ନବମ, ଏକାଦଶ ପିଲାଙ୍କ କ୍ଲାସ୍ ବାତିଲ

ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣକୁ ଦୃଷ୍ଟିରେ ରଖି ସ୍କୁଲ ଓ ଗଣଶିକ୍ଷା ବିଭାଗ ଆଜି ଏକ ବଡ଼ ନିଷ୍ପତ୍ତି ନେଇଛି । ନବମ ଓ ଏକାଦଶ ଛାତ୍ରଛାତ୍ରୀଙ୍କ କ୍ଲାସ୍ ଗୁଡ଼ିକୁ ଏପ୍ରିଲ୍ ୩୦ ତାରିଖ ପର୍ଯ୍ୟନ୍ତ ବାତିଲ କରାଯାଇଛି । ରାଜ୍ୟର ସମସ୍ତ ସରକାରୀ ଓ ଘରୋଇ ସ୍କୁଲ ପାଇଁ ଏହା ଲାଗୁ ହେବ । ହଷ୍ଟେଲ୍ ରେ ରହୁଥିବା ନବମ ଓ ଏକାଦଶ ପିଲାମାନେ ତୁରନ୍ତ ଘରକୁ ଯିବାକୁ ପରାମର୍ଶ ଦିଆଯାଇଛି । ତେବେ ଦଶମ ଓ ଦ୍ୱାଦଶ ଶ୍ରେଣୀ ପିଲାଙ୍କ ପରୀକ୍ଷା ଥିବାରୁ କ୍ଲାସ୍ ବନ୍ଦ କରାଯାଇନାହିଁ । ଏପ୍ରିଲ୍ ୨୫ ପର୍ଯ୍ୟନ୍ତ ସେମାନଙ୍କର କ୍ଲାସ୍ ଚାଲିବ ।

ରାଜ୍ୟରେ କରୋନା ଗ୍ରାଫ୍ ବୃଦ୍ଧି ପାଇଥିବା ବେଳେ ବିଭିନ୍ନ ଶିକ୍ଷାନୁଷ୍ଠାନର ଛାତ୍ରଛାତ୍ରୀମାନେ ସଂକ୍ରମିତ ହେଉଛନ୍ତି । କୋମଳମତି ପିଲାଙ୍କୁ ସଂକ୍ରମଣ ବିପଦରେ ନ ପକାଇବାକୁ ସରକାର ଏଭଳି କଠୋର ନିଷ୍ପତ୍ତି ନେଇଥିବା କୁହାଯାଇଛି । ଏପ୍ରିଲ୍ ୩୦ ତାରିଖ ପରେ ପରିସ୍ଥିତିକୁ ଦେଖି ପରବର୍ତ୍ତୀ ନିଷ୍ପତ୍ତି ନିଆଯିବ । ଆବଶ୍ୟକ ପଡ଼ିଲେ ଅନଲାଇନ୍ କ୍ଲାସ୍ କରାଯିବ ବୋଲି ବିଭାଗୀୟ ନିର୍ଦ୍ଦେଶନାମାରେ କୁହାଯାଇଛି ।