ଭୁୁବନେଶ୍ୱର: ନୂଆପଡ଼ାରେ କଂଗ୍ରେସ ହାରିଛି ସତ ହେଲେ ପ୍ରାର୍ଥୀ ଘାସିରାମ ମାଝୀ ହାରିନାହାନ୍ତି । ନୂଆପଡ଼ାର ଯୋଗ୍ୟ ପ୍ରାର୍ଥୀ ଭାବେ ତାଙ୍କୁ ବିଚାର କରାଯାଉଛି । ଜନସାଧାରଣଙ୍କ ସହ ନିରନ୍ତର ଭାବେ ସୁସମ୍ପର୍କ ରକ୍ଷା କରିବାରେ ସେ ନୂଆପଡ଼ାର ଅପ୍ରତିଦ୍ୱନ୍ଦୀ ନେତା । ଚଳିତ ଉପନିର୍ବାଚନରେ ତାଙ୍କର ଏକନିଷ୍ଠ ଉଦ୍ୟମ ଏବଂ ଲଢ଼ୁଆ ମନୋବୃତ୍ତିକୁ ସବୁଆଡୁ ସାବାସୀ ମିଳିଛି । ଡବଲ ଇଞ୍ଜିନ୍ ଦଳ ଓ କଳକୁ ମୁକାବିଲା କରିବା ତାଙ୍କ ସାମର୍ଥ୍ୟର ବାହାରେ ଥିଲା ବେଳେ ପୁରୁଣା ଶକ୍ତିଶାଳୀ ବିଜେଡିକୁ ପଛରେ ପକାଇବା ତାଙ୍କ ଲୋକପ୍ରିୟତାର ପ୍ରମାଣ ଦେଇଛି ।
ଓକିଲାତିକୁ ବୃତ୍ତ କରିଥିବା ଘାସିରାମ ମାଝୀ ନୂଆପଡ଼ା ରାଜନୀତିରେ ଜଣେ ପୁରୁଣା ଖେଳୁଆଡ଼ । ସାଂଗଠନିକ ଶକ୍ତି ସମ୍ପନ୍ନ ଲୋକପ୍ରିୟ ଆଦିବାସୀ ନେତା । ୨୦୦୯ ରେ ସେ ମାୟାବତୀଙ୍କ ବହୁଜନ ସମାଜବାଦୀ ପାର୍ଟି(ବିଏସପି)ରୁ ନିର୍ବାଚନ ଲଢ଼ି ୧୭,୮୨୩ ଭୋଟ ସହ ଚତୁର୍ଥ ସ୍ଥାନରେ ଥିଲେ । ୨୦୧୪ରେ କଂଗ୍ରେସ ଟିକେଟରେ ଲଢ଼ି ୩୯, ୬୫୪ ଭୋଟ ସହ ତୃତୀୟ ସ୍ଥାନରେ ଥିଲେ । ୨୦୧୯ରେ ପୁନର୍ବାର କଂଗ୍ରେସରୁ ଲଢ଼ିଥିଲେ ଏବଂ ୪୫,୩୧୭ ଭୋଟ ପାଇ ଦ୍ୱିତୀୟ ସ୍ଥାନରେ ଥିଲେ । ୨୦୨୪ ନିର୍ବାଚନରେ ତକ୍ରାଳୀନ ପିସିସି ସଭାପତି ଶରତ ପଟ୍ଟନାୟକ ନିର୍ବାଚନ ଲଢ଼ିବାରୁ ସେ ସ୍ୱାଧୀନ ଭାବରେ ଲଢ଼ିଥିଲେ ଏବଂ ୫୦,୯୪୧ ଭୋଟ ସହ ଦ୍ୱିତୀୟ ସ୍ଥାନରେ ଥିଲେ । ଶରତ ୧୫ ହଜାର ଭୋଟରେ ରହିଗଲେ ।
ଚଳିତ ଉପନିର୍ବାଚନରେ ଘାସିରାମଙ୍କୁ ପ୍ରାର୍ଥୀ କରିଥିଲା କଂଗ୍ରେସ । ବିଜେପିର ଜୟ ଢ଼ୋଲକିଆ ଏବଂ ବିଜେଡିର ସ୍ନେହାଙ୍ଗିନୀ ଛୁରିଆଙ୍କ ସହ ତାଙ୍କର ଲଢ଼େଇ ହୋଇଥିଲା । ତେବେ ତାଙ୍କର ନିଜସ୍ୱ ସାଧନା ଥିଲେ ମଧ୍ୟ ସାଧନ ନ ଥିଲା । ବିଜେପି ଓ ବିଜେଡି ପ୍ରାର୍ଥୀଙ୍କ ତୁଳନାରେ ତାଙ୍କର କାଣିଚାଏ ଆର୍ଥିକ ସମ୍ବଳ ନ ଥିଲା । କଂଗ୍ରେସ ନେତୃତ୍ୱଙ୍କର ଯେତିକି ସହଯୋଗ ରହିବା କଥା ତାହା ମଧ୍ୟ ରହିଲାନି । ପିସିସି ସଭାପତି ଭକ୍ତ ଚରଣ ଦାସ ନୂଆପଡ଼ାରେ ଡେରା ପକାଇଥିଲେ ମଧ୍ୟ ଆର୍ଥିକ ଅସହାୟତା ଦେଖାଇଥିଲେ ।
ଭକ୍ତଙ୍କ ରଣନୀତି ମଧ୍ୟ ଠିକ୍ ନ ଥିଲା । ରାଜ୍ୟର ବରିଷ୍ଠ ନେତାମାନଙ୍କୁ ବିଶ୍ୱାସକୁ ନେଲେ ନାହିଁ କି ସମସ୍ତଙ୍କର ସହଯୋଗ ଲୋଡ଼ିଲେ ନାହିଁ । ଜଣେ ବି କେନ୍ଦ୍ରୀୟ ନେତାଙ୍କୁ ନୂଆପଡ଼ା ଆଣି ପାରିଲେ ନାହିଁ । ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀଙ୍କ ଗସ୍ତ ଶେଷ ମୁହୂର୍ତ୍ତରେ ବାତିଲ ହୋଇଗଲା ।
ଏହିସବୁ କାରଣରୁ ବିଜେପି ଓ ବିଜେଡିଠାରୁ ପ୍ରଚାରରେ ବହୁ ପଛରେ ରହିଗଲେ ଘାସିରାମ । ତାଙ୍କ ପାଇଁ ବଡ଼ନେତାଙ୍କ ପ୍ରଚାର ନ ଥିଲା କି ରୋଡ୍ ସୋ’ ନ ଥିଲା । ଗୋଟେ ବଡ଼ ସମାବେଶ ବି ହୋଇ ନ ଥିଲା । ଏକା ଏକା ଘରକୁ ଘର ବୁଲି ସେ ଭୋଟ ମାଗିଥିଲେ ।
ଘାସିରାମଙ୍କୁ ପରିଶ୍ରମର ଫଳ ମିଳିଛି । ତାଙ୍କୁ ମିଳିଛି ୪୦,୧୨୧ ଭୋଟ । ଗତଥରଠାରୁ କମ୍ ଭୋଟ ପାଇଥିଲେ ମଧ୍ୟ ବିଜେଡିକୁ ପଛରେ ପକାଇ ଦ୍ୱିତୀୟ ସ୍ଥାନରେ ଅପରିବର୍ତ୍ତିତ ଅଛନ୍ତି । ଏହା କିଛି କମ କଥା ନୁହେଁ ।
ଏହି ଫଳାଫଳକୁ ନେଇ ନୈରାଶ୍ୟ ଓ ଅସହାୟତା ପ୍ରକାଶ କରିଛନ୍ତି ଘାସିରାମ । ଏଠି କାମ, ସାଧୁତାର ମୂଲ୍ୟ ନାହିଁ । ସବୁ ପଇସାର ଖେଳ । ପଇସା ଦେଲେ ଭୋଟ ମିଳୁଛି । ମୋର ପଇସା ଖର୍ଚ୍ଚ କରିବାର ସାମର୍ଥ୍ୟ ନ ଥିଲା । ଦଳ ପକ୍ଷରୁ ମଧ୍ୟ ସହଯୋଗ ମିଳିଲାନି ବୋଲି ପ୍ରତିକ୍ରିୟା ଦେଇଛନ୍ତି ।
