ଭୁବନେଶ୍ୱର: ବରିଷ୍ଠ ସାମ୍ବାଦିକ ନବୀନ ଦାସଙ୍କ ପୁଅ ମନୀଷ ଅନୁରାଗଙ୍କ ମୃତ୍ୟୁ ରହସ୍ୟ ଘେରକୁ ଚାଲିଆସିଛି । ପାତ୍ରପଡ଼ାସ୍ଥିତ ସାଉଥ ସିଟି ହୋଟେଲ୍ ଓ ବାର୍ କୁ ଦୁଇ ଜଣ ସାଙ୍ଗଙ୍କ ସହ ଆସି ସେ ରାତି ୪ଟା ପର୍ଯ୍ୟନ୍ତ ରହିଥଇବା କୁହାଯାଉଛି । ମନୀଷ କିନ୍ତୁ ସେଠାରୁ ଏକା ବାହାରି ଥିଲେ ବୋଲି ହୋଟେଲର କିଛି କର୍ମଚାରୀ ପୁଲିସ ଓ ଗଣମାଧ୍ୟମକୁ କହିଛନ୍ତି ।
ଅନ୍ୟପକ୍ଷରେ ତାଙ୍କ ପୁଅକୁ ସାଙ୍ଗମାନେ ଭୋଜି ପାଇଁ ଡାକିନେଇ ହତ୍ୟା କରିଥିବା ବରିଷ୍ଠ ସାମ୍ବାଦିକ ନବୀନ ଦାସ ଅଭିଯୋଗ କରିଛନ୍ତି । ଶେଷଥର ପାଇଁ ରାତି ୪.୧୧ ରେ ପୁଅ ତାଙ୍କୁ ଫୋନ୍ କରି ସାଙ୍ଗମାନେ ମାରଧର କରୁଥିବା ଜଣାଇଥିଲେ । ଏହାପରେ ଫୋନ୍ ସୁଇଚ୍ ଅଫ୍ ହୋଇଯାଇଥିଲା ।
ହୋଟେଲ୍ କର୍ମଚାରୀଙ୍କ ବୟାନ ଓ ମନୀଷ ବାପାଙ୍କ କଥାକୁ ପୃଥକ୍ ଭାବେ ଦେଖିଲେ, ମନୀଷଙ୍କର ଶେଷ ଠିକଣା ଥିଲା ହୋଟେଲ ସାଉଥ୍ ସିଟି ଏବଂ ଶେଷ ଫୋନ୍ କଲ୍ ର ସମୟ ଥିଲା ରାତି ୪.୧୧ ମିନିଟ୍ । ୪.୧୧ ରୁ ୫ ଟା ଭିତରେ ଅଘଟଣ ଘଟିଛି । ବାପାଙ୍କ ଅଭିଯୋଗ ସତ ହୋଇଥିଲେ ତାଙ୍କୁ ସାଙ୍ଗମାନେ ହତ୍ୟା କରି ସେଇ ପୋଖରୀରେ ଫିଙ୍ଗି ଦେଇପାରିଥାନ୍ତି । ନଚେତ୍ ପୋଖରୀରେ ବୁଡ଼ି ତାଙ୍କର ମୃତୁ୍ୟ ହୋଇଥାଇପାରେ ।
ପୋଷ୍ଟମର୍ଟମ, ଭିସେରା ଓ ଡାଏଟମ୍ ପରୀକ୍ଷାରୁ ଏହା ସ୍ପଷ୍ଟ ହୋଇଯିବ ବୋଲି ଡିସିପି ଉମାଶଙ୍କର ଦାଶ କହିଛନ୍ତି । ଅନ୍ୟପକ୍ଷରେ ମନୀଷଙ୍କ ଶରୀରରେ କୌଣସି କ୍ଷତ ଚିହ୍ନ ନାହିଁ ବୋଲି ପ୍ରାଥମିକ ଭାବେ ଜଣାପଡ଼ିଥିବାରୁ ଘଟଣା ରହସ୍ୟଜନକ ମନେହେଉଛି ।
ତଦନ୍ତ କାଳରେ ପୁଲିସକୁ ଆଉ ଏକ ଗୁରୁତ୍ୱପୂର୍ଣ୍ଣ ସୁରାକ୍ ମିଳିଛି । ପଟିଆ ଅଞ୍ଚଳରୁ ମନୀଷ ତାଙ୍କ ସାଙ୍ଗମାନଙ୍କ ସାଙ୍ଗରେ ପାତ୍ରପଡ଼ା ସାଉଥ୍ ସିଟି ହୋଟେଲ୍ ପର୍ଯ୍ୟନ୍ତ ଏକ ଧଳା ରଙ୍ଗର ବାଲେନୋ କାର୍ ରେ ଆସିଥିଲେ । ଏହି କାର୍ ଟି କାହାର ପୁଲିସ ତାହାର ସନ୍ଧାନ କରୁଛି । ଇନଫୋସିଟି, ତମାଣ୍ଡୋ ଓ ଖଣ୍ଡଗିରି ପୁଲିସକୁ ନେଇ ଗଠିତ ସ୍ୱତନ୍ତ୍ର ସ୍କ୍ୱାଡ୍ ଘଟଣାର ଛାନଭିନ୍ କରୁଛନ୍ତି ।
ଇତିମଧ୍ୟରେ ସାଉଥ୍ ସିଟି ହୋଟେଲ୍ ର ବାର୍ କୁ ପୁଲିସ ସିଲ୍ କରିଥିଲା ବେଳେ ହୋଟେଲ୍ ସିସିଟିଭି କ୍ୟାମେରାକୁ ଜବତ କରି ତନ୍ନ ତନ୍ନ କରି ଯାଞ୍ଚ କରୁଛି । ପୁଲିସକୁ ବର୍ତ୍ତମାନ ସୁଦ୍ଧା ଯଥେଷ୍ଟ ସୂଚନା ହସ୍ତଗତ ହୋଇଥିବା କୁହାଯାଉଛି । ଏହି ଘଟଣାରେ ପୁଲିସ ୫ ଜଣଙ୍କୁ ଅଟକ ରଖି ପଚରାଉଚୁରା କରୁଛି । ତେବେ ଡିସିପି ସବୁ ତଥ୍ୟକୁ ଗୋପନ ରଖିଛନ୍ତି । ତଦନ୍ତ ସମ୍ପୂର୍ଣ୍ଣ ହେଲା ପରେ ଯାହା କୁହାଯିବ ବୋଲି ଗଣମାଧ୍ୟମକୁ କହିଛନ୍ତି ।
