ଭୁବନେଶ୍ୱର: କ୍ୟାପିଟାଲ୍ ଥାନାରେ ଆଜି ହାଜର ହୋଇଥିଲେ ପୂର୍ବତନ ଆଇଟି ସଚିବ ମନୋଜ ମିଶ୍ର । ୪ ଦିନ ଆଗରୁ ସେ ଥାନାରେ ହାଜର ହୋଇ ପୁଲିସ ତଦନ୍ତର ସାମନା କରିଛନ୍ତି । ମାମଲାର ତଦନ୍ତକାରୀ ଅଧିକାରୀ ତାଙ୍କୁ ବିଭିନ୍ନ ପ୍ରଶ୍ନ ପଚାରିଥିଲେ । ମୁଖ୍ୟମନ୍ତ୍ରୀଙ୍କ ଦପ୍ତରରୁ ଦୁଇଟି ଫାଇଲ୍ ଗାଏବ ମାମଲାରେ କମିଶନରେଟ୍ ପୁଲିସ ପକ୍ଷରୁ ତାଙ୍କୁ ଏବଂ ତତ୍କାଳୀନ ମୁଖ୍ୟମନ୍ତ୍ରୀଙ୍କ ପୂର୍ବତନ ପ୍ରମୁଖ ସଚିବ ତଥା ଅବସରପ୍ରାପ୍ତ ଆଇଏଏସ୍ ରାଜେଶ ବର୍ମାଙ୍କୁ ୩ ଦିନ ତଳେ ସମନ୍ ଜାରି କରାଯାଇଥିଲା । ୨୨ ତାରିଖ ଦିନ ୧୧ଟାରେ କ୍ୟାପିଟାଲ ଥାନାରେ ହାଜର ହେବାକୁ କୁହାଯାଇଥିଲା ।
୨୦୦୮ରେ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ହତ୍ୟା ଏବଂ କନ୍ଧମାଳ ଦଙ୍ଗା ମାମଲାରେ ଜଷ୍ଟିସ୍ ଏ.ଏସ୍. ନାଇଡୁ ତଦନ୍ତ କମିସନ ରିପୋର୍ଟ ଏବଂ ୨୦୧୬ରେ ସମ୍ ହସ୍ପିଟାଲ୍ ଅଗ୍ନିକାଣ୍ଡ ଘଟଣାର ଆରଡିସି ତଦନ୍ତ ରିପୋର୍ଟ ମୁଖ୍ୟମନ୍ତ୍ରୀଙ୍କ ଅଫିସରୁ ଗାଏବ ହୋଇଯାଇଥିବା ଅଭିଯୋଗ ହୋଇଛି । ରାଜ୍ୟ ସରକାରଙ୍କ ଗୃହ ବିଭାଗ ପକ୍ଷରୁ ଯୁଗ୍ମ ସଚିବ ଶରତ ଚନ୍ଦ୍ର ମାରାଣ୍ଡି ଏ ନେଇ ଜୁନ୍ ୧୦ରେ କ୍ୟାପିଟାଲ ଥାନାରେ ଏତଲା ଦେଇଛନ୍ତି । ଏତଲା ଆଧାରରେ କ୍ୟାପିଟାଲ ଥାନା ଗୃହ ବିଭାଗକୁ ଯାଇ ତନାଘନା କରିଥିଲେ । ଏହା ପରେ ଦୀର୍ଘ ମାସେ କାଳ ଚୁପ୍ ରହିବା ପରେ ପୁଲିସ ପକ୍ଷରୁ ଜୁଲାଇ ୧୬ରେ ତତ୍କାଳୀନ ମୁଖ୍ୟମନ୍ତ୍ରୀଙ୍କ ଦପ୍ତରର ସଂପୃକ୍ତ ଦୁଇ ପୂର୍ବତନ ବରିଷ୍ଠ ଅଧିକାରୀଙ୍କୁ ସମନ୍ ପଠାଯାଇଥିଲା ।
ତଦନ୍ତରେ ପୁଲିସକୁ ସମ୍ପୂର୍ଣ୍ଣ ସହଯୋଗ କରାଯାଉଛି ବୋଲି କ୍ୟାପିଟାଲ ଥାନାରୁ ଫେରିଲା ପରେ ପ୍ରତିକ୍ରିୟା ଦେଇଛନ୍ତି ପୂର୍ବତନ ଆଇଟି ସଚିବ ଶ୍ରୀ ମିଶ୍ର । ତଦନ୍ତ ଚାଲୁଥିବାରୁ ଅଧିକ କିଛି କହିବାକୁ ସେ ମନା କରିଥିଲେ । ଆସନ୍ତା ୨୨ ତାରିଖରେ ଅବସରପ୍ରାପ୍ତ ଆଇଏଏସ୍ ରାଜେଶ ବର୍ମା ହାଜର ହେବେ ବୋଲି କ୍ୟାପିଟାଲ୍ ଥାନା ଆଇଆଇସି କହିଛନ୍ତି ।
