ବିଡିଓ ମ୍ୟାଡାମ୍ ଙ୍କ ଲୁଟ୍ କାହାଣୀ

ଭୁବନେଶ୍ୱର: କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବିଡିଓ ଅକ୍ଷମିତା କାର୍ତ୍ତିକଙ୍କୁ ଆଜି ଭିଜିଲାନସ୍ ଗିରଫ କରିଛି । କୋର୍ଟରେ ଜାମିନ୍ ନାମଞ୍ଜୁର ହେବାରୁ ତାଙ୍କୁ ଜେଲ୍ କୁ ପଠାଇ ଦିଆଯାଇଛି । ଗତକାଲି ଏହି ମ୍ୟାଡାମ୍ ଭବାନୀପାଟଣାଠାରେ ଜିଲ୍ଲାପାଳଙ୍କ ମିଟିଂରେ ଯୋଗ ଦେଇସାରି ଏକ ବୋଲେରୋରେ ଗୋଲାମୁଣ୍ଡା ଫେରୁଥିବା ବେଳେ ଜାରିଙ୍ଗ ଛକ ନିକଟରେ ଛପି ରହିଥିବା ଭିଜିଲାନ୍ସ ଅଧିକାରୀମାନେ ଧରିଥିଲେ । ଗାଡ଼ି ଯାଞ୍ଚ ବେଳେ ୪ ଲକ୍ଷ ୯୨ ହଜାର ଟଙ୍କା ମିଳିଥିଲା । ଗାଡ଼ିର ଡୋର୍ ଭିତରେ ଏହି ଟଙ୍କା ଲୁଚାଇ ରଖାଯାଇଥିଲା । ଟଙ୍କା କାହାର ବୋଲି ବିଡିଓଙ୍କୁ ପଚାରିବାରୁ ସେ ବାଉଳା ହୋଇଥିଲେ । ଠିକ୍ ଉତ୍ତର ଦେଇପାରି ନ ଥିଲେ । ଭିଜିଲାନ୍ସ ଅଧିକାରୀମାନେ ଗତକାଲିଠାରୁ ତାଙ୍କୁ ଅଟକ ରଖିବା ପରେ ଆଜି ଗିରଫ କରିଛନ୍ତି ।

ଏହି ମହିଳା ଓଏଏସ୍ ଅଫିସର ଦୁର୍ନୀତି ଅଭିଯୋଗରେ ଗିରଫ ହୋଇ ଜେଲ୍ ଯିବାରେ କିଛି ଆଶ୍ଚର୍ଯ୍ୟ ହେବାର ନାହିଁ । ଆଶ୍ଚର୍ଯ୍ୟ କଥାଟି ହେଉଛି, ଏଭଳି ଦୁର୍ନୀତିଖୋରଙ୍କୁ ଆମର ସରକାରୀ ବ୍ୟବସ୍ଥାର ପୃଷ୍ଠପୋଷକତା । କାରଣ ଦୁର୍ନୀତି ମାମଲାରେ ଏହି ମ୍ୟାଡାମ୍ ଅତୀତରେ ଚାକିରିରୁ ନିଲମ୍ବିତ ହୋଇଥିଲେ । ତାଙ୍କ ବିରୋଧରେ ବିଭାଗୀୟ ତଦନ୍ତ ସହ ଏକ ପୁଲିସ ମାମଲା ବି ରହିଛି । ତା ସତ୍ତ୍ୱେ ବି ସେ ହାରିନାହାନ୍ତି । ତାଙ୍କୁ ପୁଣି ବିଡିଓ ପଦରେ ଲୁଟିବାକୁ ସୁଯୋଗ ଦିଆଯାଇଛି ।

ବିସ୍ତାର ଭାବରେ କହିଲେ, ଓଏଏସ୍ ମ୍ୟାଡାମ୍ ଅକ୍ଷମିତା କାର୍ତ୍ତିକ ଚାକିରି ଜୀବନ ଆରମ୍ଭରୁ ହିଁ ଦୁର୍ନୀତିରେ ଲିପ୍ତ ରହିଛନ୍ତି । ୨୦୧୮ ମସିହାରେ ରାୟଗଡ଼ା ଜିଲ୍ଲା ଗୁଣୁପୁରର ତହସିଲଦାର ଥିଲା ବେଳେ ତାଙ୍କ ବିରୋଧରେ ରେଡକ୍ରସ୍ ଅର୍ଥ ଆତ୍ମସାତ ଅଭିଯୋଗ ଆସିଥିଲା । ନିଜେ ଜିଲ୍ଲାପାଳ ଏହାର ତଦନ୍ତ କରିଥିଲେ ଏବଂ ସତ୍ୟାସତ୍ୟ ଜଣାପଡ଼ିବା ପରେ ଗୁଣୁପୁର ଥାନାରେ ଜିଲ୍ଲା ପ୍ରଶାସନ ପକ୍ଷରୁ ତାଙ୍କ ନାଁରୋ ଏତଲା ଦିଆଯାଇଥିଲା ।

ତେବେ ରେଡକ୍ରସ୍ ଅର୍ଥ ଆତ୍ମସାତ ଭଳି ଗୁରତର ମାମଲା ଥିବା ସତ୍ତ୍ୱେ ଏହି ମ୍ୟାଡାମ୍ ଙ୍କୁ ରାଜ୍ୟ ସରକାର ବିଡିଓ ପଦରେ ପୁରସ୍କୃତ କରିଥିଲେ । ନବରଙ୍ଗପୁର ଜିଲ୍ଲା ତେନ୍ତୁଲିଖୁଣ୍ଟି ବ୍ଲକ୍ ରେ ବିଡିଓ ଥିବା ବେଳେ ତାଙ୍କ ବିରୋଧରେ ମାଳ ମାଳ ଦୁର୍ନୀତି ଅଭିଯୋଗ ଆସିଥିଲା । ଲୋକଙ୍କ ଆକ୍ରୋଶକୁ ଧରି ସେତେବେଳର ବିଜେପି ନେତା ତଥା ବର୍ତ୍ତମାନର ବିଧାୟକ ତାଙ୍କର ବଦଳି ଦାବି କରି ୧୦ ଦିନ କାଳ ଧାରଣାରେ ବସିଥିଲେ । ଏହାପରେ ମ୍ୟାଡାମ୍ ଙ୍କର ବଦଳି ହେଲା ସତ ହେଲେ ସେହି ନବରଙ୍ଗପୁର ଜିଲ୍ଲାର କୋସାଗୁମୁଡ଼ା ବ୍ଲକ୍ କୁ ବିଡିଓ ଭାବରେ ।

ସେଠାକୁ ଯାଉ ଯାଉ ମହାମାରୀ କୋଭିଡ୍ ବିଡିଓ ମ୍ୟାଡାମ୍ ଙ୍କୁ ଟଙ୍କା ଖାଇବାର ଆହୁରି ସୁଯୋଗ ଆଣିଦେଲା । ଓଡ଼ିଶା ଫେରୁଥିବା ପ୍ରବାସୀ ଶ୍ରମିକଙ୍କ ନିମନ୍ତେ ଖାଦ୍ୟ ଓ ଔଷଧ ପାଇଁ କୋସାଗୁମୁଡ଼ା ବ୍ଲକ୍ ର ୨୬ ଟି ପଞ୍ଚାୟତକୁ ୪୨ ଲକ୍ଷ ଟଙ୍କା ଆସିଥିଲା । ମାତ୍ର ମ୍ୟାଡାମ୍ ସେଥିରୁ ବ୍ୟାପକ ଅର୍ଥ ହରିଲୁଟ୍ କରିଦେଇଥିଲେ । ଜିଲ୍ଲାପାଳ ଏହାର ତଦନ୍ତ କଲା ପରେ ବିଡିଓ ଅକ୍ଷମିତାଙ୍କୁ ଚାକିରିରୁ ନିଲମ୍ବନ କରିଥିଲେ । ତେବେ ନିଲମ୍ବନ ହଟିବା ପରେ ଏହି ମ୍ୟାଡାମ୍ ଗତବର୍ଷ ଗୋଲାମୁଣ୍ଡା ବ୍ଲକ୍ କୁ ପୁଣି ବିଡିଓ ହୋଇ ଆସିଥିଲେ ।