ଲାଞ୍ଚୁଆ ଡାକ୍ତରଙ୍କ ଘରୁ ମିଳିଲା ୧ କୋଟି ୧୨ ଲକ୍ଷ ଟଙ୍କା

ଭୁବନେଶ୍ୱର: ବିପୁଳ ଆୟ ବହିର୍ଭୂତ ସମ୍ପତ୍ତି କମେଇ ଜେଲ୍ ଗଲେ ଅତିରିକ୍ତ ଏସପି ତ୍ରିନାଥ ମିଶ୍ର । ତାଙ୍କର ଅମାପ ସମ୍ପତ୍ତି ସବୁଠି ଚର୍ଚ୍ଚାର ବିଷୟ ପାଲଟିଥିବା ବେଳେ ଆଉ ଜଣେ ଡାକ୍ତରଙ୍କ ବିପୁଳ ସମ୍ପତ୍ତି ସାମନାକୁ ଆସିଛି । ଘରେ ଲୁଚାଛପା ନଗଦ ଟଙ୍କା ରଖିବାରେ ସବୁ ରେକର୍ଡ ଭାଙ୍ଗିଦେଇଛନ୍ତି ଏହି ଲାଞ୍ଚଆ ଡାକ୍ତର । ଭିଜିଲାନସ୍ ଚଢ଼ାଉ ବେଳେ ତାଙ୍କ ଘରୁ ମିଳିଛି ୧ କୋଟି ୧୨ ଲକ୍ଷ ଟଙ୍କା ।

କୌଣସି ସରକାରୀ ବାବୁଙ୍କ ଘରୁ ନିକଟ ଅତୀତରେ ଭିଜିଲାନସ୍ ହାବୁଡ଼ରେ ଏତେ ପରିମାଣର ଟଙ୍କା ପଡ଼ି ନ ଥିଲା । ତିନି ମାସ ତଳେ ବାରିପଦା ଆଇଟିଡିଏ ଆସିଷ୍ଟାଣ୍ଟ ଇଞ୍ଜିନିୟର ସନ୍ତୋଷ ଦାସଙ୍କ ଘରୁ ନଗଦ ୪୧ ଲକ୍ଷ ୭୭ ହଜାର ଟଙ୍କା ମିଳିଥିଲା । ଭିଜିଲାନସ୍ ରେକର୍ଡରେ ଏହା ସର୍ବାଧିକ ଥିଲା । ଆଉ ଏହି ରେକର୍ଡ ଆଜି ଭାଙ୍ଗିଦେଇଛନ୍ତି ଲାଞ୍ଚୁଆ ଡାକ୍ତର ।

ଘରେ ୧ କୋଟି ୧୨ ଲକ୍ଷ ଟଙ୍କା ରଖିଥିବା ଏହି ମହାଶୟ ହେଉଛନ୍ତି ଡାକ୍ତର ସୁକାନ୍ତ କୁମାର ଜେନା । ସ୍ତ୍ରୀ ଓ ପ୍ରସୂତି ବିଭାଗର ଡାକ୍ତର । ପୁରୀ ଜିଲ୍ଲା ଚାରିଛକ ମେଡ଼ିକାଲ୍ ସିଏଚସିରେ ଚାକିରି କରୁଛନ୍ତି । ଜଣେ ପ୍ରସୂତୀଙ୍କୁ ଅପରେସନ୍ କରିବା ପାଇଁ ସେ ଦୁଇଟି କିସ୍ତିରେ ୮ ହଜାର ଟଙ୍କା ଲାଞ୍ଚ ନେବା ବେଳେ ଭିଜିଲାନସ୍ ହାତରେ ଧରାପଡ଼ିଥିଲେ । ଏହାପରେ ଭିଜିଲାନସ୍ ଟିମ୍ ଭୁବନେଶ୍ୱରର ପଟିଆସ୍ଥିତ ତାଙ୍କ ବାସଭବନରେ ଚଢ଼ାଉ କରି ଏହି ବିପୁଳ ଟଙ୍କା ଜବତ କରିଛି । ତାଙ୍କର କଳାରାହାଙ୍ଗ ଠାରେ ଆଉ ଏକ ଘର(ପ୍ଲଟ୍ ନଂ ୩୮, କସମୋ ଡୁପ୍ଲେକ୍ସ) ଠାବ ହୋଇଛି ।

ଭିଜିଲାନସ୍ ଦ୍ୱାରା ତାଙ୍କ ସମ୍ପତ୍ତିର ଛାନଭିନ୍ ଜାରି ରହିଛି । ତଦନ୍ତ ସରିଲେ ସବୁ ତଥ୍ୟ ସାମନାକୁ ଅଣାଯିବ ବୋଲି ଭିଜିଲାନସ୍ ପକ୍ଷରୁ କୁହାଯାଇଛି ।