ଭୁବନେଶ୍ୱର: ଜଣେ ବିବାହିତ ମହିଳା ଇନସପେକ୍ଟରଙ୍କ ଘରକୁ ମାତାଲ୍ ଅବସ୍ଥାରେ ଯାଇ ରୋବାବ୍ ଦେଖାଇଥିବା ଆଇପିଏସ୍ ଅଫିସର ପଣ୍ଡିତ ରାଜେଶ ଉତ୍ତମରାଓଙ୍କୁ ରାଜ୍ୟ ସରକାର ଚାକିରିରୁ ନିଲମ୍ବନ କରିଛନ୍ତି । ପୁଲିସ ଡିଜିଙ୍କ ରିପୋର୍ଟ ଆଧାରରେ ଏହି ବିଶୃଙ୍ଖଳିତ ଅଫିସରଙ୍କ ବିରୋଧରେ ରାଜ୍ୟ ସରକାର ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ତାଙ୍କ ବିରୋଧରେ ଖୁବ୍ ଶୀଘ୍ର ଶୃଙ୍ଖଳାଗତ ପ୍ରୋସିଡିଂ ଆରମ୍ଭ ହେବ । ନିଲମ୍ବନ କାଳରେ କଟକସ୍ଥିତ ପୁଲିସ ମୁଖ୍ୟ କାର୍ଯ୍ୟାଳୟରେ ସେ ହାଜିରା ଦେବେ ଏବଂ ଡିଜିପିଙ୍କ ବିନା ଅନୁମତିରେ ବାହାରକୁ ଯାଇପାରିବେ ନାହିଁ । ରାଜ୍ୟ ସରକାରଙ୍କ ଗୃହ ବିଭାଗ ପକ୍ଷରୁ ଏହି ନିର୍ଦ୍ଦେଶନାମା ଜାରି ହୋଇଛି ।
ମହାରାଷ୍ଟ୍ର ବାସିନ୍ଦା ପଣ୍ଡିତ ରାଜେଶ ଉତ୍ତମରାଓ ହେଉଛନ୍ତି ୨୦୦୭ ବ୍ୟାଚ୍ ଓଡ଼ିଶା କ୍ୟାଡରର ଆଇପିଏସ୍ । ଅଗ୍ନିଶମ ବିଭାଗର ଡିଆଇଜି ଭାବେ ଅବସ୍ଥାପିତ ଥିଲେ ।
ଏହି ଆଇପିଏସ୍ ବାବୁଙ୍କ ବିରୋଧରେ ସାଂଘାତିକ ଅଭିଯୋଗ ଆସିଛି । ଗତ ୨୭ ତାରିଖ ରାତିରେ ସେ କ୍ୟାପିଟାଲ ଥାନା ଅନ୍ତର୍ଗତ କେଶରୀ ନଗରରେ ରହୁଥିବା କ୍ରାଇମବ୍ରାଞ୍ଚ ଅର୍ଥନୈତିକ ଅପରାଧ(ଇଓଡବ୍ଲୁ) ଶାଖାରେ କାର୍ଯ୍ୟରତ ଜଣେ ମହିଳା ଇନସପେକ୍ଟରଙ୍କ ସରକାରୀ କ୍ୱାର୍ଟର୍ସକୁ ସମ୍ପୂର୍ଣ୍ଣ ନିଶାଶକ୍ତ ଅବସ୍ଥାରେ ଯାଇଥିଲେ । ତାଙ୍କୁ ନିଭୃତରେ ଦେଖା କରି ବାହା ହେବାକୁ ଜିଦ୍ କରିବା ସହ ସାଙ୍ଗରେ ପଳାଇ ଆସିବାକୁ ବାଧ୍ୟ କରିଥିଲେ ।
ଏହି ସମୟରେ ଇନସପେକ୍ଟରଙ୍କ ସ୍ୱାମୀ ଘରେ ପହଞ୍ଚି ଯିବାରୁ ଆଇପିଏସ୍ ବାବୁଙ୍କ ମୁଣ୍ଡ ଗରମ ହୋଇଯାଇଥିଲା । ଉଭୟଙ୍କ ମଧ୍ୟରେ ଉଚ୍ଚବାଚ ହୋଇ କଥା ମାରପିଟ୍ କୁ ଯାଇଥିଲା । କ୍ୱାର୍ଟର୍ସ ଭିତରେ ଖଣ୍ଡଯୁଦ୍ଧ ଚାଲିଥିବାର କୌଣସି ସୂତ୍ରରୁ କ୍ୟାପିଟାଲ୍ ଥାନା ପୁଲିସ ଖବର ପାଇଲା ପରେ ନିଜେ ଥାନା ଆଇଆଇସି ଏବଂ ଏସିପି ସେଠାକୁ ଦୋ÷ଡ଼ି ଆସିଥିଲେ । ନିଶାଶକ୍ତ ଅବସ୍ଥାରେ ଥିବା ଆଇପିଏସ୍ ବାବୁଙ୍କୁ ବୁଝାଇ ସୁଝାଇ ପରିସ୍ଥିତି ଆୟତ୍ତକୁ ଆଣିଥିଲେ । ଆଇପିଏସ୍ ରାଜେଶଙ୍କ ମାଡ଼ରେ ଇନସପେକ୍ଟରଙ୍କ ସ୍ୱାମୀଙ୍କ ମୁହଁ ଫାଟିଯାଇଛି । ପୁଲିସ ତାଙ୍କୁ ଏକ ଘରୋଇ ହସ୍ପିଟାଲ୍ ରେ ଭର୍ତ୍ତି କରି ଚିକିତ୍ସା କରାଇଥିବା ଜଣାପଡ଼ିଛି ।
ସଂପୃକ୍ତ ଆଇପିଏସ୍ ପଣ୍ଡିତ ରାଜେଶ ଉତ୍ତମରାଓଙ୍କ ଏଭଳି କାଣ୍ଡକାରଖାନା ସମ୍ପର୍କରେ ସୂଚନାଧିକାର କର୍ମୀ ଜୟନ୍ତ କୁମାର ଦାସ ଜାତୀୟ ମାନବାଧିକାର କମିସନଙ୍କ ଦୃଷ୍ଟି ଆକର୍ଷଣ କରି ଏକ ପିଟିସନ୍ ଦାଖଲ କରିଛନ୍ତି । ସେ ଦର୍ଶାଇଛନ୍ତି ଯେ ଜଣେ ମହିଳା ଇନସପେକ୍ଟର ତାଙ୍କ ନିଜ ଘରେ ମଧ୍ୟ ସୁରକ୍ଷିତ ନୁହଁନ୍ତି । ଘଟଣାର ନିରପେକ୍ଷ ତଦନ୍ତ କରାଯାଇ ଦୋଷୀଙ୍କ ବିରୋଧରେ ସେ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଜାତୀୟ ମାନବାଧିକାର କମିସନ ଏହି ଅଭିଯୋଗର ଗୁରୁତ୍ୱ ଅନୁଭବ କରି ଏହାକୁ ବିଚାର ପାଇଁ ଗ୍ରହଣ କରିଛନ୍ତି ।
ସୂଚନାଥାଉକି, ୫୦ ବର୍ଷୀୟ ଆଇପିଏସ୍ ପଣ୍ଡିତ ରାଜେଶ ଉତ୍ତମରାଓ ବିବାହିତ । ତାଙ୍କର ସ୍ତ୍ରୀ, ପିଲାଛୁଆ ଅଛନ୍ତି । ନିଜର ପରିବାର ସହ ଭୁବନେଶ୍ୱରରେ ରହୁଛନ୍ତି । ଅପରପକ୍ଷରେ ମହିଳା ଇନସପେକ୍ଟର ଜଣଙ୍କ ମଧ୍ୟ ଦୁଇ ସନ୍ତାନର ଜନନୀ ।
୨୭ ତାରିଖରେ ଏହି ଘଟଣା ଘଟିଥିଲେ ମଧ୍ୟ ଏହାକୁ ଚପାଇ ଦେବାକୁ ଉଦ୍ୟମ ହୋଇଥିଲା । ମାତ୍ର ୪ ଦିନିଆ ଦିଲ୍ଲୀ ଗସ୍ତ ସାରି ଗତକାଲି ସଂଧ୍ୟାରେ ମୁଖ୍ୟମନ୍ତ୍ରୀ ମୋହନ ମାଝୀ ଭୁବନେଶ୍ୱର ଫେରିଲା ପରେ ଘଟଣା ସମ୍ପର୍କରେ ଅବଗତ ହୋଇ ତୁରନ୍ତ ପଦକ୍ଷେପ ନେଇଛନ୍ତି ।
