ଗରିବଙ୍କ ପେଟରେ ନାତ ମାରିଲେ

ଭୁୁବନେଶ୍ୱର: କରୋନା ଯୋଗୁଁ ଦୁଇବର୍ଷ ଧରି ବେପାର ବଣିଜ ନଥିବାରୁ ରୋଜଗାର ବନ୍ଦ ହୋଇଯାଇଥିଲା । ଦହନୀୟ ଜୀବନ ଜୀଉଁଥିଲେ କ୍ଷୁଦ୍ର ବ୍ୟବସାୟୀ । ପରିବାର ପେଟକୁ ଦାନା ଯୋଗାଇବା କଷ୍ଟକର ହୋଇଥିଲା । କରୋନା ଚାଲିଗଲା ପରେ ନିଜର ଛୋଟ ବେପାରକୁ ନେଇ ଅଣ୍ଟା ସଳଖିବାକୁ ଉଦ୍ୟମ କଲା ବେଳକୁ ପ୍ରଶାସନ ପାଲଟିଛି ରାକ୍ଷସ । ବୁଲଡୋଜର ଦ୍ୱାରା ମାଟିରେ ମିଶାଇଦେଇଛି ଅଭାବୀ ମଣିଷର ବଞ୍ଚିବାର ସ୍ୱପ୍ନକୁ । ସେମାନଙ୍କର ବଞ୍ଚିବାର ଅଧିକାର ଛଡ଼ାଇ ନେଇଛି । ରାଜଧାନୀ ଛାତି ଉପରେ ଏହି ଅମାନବୀୟ ଦୃଶ୍ୟ ସବୁଆଡ଼େ ଆଲୋଡ଼ନ ସୃଷ୍ଟି କରିଛି ।

ଭୁବନେଶ୍ୱର ୩୩ ନମ୍ବର ୱାର୍ଡ ଅନ୍ତର୍ଗତ ଝାରପଡ଼ାସ୍ଥିତ ଗଣେଶ ମଣ୍ଡପ ହାଟରେ ଆଜି ବିଏମସି ଓ ବିଡ଼ିଏ ପ୍ରଶାସନ ପୁଲିସ ବଳ ଧରି ବୁଲଡୋଜର ବୁଲାଇଛି । ଜବରଦଖଲ ଉଚ୍ଛେଦ ନାଁରେ ଶତାଧିକ ଦୋକାନ ଘରକୁ ମାଟିରେ ମିଶାଇ ଦିଆଯାଇଛି । ଦୋକାନରେ ଥିବା ଲକ୍ଷ ଲକ୍ଷ ଟଙ୍କାର ସାମଗ୍ରୀ ସେଥିରୁ ରକ୍ଷା ପାଇନି । ପ୍ରଶାସନ ଏବେ ଅବିବେକୀ ହୋଇପଡ଼ିଥିଲା ଯେ ଦୋକାନ ସାମଗ୍ରୀକୁ ରକ୍ଷା କରିବା ପାଇଁ ଦୋକାନୀମାନଙ୍କୁ ଆବଶ୍ୟକ ସମୟ ବି ଦେଲାନି ।

ଗତକାଲି ରାତି ୯ଟା ବେଳେ ଜବରଦଖଲ ହାଟ ଉଚ୍ଛେଦ ହେବ ବୋଲି ବିଏମସି ପକ୍ଷରୁ ଡାକବାଜି ଯନ୍ତ୍ର ଯୋଗେ ପ୍ରଚାର କରାଯାଇଥିଲା । ଆଉ ଆଜି ଭୋର ୫ଟା ବେଳକୁ ସେଠାରେ ବିଏମସି/ବିଡ଼ିଏ/ସାଧାରଣ ପ୍ରଶାସନ ବିଭାଗର ଉଚ୍ଛେଦ ସ୍କ୍ୱାଡ୍ ବୁଲଡୋଜର ସହ ସେଠାରେ ପହଞ୍ଚି ଦୋକାନ ଘରଗୁଡ଼ିକୁ ଭାଙ୍ଗିବା ଆରମ୍ଭ କରିଦେଇଥିଲେ । ଦୋକାନୀମାନଙ୍କୁ ସେମାନଙ୍କର ସାମଗ୍ରୀ ଉଦ୍ଧାର କରି ରଖିବା ପାଇଁ ଫୁରସତ୍ ଦେଲେନି । ଖବର ପାଇ ଦୋକାନୀମାନେ ସେଠାରେ ପହଞ୍ଚିଲା ବେଳକୁ ସବୁ ମାଟିରେ ମିଶି ସାରିଥିଲା ।

ଏହାକୁ ନେଇ ଆଜି ସକାଳୁ ଝାରପଡ଼ା ଅଞ୍ଚଳରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଥିଲା । ସର୍ବସ୍ୱ ହରାଇଥିବା ବ୍ୟବସାୟୀମାନେ ଏହାର ପ୍ରତିବାଦ କରିବା ଆରମ୍ଭ କରିଥିଲେ । ଭୁବନେଶ୍ୱର ବିଜେପି ଜିଲ୍ଲା ସଭାପତି ବାବୁ ସିଂହ, ବିଜେପି ନେତା ଜଗନ୍ନାଥ ପ୍ରଧାନ, ମେୟର ପ୍ରାର୍ଥୀ ସୁନୀତି ମୁଣ୍ଡ୍ ପ୍ରମୁଖ ସେଠାରେ ପହଞ୍ଚିଥିଲେ । ଲକ୍ଷ୍ମୀସାଗର ଗୋଲେଇ ଛକଠାରେ ବ୍ୟବସାୟୀମାନଙ୍କ ସହ ସେମାନେ ରାସ୍ତାରୋକ୍ ଆନ୍ଦୋଳନ କରିଥିଲେ । ପୁଲିସ ସେମାନଙ୍କୁ ହଟାଇବାକୁ ବଳପ୍ରୟୋଗ କରିବାରୁ ଉଭୟ ପକ୍ଷ ମଧ୍ୟରେ ଧସ୍ତାଧସ୍ତି ହୋଇଥିଲା । ପରେ ପ୍ରତିନିଧି ଦଳ ସହ ଡିସିପିଙ୍କ ସହ ଆଲୋଚନା ପରେ ରାସ୍ତାରୋକ ହଟିଥିଲା । ସଂଧ୍ୟାରେ ବିଜେପି ପ୍ରତିନିଧି ଦଳ ରାଜ୍ୟ ମାନବାଧିକାର କମିସନଙ୍କୁ ବିହିତ ପଦକ୍ଷେପ ପାଇଁ ଦାବିପତ୍ର ଦେଇଛନ୍ତି ।

ରାଜନୈତିକ ଆକ୍ରୋଶରୁ ବିନା ନୋଟିସ୍ ରେ ଗଣେଶ ମଣ୍ଡପ ହାଟ ଉଚ୍ଛେଦ କରାଯାଇଥିବା ବିଜେପି ନେତାମାନେ ଅଭିଯୋଗ କରିଛନ୍ତି । ସେମାନେ କହିଛନ୍ତି, ବିଏମସି ନିର୍ବାଚନରେ ଏହି ୱାର୍ଡରୁ ବିଜେପି ପ୍ରାର୍ଥୀ ନିର୍ବାଚିତ ହୋଇଥିବାରୁ ପ୍ରତିହିଂସା ପରାୟଣ ହୋଇ ଏଭଳି ଅମାନବୀୟ କାର୍ଯ୍ୟ କରାଯାଇଛି । ଦୋକାନ ହରାଇଥିବା ସବୁ ବ୍ୟବସାୟୀ ଏହାକୁ ସମର୍ଥନ କରିଥିବା ବେଳେ ସ୍ଥାନୀୟ ଅଞ୍ଚଳରେ ମଧ୍ୟ ଏହି ଚର୍ଚ୍ଚା ହେଉଛି ।

ସେମାନଙ୍କ କହିବାନୁଯାୟୀ, ଝାରପଡ଼ାର ଉକ୍ତ ଅଞ୍ଚଳ ଏକ ପୋଖରୀ ଥିଲା । ସ୍ଥାନୀୟ ଲୋକେ ତାହାକୁ ପୋତି ପୋତି ବ୍ୟବସାୟ ପେଣ୍ଠସ୍ଥଳରେ ପରିଣତ କରିଥିଲେ । ୨୦୦୮ ମସିହାରୁ ତାହା ଏକ ହାଟ ଭାବେ ଗଢ଼ି ଉଠିଥିଲା । ବିଏମସି ପ୍ରଶାସନକୁ ସେଠାକାର ବ୍ୟବସାୟୀମାନେ ସହଯୋଗ କରୁଥିଲେ । ସେମାନଙ୍କୁ ଥଇଥାନ ପରେ ଯାଇ ହାଟ ଉଚ୍ଛେଦ କରାଯିବ ବୋଲି ନିର୍ଭର ପ୍ରତିଶ୍ରୁତି ମିଳିଥିଲା । ମାତ୍ର ବିନା ଥଇଥାନରେ ଏଭଳି ଉଚ୍ଛେଦ ବ୍ୟବସାୟୀଙ୍କ ବଞ୍ଚିବା ଅଧିକାରକୁ ଛଡ଼ାଇ ନେଇଛି ।

ସ୍ଥାନୀୟ ବିଧାୟକ ଅନନ୍ତ ନାରାୟଣ ଜେନା ଏହାର ମୁଖ୍ୟ ଖଳନାୟକ ବୋଲି ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି । ସଂପୃକ୍ତ ୱାର୍ଡରେ ବିଜେଡ଼ି ପ୍ରାର୍ଥୀଙ୍କ ପରାଜୟ ତାଙ୍କ ପତିଆରା କମାଇ ଦେଇଥିବାରୁ ସେ ପ୍ରତିଶୋଧପରାୟଣ ହୋଇ ଏହି କାର୍ଯ୍ୟ କରାଇଛନ୍ତି ବୋଲି ସେମାନଙ୍କର ବିଶ୍ୱାସ । ତେବେ ଏ ସମ୍ପର୍କରେ ବିଧାୟକ ମୁହଁ ଖୋଲିନାହାନ୍ତି । ଗଣମାଧ୍ୟମରେ ପ୍ରତିକ୍ରିୟା ଦେବାକୁ ମନା କରିଛନ୍ତି ।

ଘଟଣା ପଛର କାହାଣୀ ଯାହା ହେଉ ନା କାହିଁକି, ବିଏମସି ପ୍ରଶାସନର ଏହି ଅମାନବୀୟ କାର୍ଯ୍ୟକୁ ସମସ୍ତେ ଛି ଛାକର କରିଛନ୍ତି । ସିଧାସଳଖ ଭାବେ ଏହା ବିଜେଡ଼ି ସରକାରକୁ ନିନ୍ଦିତ କରିଛି ।