ଭୁବନେଶ୍ୱର: ଦୁର୍ନୀତି ଉପାୟରେ ସମ୍ପତ୍ତି କମେଇଲେ କିଭଳି ଅବସ୍ଥା ଭୋଗିବାକୁ ପଡ଼େ ତାହାର ଏକ ନିଚ୍ଛକ ଉଦାହରଣ ଦେଖିବାକୁ ମିଳିଛି । ଭୁବନେଶ୍ୱରରେ କାର୍ଯ୍ୟରତ ଜଳଯୋଗାଣ ବିଭାଗର ଜୁନିଅର ଇଞ୍ଜିନିୟର ସୁନିଲ କୁମାର ପାଢ଼ୀଙ୍କ ଘରେ ଭିଜିଲାନସ୍ ଚଢ଼ଉ ବେଳେ ସେ ବାବୁ ଛାନିଆଁରେ ଛାତରୁ ଡେଇଁ ଚମ୍ପଟ୍ ମାରିଥିଲେ । ପଡୋଶୀ ଘରେ ପ୍ରାୟ ୯ ଘଣ୍ଟା ଧରି ଲୁଚିବା ପରେ ସେଠାରୁ ତଡ଼ାଖାଇ ନିଜ ଘରକୁ ଫେରିଛନ୍ତି । ଭିଜିଲାନସ୍ କବଜାକୁ ଆସିଥିବା ଏହି ବାବୁଙ୍କ ଘରୁ ଏ ପର୍ଯ୍ୟନ୍ତ କୋଟି କୋଟି ଟଙ୍କାର ସମ୍ପତ୍ତି ଠାବ ହେଲାଣି ।
ଭୁବନେଶ୍ୱରର RWS&S( ପାନୀୟ ଜଳଯୋଗାଣ) ଅଫିସରେ ଜୁନିଅର ଇଞ୍ଜିନିୟର ଅଛନ୍ତି ସୁନିଲ ପାଢ଼ୀ । ପ୍ରବଳ ଖାଉ ବୋଲି ତାଙ୍କୁ ସମସ୍ତେ ଜାଣନ୍ତି । ବିଳମ୍ବରେ ହେଉ ପଛେ, ବେଆଇନ ସମ୍ପତ୍ତି ଠୁଳ କରିଥିବା ସୂଚନା ପାଇ ଭିଜିଲାନସ୍ ଟିମ୍ ଆଜି ଭୋର୍ ୪ଟାରେ ତାଙ୍କ ଜାଗମରାସ୍ଥିତ ଘର(ପାଢ଼ୀ ଭିଲ୍ଲା, ପ୍ଲଟ୍ ନଂ ୫୦୦/୫୧୨୦, ମଲ୍ଲିକ କମ୍ପ୍ଲେକ୍ସ), ଅଫିସ, ଗଞ୍ଜାମ ଜିଲ୍ଲା ଆସ୍କାରେ ଥିବା ପୈତୃକ ଘର, ଆସ୍କାରେ ଗଢ଼ିଥିବା ମାର୍କେଟ୍ କପ୍ଲେକ୍ସ, ଭଞ୍ଜନଗରରେ ଥିବା ଛନ୍ତିସମ୍ପର୍କୀୟଙ୍କ ଘର ଏହିଭଳି ୫ଟି ଜାଗାରେ ଏକକାଳୀନ ଚଢ଼ଉ କରିଥିଲା । ଏହି ଚଢ଼ଉରେ ସାମିଲ ଅଛନ୍ତି ୬ ଡିଏସପି, ୩ ଇନସପେକ୍ଟର, ୭ ଏଏସଆଇ ଏବଂ ଅନ୍ୟ କର୍ମଚାରୀ ।
ଭୋର୍ ୪ଟା ବେଳେ ଭିଜିଲାନସ୍ ଟିମ୍ ତାଙ୍କ ଘର କବାଟ ବାଡେଇଲା କ୍ଷଣି ନିଦରୁ ଉଠି ପଡ଼ିଥିଲେ ଶ୍ରୀ ପାଢ଼ୀ । ଭିଜିଲାନସ୍ ବୋଲି ଜାଣିଲା ପରେ ବିକଳିଆ ହୋଇ ଘରର ଛାତକୁ ଦୌଡ଼ିଥିଲେ । ସେଠାରୁ ପଡୋଶୀ ଘରର ଛାତକୁ ଡେଇଁ ଛୁ ମାରିଥିଲେ । ଭିଜିଲାନସ୍ ଅଧିକାରୀମାନେ ତାଙ୍କୁ ଖୋଜି ନ ପାଇବା ପରେ ଘରର ସମ୍ପତ୍ତି ଛାନଭିନ୍ ଆରମ୍ଭ କରିଦେଇଥିଲେ । ତାଙ୍କର ରାଜପ୍ରାସାଦ ଭଳି ଘର, ଭିତର ଡିଜାଇନ୍, ଦାମୀ ସାମଗ୍ରୀ ଓ ଆସବାବପତ୍ର ସମସ୍ତଙ୍କୁ ତାଜୁବ କରିଛି । ଘରର ସବୁଠି ବିଦେଶୀ ସାମଗ୍ରୀ ବ୍ୟବହୃତ ହୋଇଛି ।
ପ୍ରାଥମିକ ତଦନ୍ତରୁ ତାଙ୍କ ପାଖରେ କୋଟି କୋଟି ଟଙ୍କାର ସମ୍ପତ୍ତି, ଜାଗାବାଡି, ବ୍ୟାଙ୍କ ଡିପୋଜିଟ୍ ଥିବା ଜଣାପଡ଼ିଛି । ଜାଗମରାସ୍ଥିତ ତାଙ୍କର ତିନି ମହଲା ଘରର ଦାମ ଆନୁମାନିକ କୋଟିଏ ୧୦ ଲକ୍ଷ ହେବ । ତାଙ୍କର ଏକାଧିକ ଘର ଓ ପ୍ଲଟଗୁଡ଼ିକର ଆକଳନ କରାଯାଉଛି । ଆସ୍କାରେ ଥିବା ମାର୍କେଟ୍ କମ୍ପ୍ଲେକ୍ସ ମୂଲ୍ୟ ମଧ୍ୟ ଆକଳନ କରାଯାଉଛି । ତାଙ୍କର ୧୭ଟି ବ୍ୟାଙ୍କ ଆକାଉଣ୍ଟରେ ଟଙ୍କା ଜମା ଅଛି । ଏହାଛଡ଼ା ଏକାଧିକ ଗାଡ଼ି, ଇନସୁରାନ୍ସ, ପୋଷ୍ଟାଲ୍ ଏବଂ ଅନ୍ୟାନ୍ୟ ଡିପୋଜିଟ୍ ରହିଛି । ଚଢ଼ଉ ଜାରି ରହିଥିବାରୁ ହିସାବ ପରେ ସବିଶେଷ ତଥ୍ୟ ଜଣାପଡ଼ିବ ।
ଜେଇ ସୁନୀଲ ପାଢ଼ୀଙ୍କ ସମ୍ପର୍କରେ ଆଉ ଏକ ରୋଚକ ତଥ୍ୟ ଜଣାପଡ଼ିଛି । ତାଙ୍କ ବାପା ଜଗବନ୍ଧୁ ପାଢ଼ୀ ବନ ବିଭାଗରେ ରେଞ୍ଜର ଚାକିରି କରିଥିଲେ । ତାଙ୍କ ଚାକିରି କାଳରେ ବେଆଇନ ସମ୍ପତ୍ତି ଠୁଳ ଅଭିଯୋଗରେ ଦୁଇ ଦୁଇ ଥର ଭିଜିଲାନସ୍ ଚଢ଼ଉ ହୋଇଥିଲା । ସେହି କେସ୍ ର ଫଇସଲା ଏ ପର୍ଯ୍ୟନ୍ତ ହୋଇନାହିଁ । ଏବେ ପୁଅ ସେହି ରାସ୍ତାରେ ଯାଇଛନ୍ତି ।
