ଭୁୁବନେଶ୍ୱର: ନିଟ୍ ପରୀକ୍ଷା ନିୟମରେ ପରିବର୍ତ୍ତନ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ସରକାରଙ୍କ ପାଖରେ ବାରମ୍ବାର ଦାବି କରୁଥିଲା ବେଳେ ଅନ୍ୟ ରାଜ୍ୟ ସରକାର ଏହା ସମର୍ଥନରେ ଆଗକୁ ବାହାରିଛନ୍ତି । ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ.ଷ୍ଟାଲିନ୍ ନବୀନଙ୍କୁ ଏକ ଚିଠି ଲେଖି ନିଟ୍ ଢ଼ାଞ୍ଚା ପରିବର୍ତ୍ତନ ସପକ୍ଷରେ ଏକମତ ହୋଇଛନ୍ତି । ଡିଏମକେ ସଂସଦୀୟ ଦଳର ଉପନେତା କାନିମୋଝି କରୁଣାନିଧି ଆଜି ନବୀନ ନିବାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ଷ୍ଟାଲିନ୍ ପଠାଇଥିବା ଚିଠି ଦେବା ସହ ଏ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ ।
ନିକଟରେ କେନ୍ଦ୍ର ଗୃହମନ୍ତ୍ରୀଙ୍କ ବୈଠକରେ ନବୀନ ଏହି ପ୍ରସଙ୍ଗ ଉଠାଇଥିଲେ । ବର୍ତ୍ତମାନର ନିଟ୍ ପରୀକ୍ଷା ଢ଼ାଞ୍ଚାକୁ ସେ ବିରୋଧ କରି ସବୁସ୍ତରର ଛାତ୍ରଛାତ୍ରୀ ଏଥିରେ ଭାଗ ନେଇପାରୁ ନ ଥିବାରୁ ଉଦବେଗ ପ୍ରକାଶ କରିଥିଲେ । ଗରିବ ଛାତ୍ରଛାତ୍ରୀମାନେ ଏଥିପାଇଁ ଅଧିକ ସମସ୍ୟା ଭୋଗୁଥିବା ଏବଂ ଡାକ୍ତରୀ ପଢ଼ିବାରୁ ବଞ୍ଚିତ ହେଉଥିବା ନେଇ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ । ଜାତୀୟସ୍ତରର ଅନ୍ୟ ପ୍ରବେଶିକା ପରୀକ୍ଷା ଏବଂ ୟୁପିଏସସି ପରୀକ୍ଷାରେ ମଧ୍ୟ ସମାନ ସମସ୍ୟା ରହୁଥିବା ମୁଖ୍ୟମନ୍ତ୍ରୀ ଜଣାଇଥିଲେ ।
ତାମିଲନାଡୁ ମୁଖ୍ୟମନ୍ତ୍ରୀ ଶ୍ରୀ ଷ୍ଟାଲିନ୍ ନବୀନଙ୍କୁ ଚିଠି ଲେଖି ସମାନ କଥା ଦୋହରାଇଛନ୍ତି । ଗ୍ରାମାଞ୍ଚଳ ମେଧାବୀ ଛାତ୍ରଛାତ୍ରୀମାନେ ନିଟ୍ ପରୀକ୍ଷାରେ ଯୋଗ୍ୟତା ହାସଲ କରିବାରେ ରହୁଥିବା ପ୍ରତିବନ୍ଧକ ଦୂର କରିବା ପାଇଁ ପରୀକ୍ଷା ପ୍ରଣାଳୀରେ ପରିବର୍ତ୍ତନର ଆବଶ୍ୟକତା ସମ୍ପର୍କରେ ଉଲ୍ଲେଖ କରିଛନ୍ତି । ସବୁ ବର୍ଗର ଛାତ୍ରଛାତ୍ରୀମାନଙ୍କୁ ଉପଯୁକ୍ତ ସୁଯୋଗ ଦେବାକୁ ସେ ମଧ୍ୟ ଦାବି କରିଛନ୍ତି ।
ଡିଏମକେ ନେତ୍ରୀ କାନିମୋଝି ନବୀନଙ୍କ ସହ ଏହି ପ୍ରସଙ୍ଗରେ ବିସ୍ତୃତ ଆଲୋଚନା କରିଥିଲେ । ଏହି ସାକ୍ଷାତକାର ବେଶ୍ ସୌହାର୍ଦ୍ଧ୍ୟପୂର୍ଣ୍ଣ ଥିବା ଜଣାପଡ଼ିଛି ।
ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ କାନିମୋଝି ଭେଟିବା ଏବଂ ନିଟ୍ ସମସ୍ୟା ନେଇ ତାମିଲନାଡୁ ମୁଖ୍ୟମନ୍ତ୍ରୀ ଷ୍ଟାଲିନ୍ ଙ୍କ ଚିଠି ଦେବା ରାଜନୈତିକ ମହଲରେ ଗୁରୁତ୍ୱ ବହନ କରୁଛି । ଏଭଳି ଜାତୀୟ ପ୍ରସଙ୍ଗରେ ନବୀନଙ୍କ ନେତୃତ୍ୱକୁ ଆଞ୍ଚଳିକ ଦଳ ଓ ସେମାନଙ୍କ ସରକାର ସମର୍ଥନ ଦେଉଥିବାରୁ ଆଗାମୀ ଦିନରେ ଏକ ଭିନ୍ନ ସମୀକରଣ ନେଇ ଚର୍ଚ୍ଚା ହେଉଛି ।