ମନୀଷଙ୍କୁ ସାଙ୍ଗମାନେ ମାରି ପୋଖରୀରେ ଫିଙ୍ଗିଦେଇଥିଲେ !

ଭୁବନେଶ୍ୱର: ବହୁ ଚର୍ଚ୍ଚିତ ମନୀଷ ଅନୁରାଗ ଦାସ ମୃତ୍ୟୁ ରହସ୍ୟର ଖୁଲାସା କରିଛି ପୁଲିସ । ହୋଟେଲ ବିଲ୍ ପେମେଣ୍ଟକୁ ନେଇ ମନୀଷଙ୍କ ସହ ତିନି ବନ୍ଧୁଙ୍କ ଝଗଡ଼ାରୁ ଏହି ହତ୍ୟାକାଣ୍ଡ ଘଟିଥିବା ଭୁବନେଶ୍ୱର ଡିସିପି ଉମାଶଙ୍କର ଦାଶ କହିଛନ୍ତି । ହତ୍ୟା କରିବା ପରେ ପ୍ରମାଣ ନଷ୍ଟ କରିବାକୁ ବନ୍ଧୁମାନେ ମନୀଷଙ୍କୁ ପାତ୍ରପଡ଼ା ଗାଁ ପୋଖରୀରେ ଫିଙ୍ଗିଦେଇଥିଲେ । ତିନି ମୁଖ୍ୟ ଅଭିଯୁକ୍ତ ଭୁବନେଶ୍ୱରର ଅମ୍ରିତ୍ ବିଶ୍ୱାଳ, କନ୍ଧମାଳର ଦିନେଶ ମହାପାତ୍ର ଏବଂ ମୃତ୍ୟୁଞ୍ଜୟ ମିଶ୍ରଙ୍କୁ ପୁଲିସ ଗିରଫ କରିଛି । ସେମାନଙ୍କ ବିରୋଧରେ ୩୦୨, ୨୦୧, ୩୬୪(ଏ) ଏବଂ ୩୪ ଆଇପିସି ଧାରାରେ ମାମଲା ରୁଜୁ ହୋଇଛି । ରିମାଣ୍ଡରେ ଆଣି ସେମାନଙ୍କୁ ଅଧିକ ପଚରାଉଚୁରା କରିବାକୁ ପୁଲିସ ଯୋଜନା କରିଛି ।

ଡିସିପି ଶ୍ରୀ ଦାଶଙ୍କ ସୂଚନା ଅନୁଯାୟୀ ୯ ତାରିଖ(ଶନିବାର) ସଂଧ୍ୟାରେ ମନୀଷ, ମନୀଷଙ୍କ ବନ୍ଧୁ ଅମ୍ରିତ ଏବଂ ଅମ୍ରିତ୍ ଙ୍କ ଦୁଇବନ୍ଧୁ ଦିନେଶ ଏବଂ ମୃତ୍ୟୁଞ୍ଜୟ ପ୍ରଥମେ ଲକ୍ଷ୍ମୀସାଗର ଅଞ୍ଚଳକୁ ଯାଇଥିଲେ । ପରେ ବିଳମ୍ବିତ ରାତିରେ ପାତ୍ରପଡ଼ାସ୍ଥିତ ଏକ ହୋଟେଲକୁ ଆସିଥିଲେ । ସେଠାରେ ହୋଟେଲ(ବାର୍) ବିଲ୍ ପେମେଣ୍ଟକୁ ନେଇ ମନୀଷଙ୍କ ସହ ସେମାନଙ୍କର ଝଗଡ଼ା ହୋଇଥିଲା । ହୋଟେଲରୁ ବାହାରିଲା ପରେ ମନୀଷଙ୍କୁ ତିନି ବନ୍ଧୁ ଆକ୍ରମଣ କରିଥିଲେ । ସେମାନଙ୍କ ଆକ୍ରମଣ ଓ ଠେଲାପେଲାରେ ମନୀଷଙ୍କର ମୃତ୍ୟୁ ହୋଇଥିଲା ।

ପ୍ରମାଣ ନଷ୍ଟ ପାଇଁ ମୃତ ଶରୀରକୁ ତିନି ସାଙ୍ଗ ପୋଖରୀରେ ଫିଙ୍ଗି ଦେଇଥିଲେ । ଅମ୍ରିତ, ଦିନେଶ ଏବଂ ମୃତ୍ୟୁଞ୍ଜୟ ହିଁ ମାମଲାରେ ମୁଖ୍ୟ ଅଭିଯୁକ୍ତ ବୋଲି ଡିସିପି କହିଛନ୍ତି । ଏହି ମାମଲାର ଜଣେ ପ୍ରତ୍ୟକ୍ଷଦର୍ଶୀ ଅଛନ୍ତି ଏବଂ ତିନି ବନ୍ଧୁ ବ୍ୟବହାର କରିଥିବା ଗାଡ଼ିଟି ଜବତ ହୋଇଛି । ଏହି ମାମଲାରେ ଆଉ କାହାର ସଂପୃକ୍ତି ଅଛି ନା ନାହିଁ ତାହା ତଦନ୍ତ ଚାଲିଥିବା ଡିସିପି କହିଛନ୍ତି ।

ତଥାପି ଅନେକ ପ୍ରଶ୍ନ

ବରିଷ୍ଠ ସାମ୍ବାଦିକ ନବୀନ ଦାସଙ୍କ ବଡ଼ପୁଅ ହେଉଛନ୍ତି ମନୀଷ ଓରଫ ଗୁଡ୍ଡୁ । ମନୀଷଙ୍କୁ ତାଙ୍କ ସାଙ୍ଗମାନେ ଭୋଜି କରିବାକୁ ଡାକି ନେଇ ହତ୍ୟା କରିଥିବା ଶ୍ରୀ ଦାସ ପ୍ରଥମରୁ ଅଭିଯୋଗ କରିଥିଲେ । ସପ୍ତାହେ ବ୍ୟାପୀ ତଦନ୍ତ ପରେ ଡିସିପି ଏକ ସାମ୍ବାଦିକ ସମ୍ମିଳନୀରେ ଏହାର ଖୁଲାସା କରିଛନ୍ତି । ତେବେ ପୁଲିସ ଥିଓରୀକୁ ଅନେକ ଗ୍ରହଣ କରିପାରୁନାହାନ୍ତି । ସେମାନଙ୍କ ପାଇଁ କିଛି ପ୍ରଶ୍ନ ଅସମାହିତ ରହିଯାଇଛି ।

ସଂଧ୍ୟାରୁ ମଧ୍ୟରାତ୍ର ପର୍ଯ୍ୟନ୍ତ ଚାରି ସାଙ୍ଗ ଦୁଇ ଦୁଇଟି ବାର୍ ରେ ବସି ମଉଜ ମସ୍ତି କଲେ । ହେଲେ ୭/୮ ହଜାର ଟଙ୍କାର ହୋଟେଲ୍ ବିଲ୍ ପାଇଁ ସାଙ୍ଗମାନଙ୍କ ସହ ବଚସାରୁ ମନୀଷ ମର୍ଡର ହୋଇଥିବା କଥାକୁ ବିଶ୍ୱାସ କରିପାରୁନାହାନ୍ତି । ମନୀଷ ତାଙ୍କ ଘରକୁ ଶେଷ ଥର ପାଇଁ ରାତି ୪.୧୧ ମିନିଟ୍ ରେ ଫୋନ୍ କରିଥିଲେ । ଅର୍ଥାତ୍ ଏହା ପରେ ତାଙ୍କୁ ମର୍ଡର କରାଯାଇ ପାତ୍ରପଡ଼ା ଗାଁ ପୋଖରୀରେ ଫିଙ୍ଗାଯାଇଥିବ । ମାତ୍ର ରାତି ୪ଟା ନ ହେଉଣୁ ଫୁଲ ତୋଳିବା, ମର୍ଣ୍ଣିଂ ୱାକ୍ ଏବଂ ପୋଖରୀରେ ଗାଧୋଇବା ପାଇଁ ସବୁଦିନ ଲୋକଙ୍କ ଗହଳି ହେଉଥିବାରୁ ଏଭଳି ଘଟଣା ଘଟିବା ଅସମ୍ଭବ ବୋଲି ସେମାନଙ୍କର ମତ । ନିର୍ଦ୍ଦିଷ୍ଟ ଭାବେ କେଉଁ ଜାଗାରେ ତାଙ୍କୁ ହତ୍ୟା କରାଯାଇଛି ପୁଲିସ ତାହା ସ୍ପଷ୍ଟ କରୁ ବୋଲି ସ୍ଥାନୀୟ ଅଞ୍ଚଳ ବାସିନ୍ଦାମାନେ ବି କହିଛନ୍ତି ।

ଅନ୍ୟପକ୍ଷରେ ସାଙ୍ଗମାନଙ୍କ ଆକ୍ରମଣରେ ମନୀଷଙ୍କର ମୃତ୍ୟୁ ହୋଇଥିବା ପୁଲିସ କହୁଥିଲା ବେଳେ ତାଙ୍କ ଶରୀରରେ କୌଣସି କ୍ଷତ ଚିହ୍ନ ନ ଥିଲା । ଏହା କେମିତି ସମ୍ଭବ ବୋଲି କୁହାଯାଉଛି । ମନୀଷଙ୍କ ମୋବାଇଲ୍ ର ସନ୍ଧାନ ଏ ଯାଏଁ ମିଳୁ ନ ଥିବାରୁ ତାହା ବି ସନ୍ଦେହ ସୃଷ୍ଟି କରୁଛି । ସେଦିନ ରାତିରେ ସାଉଥ ସିଟି ହୋଟେଲରୁ ବାହାରୁଥିବା ମନୀଷଙ୍କ ଆଗେ ଆଗେ ଯାଉଥିବା ସେଇ ଯୁବତୀ ଜଣଙ୍କ କିଏ ତାହା ମଧ୍ୟ ପୁଲିସ ସ୍ପଷ୍ଟ କରିବାକୁ ଦାବି ହେଉଛି । ଶେଷରେ ଏହା ଉଦ୍ଦେଶ୍ୟମୂଳକ ହତ୍ୟା ନା ନୁହେଁ ତାହା ମଧ୍ୟ ସ୍ପଷ୍ଟ ହେବା ଦରକାର ।