ଭୁବନେଶ୍ୱର: ଜଣେ ଅସାଧୁ ସହକାରୀ ଯନ୍ତ୍ରୀ କେତେ ଉପୁରି କମାଇ ପାରନ୍ତି ତାହାର ଉଦାହରଣ ହେଉଛନ୍ତି କାର୍ତ୍ତିକେଶ୍ୱର ରାଉଳ । ଦ୍ୱିତୀୟ ପତ୍ନୀଙ୍କୁ ରଖୁଥିବା ଘରୁ ନଗଦ ୨ କୋଟିରୁ ଅଧିକ ଟଙ୍କା ମିଳିଥିଲା । ଏବେ ସେହି ପତ୍ନୀଙ୍କ ଭଉଣୀ ଘରୁ ମିଳିଛି ଆଉ ୧ କୋଟି ୪୧ ଲକ୍ଷ ୬୨ ହଜାର ୪୦୦ ଟଙ୍କା । ଏହାକୁ ମିଶାଇଲେ ରାଉଳଙ୍କର ଠାବ ହୋଇଥିବା ନଗଦ ଟଙ୍କା ପରିମାଣ ହେଉଛି ୩ କୋଟି ୪୧ ଲକ୍ଷ ୬୬ ହଜାର ୨୮୦ ଟଙ୍କା । ଦୁର୍ନୀତିରେ ରେକର୍ଡ କରିଛନ୍ତି ଏହି ବାବୁ ।
ଭିଜିଲାନସ୍ ନଜର ହଟାଇବା ପାଇଁ ସାଲିଆସାହି ହାତିଆଶୁଣିବସ୍ତିର ଏକ ଝୁମ୍ପୁଡ଼ି ଘରେ ରହି ନିର୍ମାଣ ଶ୍ରମିକ କାମ କରୁଥିବା ଶାଳୀଙ୍କ ଘରେ ଏହି ଟଙ୍କା ଲୁଚାଇ ରଖିଥିଲେ ରାଉଳ । ଆଜି ସକାଳୁ ଭିଜିଲାନସ୍ ଟିମ୍ ଚଢ଼ାଉ କରି ଏକ ବ୍ୟାଗ୍ ରୁ ଟଙ୍କା ବିଡ଼ା ସବୁ ଜବତ କରିଛି ।
ଭଞ୍ଜନଗର କ୍ଷୁଦ୍ର ଜଳସେଚନ ବିଭାଗର ସହକାରୀ ଯନ୍ତ୍ରୀ କାର୍ତ୍ତିକେଶ୍ୱର ରାଉଳଙ୍କୁ ଗତକାଲି ଭିଜିଲାନସ୍ ଗିରଫ କରିଥିଲା । କୋର୍ଟରେ ଜାମିନ୍ ନାମଞ୍ଜୁର ହେବାରୁ ଝାରପଡ଼ା ଜେଲ୍ ହାଜତରେ ପଶିଛନ୍ତି । ଦୁଇଦିନ ଧରି ଚଢ଼ଉରେ ତାଙ୍କର ୫ କୋଟିରୁ ଉଦ୍ଧ୍ୱର୍ ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ଠାବ ହୋଇଥିଲା । ଯାହା ତାଙ୍କ ଆୟଠାରୁ ୭୪୧ ଗୁଣ ଅଧିକ ବୋଲି ଭିଜିଲାନସ୍ ପକ୍ଷରୁ କୁହାଯାଇଥିଲା । ତାଙ୍କର ସମ୍ପତ୍ତି ଆହୁରି ଅଧିକ ହେବ ବୋଲି ମଧ୍ୟ ଅନୁମାନ କରାଯାଇଥିଲା ।
କାର୍ତ୍ତିକେଶ୍ୱରଙ୍କ ଦ୍ୱିତୀୟ ପତ୍ନୀ କଳ୍ପନା ପ୍ରଧାନ ରହୁଛନ୍ତି କଳିଙ୍ଗବିହାରସ୍ଥିତ ଟାଟା ଆରିଆନା ଫ୍ଲାଟ୍ ରୁମ୍ ନଂ ୦୫୦୫ରେ । ଅଫିସ୍ ରୁ ଯାହା ମାରି ଆଣୁଥିଲେ ସେଥିରୁ ସିଂହଭାଗ ଏହି ଦ୍ୱିତୀୟ ପତ୍ନୀଙ୍କ ପାଖରେ ଠୁଳ କରୁଥିଲେ । ଗତ ୭ ତାରିଖ ସଂଧ୍ୟାରେ ଭିଜିଲାନସ୍ ଟିମ୍ ଏହି ଘରେ ଚଢ଼ାଉ କରିଥିଲା । ଗୋଟିଏ ବ୍ୟାଗ୍ ରେ ୨ କୋଟିରୁ ଅଧିକ ନଗଦ ଟଙ୍କା ସହ ୫୮୦ ଗ୍ରାମ ଓଜନର ୨୦ ଟି ସୁନା ବିସ୍କୁଟ୍ ର ସନ୍ଧାନ ପାଇଥିଲା ଭିଜିଲାନସ୍ । ଆହୁରି ଅଧିକ ପୋତାଧନ ସନ୍ଦେହ କରି କଳ୍ପନାଙ୍କୁ ଜେରା କରାଯାଇଥିଲା । ଏହି ଜେରା ବେଳେ କଳ୍ପନା ସାଲିଆସାହିରେ ରହୁଥିବା ଭଉଣୀ ଘରର ଠିକଣା ଦେଇଥିଲେ ।
