ନୂଆଦିଲ୍ଲୀ: ଏଣିକି ସୋସିଆଲ୍ ମିଡ଼ିଆରେ ମିଥ୍ୟା ଓ ଆପତ୍ତିଜନକ ଖବର ପୋଷ୍ଟ କଲେ କୀଳା । ଖବରଟିକୁ କିଏ ଛାଡିଛନ୍ତି ଧରାପଡ଼ି ଦଣ୍ଡିତ ହେବେ । ନ୍ୟୁଜ୍ ପୋର୍ଟାଲ୍ ଖୋଲି ମନଇଚ୍ଛା ଖବର ପକାଇଲେ ବି ଅସୁବିଧା । ଏହିଭଳି ଭାବେ ସୋସିଆଲ୍ ମିଡ଼ିଆ ପ୍ଲାଟଫର୍ମ, ଓଭର୍ ଦି ଟପ୍(ଓଟିଟି) ଏବଂ ଡିଜିଟାଲ୍ ମିଡ଼ିଆ ଉପରେ ଅଙ୍କୁଶ ଲଗାଇଛନ୍ତି ମୋଦି ସରକାର । ଆଇଟି ମନ୍ତ୍ରଣାଳୟ ପକ୍ଷରୁ ଏହାର ଗାଇଡଲାଇନ୍ ପ୍ରସ୍ତୁତ ହୋଇଛି ।
ସୋସିଆଲ୍ ମିଡ଼ିଆ ଓ ଓଟିଟି ପ୍ଲାଟଫର୍ମରେ ଆପତ୍ତିଜନକ କାର୍ଯ୍ୟକଳାପ ରୋକିବା ପାଇଁ କେନ୍ଦ୍ର ସରକାର ସଂପୃକ୍ତ କମ୍ପାନୀମାନଙ୍କ ପାଇଁ ଏକ ଏଥିକ୍ସ କୋଡ୍ କରିଛନ୍ତି । ଏହି ସଂସ୍ଥାମାନେ ଅଭିଯୋଗକାରୀଙ୍କ ଆପତ୍ତି ଶୁଣି ସମାଧାନ କରିବା ପାଇଁ ଜଣେ ଚିଫ୍ କମ୍ପ୍ଲିଆନସ୍ ଅଫିସର, ଜଣେ ନୋଡାଲ୍ କଣ୍ଟାକ୍ଟ ପର୍ସନ୍ ଏବଂ ଜଣେ ରେସିଡେଣ୍ଟ ଗ୍ରିଭାନସ ଅଫିସର ନିଯୁକ୍ତ କରିବେ । ଗ୍ରିଭାନସ୍ ଅଫିସର ୨୪ ଘଣ୍ଟା ଭିତରେ ଅଭିଯୋଗକୁ ଗ୍ରହଣ କରିବେ ଏବଂ ୧୫ ଦିନ ମଧ୍ୟରେ ସମାଧାନ କରିବେ । ଚିଫ୍ କମ୍ପ୍ଲାଏନସ ଅଫିସର ସରକାରୀ ସଂସ୍ଥା ସହ ଦୈନିକ ୨୪ ଘଣ୍ଟା ଯୋଗାଯୋଗରେ ରହିବେ । ଏହି ଅଫିସରମାନେ ଭାରତୀୟ ହେବା ସହ ଭାରତରେ ରହି କାର୍ଯ୍ୟ କରିବେ ।
ମୋଦି ସରକାରଙ୍କ ବିଚାରରେ ଦେଶର ଅଖଣ୍ଡତା, ସାର୍ବଭୌମତ୍ୱ ଓ ସୁରକ୍ଷା ସମ୍ପର୍କିତ ସୂଚନାକୁ ସୋସିଆଲ୍ ମିଡ଼ିଆରେ ଭାଇରାଲ୍ କରିବା ବଡ଼ ଅପରାଧ । ଏଭଳି ଖବରକୁ ପ୍ରଥମେ ସୋସିଆଲ୍ ମିଡ଼ିଆରେ ଛାଡ଼ିଥିବା ବ୍ୟକ୍ତିଙ୍କ ପରିଚୟ ଗୋପନ ରଖାଯିବ ନାହିଁ । ଏହାକୁ ଚିହ୍ନଟ ପାଇଁ ବ୍ୟବସ୍ଥା ରହିବ । ଏତଦବ୍ୟତୀତ କାହାରି ଅଶ୍ଲୀଳ ଅଥବା ନକଲି ଫଟୋ ବା ଭିଡ଼ିଓ ଆସିଲେ ୨୪ ଘଣ୍ଟା ଭିତରେ ତାହାକୁ ଡିଲିଟ୍ କରିବାକୁ ପଡ଼ିବ ।
ଓଟିଟି ପ୍ଲାଟଫର୍ମ ଓ ଡିଜିଟାଲ୍ ମିଡ଼ିଆ ପାଇଁ ତିନିଥାକିଆ ଅଭିଯୋଗ ନିବାରଣ ବ୍ୟବସ୍ଥା ସହ ସେଲଫ୍ ରେଗୁଲେସନ୍ ବା ସ୍ୱ-ନିୟନ୍ତ୍ରଣ ରହିବ । ଓଟିଟି ପ୍ଲାଟଫର୍ମ ନିଜ ଭିଡିଓକୁ ଦର୍ଶକଙ୍କ ବୟସ ଅନୁସାରେ ୫ଟି ବର୍ଗରେ ବିଭକ୍ତ କରିବେ । ୧୩ ଓ ତଦୁଦ୍ଧ୍ୱର୍ ବୟସ୍କଙ୍କ ପାଇଁ ଉଦ୍ଦିଷ୍ଟ କଣ୍ଟେଣ୍ଟ ପାଇଁ ପ୍ୟାରେଣ୍ଟାଲ୍ ଲକ୍ ବ୍ୟବସ୍ଥା ରହିବ ।
ନ୍ୟୁଜ୍ ପୋର୍ଟାଲ୍ ପବ୍ଲିସର୍ ମାନେ ପ୍ରେସ୍ କାଉନସିଲ୍ ଅଫ ଇଣ୍ଡିଆର ସାମ୍ବାଦିକ ଆଚାର ସଂହିତା ଏବଂ କେବୁଲ୍ ଟେଲିଭିଜନ୍ ନେଟୱର୍କସ୍ ରେଗୁଲେସନ୍ ଆକ୍ଟ ଅଧୀନସ୍ଥ ପ୍ରୋଗ୍ରାମ୍ କୋଡ୍ ପାଳନ କରିବାକୁ ବାଧ୍ୟ । ଏହି ସଂସ୍ଥାମାନଙ୍କର ମଧ୍ୟ ତ୍ରିସ୍ତରୀୟ ଗ୍ରିଭାନସ୍ ରିଡ୍ରେସାଲ୍ ମେକାନିଜିମ୍ ବ୍ୟବସ୍ଥା ରହିବ ।
ଏମାନେ ନିଜସ୍ୱ ଗ୍ରିଭାନସ୍ ରିଡ୍ରେସାଲ୍ ଅଫିସର ନିଯୁକ୍ତ କରିବେ । କୌଣସି ଅଭିଯୋଗ ଆସିଲେ ୧୫ ଦିନ ଭିତରେ ପଦକ୍ଷେପ ନେବେ । ଅଭିଯୋଗର ସମାଧାନ ହୋଇ ନ ପାରିଲେ, ପବ୍ଲିସରମାନଙ୍କର ଏକ ବା ଏକାଧିକ ସ୍ୱ-ନିୟନ୍ତ୍ରିତ କମିଟି ଏହାର ବିଚାର କରିବେ । ଏଥିରେ ସର୍ବାଧିକ ୬ ଜଣ ରହିବେ । ସୁପ୍ରିମକୋର୍ଟ ବା ହାଇକୋର୍ଟର ଜଣେ ଅବସରପ୍ରାପ୍ତ ବିଚାରପତି ଅଥବା ଜଣେ ବିଶିଷ୍ଟ ବ୍ୟକ୍ତି ଏହାର ମୁଖ୍ୟ ରହିବେ । ସୂଚନା ଓ ପ୍ରସାରଣ ମନ୍ତ୍ରଣାଳୟରେ ଏହି କମିଟି ପଞ୍ଚିକୃତ ହେବା ବାଧ୍ୟତାମୂଳକ ।
ଖବର ପ୍ରକାଶ କରୁଥିବା ଡିଜିଟାଲ୍ ମିଡ଼ିଆମାନଙ୍କ ଉପରେ ନଜର ରଖିବା ପାଇଁ ସୂଚନା ଓ ପ୍ରସାରଣ ମନ୍ତ୍ରାଳୟ ପକ୍ଷରୁ ଆନ୍ତଃ ବିଭାଗୀୟ କମିଟି ଗଠିତ ହେବ । ଆଚାର ସଂହିତା ସମେତ ସ୍ୱ-ନିୟନ୍ତ୍ରିତ କମିଟି ପାଇଁ ଏକ ଚାର୍ଟର ପ୍ରସ୍ତୁତ କରାଯିବ ।
ଆସନ୍ତା ୩ ମାସ ଭିତରେ ଏସବୁ ନିୟମ କାର୍ଯ୍ୟକାରୀ ହେବ ।
