ନୀଳଗିରି ପୁଲିସର ବହପ: ସାମ୍ବାଦିକଙ୍କ ଗୋଡରେ ବେଡ଼ି ପକାଇଦେଲା

ବାଲେଶ୍ୱର/ଭୁବନେଶ୍ୱର: ଜଣେ ସାମ୍ବାଦିକଙ୍କ ଉପରେ ପୁଲିସ ପ୍ରତିହିଂସା ପରାୟଣ ହୋଇ କେଉଁସ୍ତରକୁ ଚାଲିଯାଏ, ତାହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ନୀଳଗିରିରେ । ସାମ୍ବାଦିକଙ୍କୁ ଧକ୍କା ମାରି ଆଘାତ କଲା ପରେ ଚିକିତ୍ସା ପାଇଁ ହସ୍ପିଟାଲ୍ କୁ ନେଇଥିଲା । ମାତ୍ର ସେଠି ହସ୍ପିଟାଲ୍ ବେଡ୍ ରେ ସାମ୍ବାଦିକଙ୍କ ଗୋଡ଼କୁ ଶିକୁଳିରେ ବେଡ଼ି ପକାଇଦେଲା । ସତେ ଯେମିତି ସାମ୍ବାଦିକଜଣଙ୍କ ଜଣେ ଦୁର୍ଦ୍ଦାନ୍ତ ପେଶାଦାର ଅପରାଧୀ । ନୀଳଗିରି ପୁଲିସର ଏହି ଜଘନ୍ୟ କାର୍ଯ୍ୟ ସାମ୍ବାଦିକମହଲରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି ।

ପୁଲିସ ଆକ୍ରୋଶର ଶିକାର ଏହି ସାମ୍ବାଦିକ ଜଣଙ୍କ ହେଉଛନ୍ତି ଲୋକନାଥ ଦଳେଇ । ସମ୍ବାଦ ଓ କନକ ଟିଭିର ସେ ନୀଳଗିରି ପ୍ରତିନିଧି ।

ଘଟଣାରୁ ପ୍ରକାଶ ଯେ ଗତ ୪ ତାରିଖ ଦିନ ନୀଳଗିରି ବଜାରରେ ଲୋକନାଥ ଓ ନୀଳଗିରି ଥାନାର ଜଣେ ହୋମଗାର୍ଡଙ୍କ ଗାଡ଼ି ମଧ୍ୟରେ ଧକ୍କା ହୋଇଥିଲା । ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । ପରବର୍ତ୍ତୀ ସମୟରେ ଆପୋଷ ଆଲୋଚନା ମାଧ୍ୟମରେ ମାମଲା ଥଣ୍ଡା ହୋଇଯାଇଥିଲା । ତେବେ ଗତକାଲି ନୀଳଗିରି ଆଇଆଇସି ଶ୍ରୀମତୀ ଦ୍ରୌପଦୀ ଦାସ ସାମ୍ବାଦିକ ଲୋକନାଥଙ୍କୁ ପଚରାଉଚୁରା ପାଇଁ ହଠାତ୍ ଥାନାକୁ ଡାକିଥିଲେ । ଆଉ ଆଇଆଇସି ତାଙ୍କୁ ଦେଖିଲାକ୍ଷଣି ଚିହିଁକି ଉଠିଥିଲେ । ଉତ୍ତ୍ୟକ୍ତ ଆଇଆଇସି ପଚରାଉଚୁରା ଆଳରେ ତାଙ୍କୁ ଧକ୍କା ମାରିଥିଲେ, ମୋବାଇଲ୍ ଛଡ଼ାଇ ନେଇଥିଲେ ବୋଲି ଲୋକନାଥ ଅଭିଯୋଗ କରିଛନ୍ତି । ଆଇଆଇସିଙ୍କ ଧକ୍କାରେ ତଳେ ପଡ଼ିଯିବାରୁ ତାଙ୍କ ଅଣ୍ଟାରେ ଆଘାତ ଲାଗିଥିଲା ।

ଯନ୍ତ୍ରଣାରେ ଛଟପଟ ହେଉଥିବା ଲୋକନାଥଙ୍କୁ ଚିକିତ୍ସା ପାଇଁ ବାଲେଶ୍ୱର ମୁଖ୍ୟ ହସ୍ପିଟାଲ୍ ରେ ଭର୍ତ୍ତି କରାଯାଇଥିଲା । ତେବେ ସେଠାରେ ବି ପୁଲିସର ବହପ କମି ନ ଥିଲା । ସାମ୍ବାଦିକ ତଳେ ଶୋଇ ଚିକିତ୍ସିତ ହେଉଥିବା ବେଳେ ପୁଲିସ ତାଙ୍କ ଗୋଡ଼ରେ ବେଡି ପକାଇ ଦେଇଥିଲା । ପାଖରେ ଦୁଇଜଣ ବନ୍ଧୁକଧାରୀ ପୁଲିସ ତାଙ୍କୁ ଜଗି ରହିଥିଲେ ।

ଲୋକନାଥଙ୍କ କଥାକୁ ବିଶ୍ୱାସ କଲେ, ଏହା ଯେ ନୀଳଗିରି ପୁଲିସର ପ୍ରତିହିଂସାପରାୟଣତା ତାହା ସ୍ପଷ୍ଟ ବାରି ହେଉଛି । କିଛି ଦିନ ତଳେ ନୀଳଗିରିରେ ଚୋରା ନିଶା କାରବାର ସମ୍ପର୍କରେ ସେ ଏକ ଖବର କରିଥିଲେ । ଏଥିରେ ପୁଲିସର ଭୂମିକାକୁ ପ୍ରଶ୍ନ କରିଥିଲେ । ଏଥିରେ ଆଇଆଇସି ଶ୍ରୀମତୀ ଦାସ ପ୍ରତିଶୋଧ ପରାୟଣ ହୋଇ ସୁଯୋଗ ଅପେକ୍ଷାରେ ଥିଲେ । ଆଉ ହୋମଗାର୍ଡଙ୍କ ସହ ସାମାନ୍ୟ ବଚସା ତାଙ୍କୁ ଏହି ସୁଯୋଗ ଆଣିଛି ବୋଲି ଲୋକନାଥ ପ୍ରତିକ୍ରିୟା ଦେଇଛନ୍ତି ।

ନୀଳଗିରି ପୁଲିସର ଏଭଳି ବର୍ବୋରୋଚିତ, ଅପରାଧିକ କାର୍ଯ୍ୟ ସାମ୍ବାଦିକମହଲରେ ଆଲୋଡ଼ନ ସୃଷ୍ଟି କରିଛି । ରାଜ୍ୟବ୍ୟାପୀ ସାମ୍ବାଦିକ ସଂଗଠନଗୁଡ଼ିକ ଏହାକୁ ତୀବ୍ର ନିନ୍ଦା କରିଛନ୍ତି । ସାମ୍ବାଦିକଙ୍କ ଚାପରେ ବାଲେଶ୍ୱର ଏସପି ଏହି ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ।