ୍ର ହୋଇଛି । ଆମକୁ ସମସ୍ତେ ସମର୍ଥନ କର । ଗଣମାଧ୍ୟମର କଣ୍ଠରୋଧ ଉଦ୍ୟମକୁ ବିରୋଧ କର ।
ତେବେ ନିର୍ଦ୍ଦିଷ୍ଟ ଭାବେ ଋଣ ଠକେଇ ଓ ଜାଲିଆତି ମାମଲାକୁ ନେଇ ସୌମ୍ୟବାବୁ କେତେ ବିଚଳିତ ତାହା ସେହି ଖବରରେ ଦେଖିବାକୁ ମିଳିଛି । ସତ ଘଟଣା ଆପେ ବାହାରି ଆସିଛି । ଅଭିଯୋଗକାରୀଙ୍କ ଉପରେ ଚାପ ପକାଇ ଇଓଡବ୍ଲୁରେ ମିଛ ମାମଲା କରାଯାଇଥିବା ପ୍ରଥମେ ଉଲ୍ଲେଖ କରାଯାଇଥିବା ବେଳେ ବହୁ ବର୍ଷ ପୂର୍ବରେ କରାଯାଇଥିବା ଋଣ( ଯାହାକୁ ସୁଝା ସରିଛି) ସଂକ୍ରାନ୍ତୀୟ ଏକ ଘଟଣାକୁ ଉଦ୍ଦେଶ୍ୟମୂଳକ ଭାବେ ଆଗକୁ ଅଣାଯାଇଥିବା କୁହାଯାଇଛି ।
ତେବେ ଏହି ଋଣ କ’ଣ ଓ କାହିଁକି ତାହା ଏହି ଖବରରେ ଚାପି ଦିଆଯାଇଛି । କିନ୍ତୁ କର୍ମଚାରୀଙ୍କ ନାଁରେ ଋଣ କରାଯାଇଥିଲା ବୋଲି ପ୍ରକାରାନ୍ତରେ ସ୍ୱୀକାର କରାଯାଇଛି । ତେବେ ସେଥିରେ ମାଲିକଙ୍କୁ ନିଦେ୍ର୍ଦାଷ ଦେଖାଇବା ପାଇଁ ଗୋଟିଏ ଧାଡ଼ି ସଫେଇ ଦିଆଯାଇଛି । କର୍ମଚାରୀଙ୍କ ଋଣ ପଛରେ ସୌମ୍ୟରଞ୍ଜନଙ୍କର କୌଣସି ଭୂମିକା ନ ଥିଲା ବୋଲି କୁହାଯାଇଛି ।
ସାଧାରଣରେ ହେଉଥିବା ଚର୍ଚ୍ଚା ଅନୁଯାୟୀ, ତାହାହେଲେ କ’ଣ ସୌମ୍ୟବାବୁଙ୍କ ଅଜାଣତରେ ତାଙ୍କ କର୍ମଚାରୀଙ୍କ ନାଁରେ ବ୍ୟାଙ୍କ ଋଣ ଉଠାଯାଇଥିଲା । ସୌମ୍ୟ କ’ଣ ତାଙ୍କ ସହଯୋଗୀଙ୍କ ଉପରକୁ ଦୋଷ ଖସାଇବାକୁ ଚାହିଁଛନ୍ତି କି?
ସେପଟେ ସୌମ୍ୟଙ୍କ ଝିଅ ତଥା କନକ ଟିଭି ନିର୍ଦ୍ଦେଶିକା ତନୟା ପଟ୍ଟନାୟକ ସୋସିଆଲ୍ ମିଡିଆରେ ବାପାଙ୍କ ସମର୍ଥନ ଯୋଗାଡ଼ରେ ବାହାରିଛନ୍ତି । ୫-ଟି ସଚିବ ପାଣ୍ଡିଆନଙ୍କୁ ସେ ଟାର୍ଗେଟ୍ କରି ଅନେକ କଥା ଲେଖିଛନ୍ତି । ତେବେ ତାଙ୍କୁ ଅନେକ ପ୍ରଶ୍ନବାଣର ସମ୍ମୁଖୀନ ହେବାକୁ ପଡ଼ିଛି ।
ସୂଚନାଯୋଗ୍ୟ, ସମ୍ବାଦ ଋଣ ଘୋଟାଲା ପଦାକୁ ଆଣିଥିବା ଅଭିଯୋଗକାରୀ ପୂର୍ବତନ କର୍ମଚାରୀଜଣଙ୍କ ଆଜି ଗଣମାଧ୍ୟମରେ ମୁହଁ ଖୋଲି ସମ୍ବାଦରେ ତାଙ୍କ ନିର୍ଯ୍ୟାତନାର କାହାଣୀ ବର୍ଣ୍ଣନା କରିଛନ୍ତି । ସେଠି ଋଣ କାଗଜରେ ଦସ୍ତଖତ କରିବାକୁ ମନା କଲେ କିଭଳି ଚାକିରି ଚାଲିଯିବାର ଧମକ ଦିଆଯାଏ ବର୍ଣ୍ଣନା କରିଛନ୍ତି । ଖାଲି ସେତିକି ନୁହେଁ ଉପରିସ୍ଥ ଅଧିକାରୀଙ୍କୁ ତେଲ ମାରି ନ ପାରିଲେ କିଭଳି ଦହଗଞ୍ଜ ଓ ନିର୍ଯ୍ୟାତିତ ହେବାକୁ ପଡ଼େ ସେକଥା ବି କହିଛନ୍ତି । ସୌମ୍ୟବାବୁ ଯାହା କହନ୍ତି ଆଚରଣରେ ସମ୍ପୂର୍ଣ୍ଣ ଓଲଟା ବୋଲି ସେ କହିଛନ୍ତି ।
