ଭୁବନେଶ୍ୱର: ଲେଡି ବ୍ଲାକମେଲର ଅର୍ଚ୍ଚନା ନାଗ ଗିରଫର ୫ ଦିନ ପରେ ଆଜି ପୁଲିସ ମୁହଁ ଖୋଲିଛି । ଭୁବନେଶ୍ୱର ଡିସିପି ପ୍ରତୀକ ସିଂ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, ଅର୍ଚ୍ଚନାଙ୍କ ବିରୋଧରେ ଗତ ୨ ତାରିଖରେ ଖଣ୍ଡଗିରି ଥାନାରେ ଜଣେ ଯୁବତୀ ଅଭିଯୋଗ କରିଥିଲେ । ବ୍ୟକ୍ତିଗତ ଫଟୋକୁ ରଖି ଅର୍ଚ୍ଚନା ବ୍ଲାକମେଲ୍ କରୁଥିବା ତାଙ୍କର ଅଭିଯୋଗ ଥିଲା । ଅର୍ଚ୍ଚନାଙ୍କ ନାଁରେ କେସ୍ ନଂ ୪୯୬/୨୨ ଏବଂ ଦଫା ୩୮୭, ୪୨୦, ୫୦୬ ଓ ଆଇଟି ଆକ୍ଟରେ ମାମଲା ରୁଜୁ ହୋଇଛି ।
ଡିସିପି କହିଛନ୍ତି ଘଟଣାର ସବୁ ଦିଗରୁ ତଦନ୍ତ ଆରମ୍ଭ ହୋଇଛି । ଅର୍ଚ୍ଚନାଙ୍କ ଘରୁ ପେନଡ୍ରାଇଭ, ଲାପଟପ୍, ପାସବୁକ୍ ଜବତ ହୋଇଛି । ତାଙ୍କର ବ୍ୟାଙ୍କ କାରବାର ସମ୍ପର୍କିତ ତଥ୍ୟ ଆରବିଆଇକୁ ମଗାଯାଇଛି । କେଉଁମାନେ ବ୍ଲାକମେଲର ଶିକାର ହେଉଛନ୍ତି ତାହାର ତଦନ୍ତ ହେଉଛି । ଅର୍ଚ୍ଚନାଙ୍କ ସ୍ୱାମୀଙ୍କୁ ହାଜର ହେବା ଲାଗି ନୋଟିସ୍ ହୋଇଛି । ଦରକାର ପଡ଼ିଲେ ଅର୍ଚ୍ଚନାଙ୍କୁ ରିମାଣ୍ଡରେ ଅଣାଯିବ ।
ସାମ୍ବାଦିକ ସମ୍ମିଳନୀରେ ଡିସିପିଙ୍କ ଏହି ମାପଚୁପା ବୟାନରୁ କୌଣସି ନୂଆ ତଥ୍ୟ ଉନ୍ମୋଚିତ ହୋଇ ନ ଥିଲେ ମଧ୍ୟ ମାମଲାଟି ସାଂଘାତିକ ଝଡ ସୃଷ୍ଟି କରିସାରିଲାଣି । ଅର୍ଚ୍ଚନାଙ୍କ ଇମେଲ୍ ଆଇଡିରେ ୬୪ ଜଣ ରାଜନେତାଙ୍କ ଅଶ୍ଲୀଳ ଫଟୋ ରହିଥିବା କୁହାଯାଉଥିବାରୁ ମାମଲାର ଗମ୍ଭୀରତା ବାରି ହୋଇଗଲାଣି । ମିଳିଥିବା ସୂଚନା ଅନୁଯାୟୀ, ଅର୍ଚ୍ଚନା ୨୦୧୮ ରୁ ହାଇପ୍ରୋଫାଇଲ୍ ସେକ୍ସ ରାକେଟ୍ ଚଳାଇଥିଲେ ଏବଂ ପ୍ରଭାବଶାଳୀ ଲୋକଙ୍କୁ ବ୍ଲାକମେଲିଂ କରି ପ୍ରଚୁର ଅର୍ଥ ଶୋଷୁଥିଲେ । କୋଲକତା ଓ ମୁମ୍ବାଇରୁ ସୁନ୍ଦରୀ ଯୁବତୀଙ୍କୁ ଆଣି ଏହି ବେପାର କରୁଥିଲେ ।
ତାଙ୍କ ଜାଲରେ ପଡିଥିବା ଜଣ ଜଣ ପ୍ରଭାବଶାଳୀ ନେତା, ଗହଣା ବ୍ୟବସାୟୀ, ବିଲଡର ଏବଂ ସରକାରୀ ଅଧିକାରୀଙ୍କ ଏକାଧିକ ଫଟୋ ଏବେ ଗଣମାଧ୍ୟମରେ ଘୂରି ବୁଲୁଛି । କିଛି ନେତା ଗଣମାଧ୍ୟମରେ ନିଜକୁ ବଞ୍ଚାଇବାକୁ ସେହି ମହିଳାଙ୍କୁ ଆଦୌ ଚିହ୍ନି ନାହାନ୍ତି ବୋଲି ସଫେଇ ଦେବାକୁ ଆରମ୍ଭ କରିଛନ୍ତି ।
ଯେମିତି କି ଅର୍ଚ୍ଚନା ଓ ତାଙ୍କ ସ୍ୱାମୀ ଜଗବନ୍ଧୁଙ୍କ ସହ କ୍ୟାବିନେଟ୍ ମନ୍ତ୍ରୀ ଜଗନ୍ନାଥ ସାରକାଙ୍କର ଗଣ୍ଡା ଗଣ୍ଡା ଫଟୋ ସୋସିଆଲ୍ ମିଡିଆରେ ଭାଇରାଲ୍ ହୋଇଥିବା ବେଳେ ସେ ସିଧା ସିଧା ତାହାକୁ ଉଡ଼େଇ ଦେଇଛନ୍ତି । ସେ କିଏ ମୁଁ ଜାଣିନି ବୋଲି ଗୋଟିଏ ପଦରେ ଛିଣ୍ଡାଇ ଦେଇଛନ୍ତି । ବିଜେପିର ବରିଷ୍ଠ ନେତା ତଥା ସାଂସଦ ଜୁଏଲ୍ ଓରାମ୍ ମଧ୍ୟ ଅନୁରୂପ ସଫେଇ ଦେଇଛନ୍ତି ।
ବିଜେପିର ଆଉ ଜଣେ ବରିଷ୍ଠ ନେତା କନକ ବର୍ଦ୍ଧନ ସିଂହଦେଓ ଏବଂ ତାଙ୍କ ପତ୍ନୀ ସାଂସଦ ସଙ୍ଗୀତା ସିଂହଦେଓଙ୍କ ବିରୋଧରେ ରାଣୀ ମହୁମାଛି ଅର୍ଚ୍ଚନା ୨୦୨୦ ନଭେମ୍ବର ୨୫ ତାରିଖରେ କ୍ୟାପିଟାଲ୍ ଥାନାରେ ଅଭିଯୋଗ କରିଥିଲେ । ପୁଲିସ ସେ ସଂକ୍ରାନ୍ତରେ ଏକ ମାମଲା ମଧ୍ୟ ରୁଜୁ କରିଥିଲା । ମାତ୍ର ସେହି କେସ୍ ଟି କ’ଣ ଏବଂ ତାହାର ତଦନ୍ତ କାହିଁକି ଅଟକିଲା ତାହା ଏ ପର୍ଯ୍ୟନ୍ତ ସ୍ପଷ୍ଟ ହୋଇପାରୁନାହିଁ ।
ଆଉ ଜଣେ ପ୍ରଭାବଶାଳୀ ନେତା ତଥା ପୂର୍ବତନ ମନ୍ତ୍ରୀ ମଧ୍ୟ ଅର୍ଚ୍ଚନାଙ୍କ ହନିଟ୍ରାପ୍ ରେ ଫସିଥିବା ଜଣାପଡ଼ିଛି । ଗତବର୍ଷ ମଞ୍ଚେଶ୍ୱର ଥାନାକୁ ଏହି କେସ୍ ଯାଇଥିଲା । ମାତ୍ର ତତ୍କାଳୀନ ବାଚସ୍ପତି ସୂର୍ଯ୍ୟ ନାରାୟଣ ପାତ୍ରଙ୍କ ହସ୍ତକ୍ଷେପରେ ମାମଲା ରଫାଦଫା ହୋଇଥିବା ଚର୍ଚ୍ଚା ହେଉଛି ।
ରାଣୀ ମହୁମାଛି ଅର୍ଚ୍ଚନାଙ୍କ ସହ ସୂର୍ଯ୍ୟ ପାତ୍ରଙ୍କର କି ପ୍ରକାରର ସମ୍ପର୍କ ଥିଲା ତାହାକୁ ନେଇ ବେଶୀ ଚର୍ଚ୍ଚା ହେଉଛି । ଅର୍ଚ୍ଚନାଙ୍କ ସତ୍ୟବିହାର ରାଜ ଉଆସ ଭଳି ଘରର ପ୍ରତିଷ୍ଠା ଉତ୍ସବରେ ସେ ମୁଖ୍ୟ ଅତିଥି ଥିଲେ । ସେଦିନ ଅର୍ଚ୍ଚନା ଏବଂ ତାଙ୍କ ସ୍ୱାମୀ ଶ୍ରୀ ପାତ୍ରଙ୍କୁ ଭବ୍ୟ ସ୍ୱାଗତ କରିଥିଲେ । ତାଙ୍କୁ ଏକ ବଡ଼ ପିତ୍ତଳ ଥାଳିରେ ଠିଆ କରାଇ ତାଙ୍କ ଗୋଡକୁ ଫୁଲ ଚନ୍ଦନ ପାଣିରେ ଧୋଇଥିଲେ । ସେହି ପ୍ରତିଷ୍ଠା ଉତ୍ସବରେ ବହୁ ନାମୀଦାମୀ ରାଜନେତା, ବ୍ୟବସାୟୀ, ଖଣି ମାଲିକ, ଫିଲ୍ମ ପ୍ରଯୋଜକ ଯୋଗ ଦେଇଥିଲେ । ଅତିଥିଙ୍କୁ ୭୦ ପ୍ରକାରର ବ୍ୟଞ୍ଜନ ପରସା ଯାଇଥିଲା । ତାକୁ ପ୍ରସ୍ତୁତ କରିବା ପାଇଁ କୋଲକତାରୁ ରୋଷେୟା ଆସିଥିଲେ ।
ତଦନ୍ତରେ ସାମିଲ ଜଣେ ପୁଲିସ ଅଧିକାରୀଙ୍କ ଗୋପନ ସୂଚନା ଅନୁଯାୟୀ, ଅର୍ଚ୍ଚନାଙ୍କ ସହ ଜଣେ ବରିଷ୍ଠ ରାଜନେତାଙ୍କର ଅନ୍ତରଙ୍ଗ ମୁହୁର୍ତ୍ତର ଏକ ଭିଡ଼ିଓ ରହିଛି । ଦେଢ଼ଘଣ୍ଟା ଅବଧିର ଏହି ଭିଡିଓକୁ ଦେଖାଇ ଅର୍ଚ୍ଚନା ତାଙ୍କୁ ପରବର୍ତ୍ତୀ ସମୟରେ ବ୍ଲାକମେଲିଂ କରିଥିଲେ । ନିଜର ଇଜ୍ଜତ ଓ ପଦ ବଞ୍ଚାଇବା ପାଇଁ ସେ ଅର୍ଚ୍ଚନାଙ୍କ ଦାବି ମୁତାବକ ୫ କୋଟି ଟଙ୍କା ଗଣି ଦେଇଥିଲେ । ଏହି ନେତାଙ୍କ ନାଁ ସଂପୃକ୍ତ ପୁଲିସ ଅଧିକାରୀ ଗୋପନ ରଖିଥିଲେ ମଧ୍ୟ ପରବର୍ତ୍ତୀ ସମୟରେ ଏହି ଘଟଣା ତାଙ୍କ ପଦ ନେଇଯାଇଥିବା ଇଙ୍ଗିତ କରିଛନ୍ତି ।
ଅନ୍ୟପକ୍ଷରେ ରାଜଧାନୀର ଜଣେ ପ୍ରତିଷ୍ଠିତ ସୁନା ବ୍ୟବସାୟୀଙ୍କୁ ହନିଟ୍ରାପରେ ଫସାଇ ଅର୍ଚ୍ଚନା ୩ କୋଟି ଟଙ୍କା ନେଇଥିବା ବେଳେ ଜଣେ ପ୍ରତିଷ୍ଠିତ ହୋଟେଲ ବ୍ୟବସାୟୀଙ୍କଠାରୁ ମଧ୍ୟ କୋଟି କୋଟି ଟଙ୍କା ନେଇଛନ୍ତି । ସଂପୃକ୍ତ ବ୍ୟବସାୟୀ ତାଙ୍କ ଘରେ ବିଦେଶୀ ଆସବାବପତ୍ର ଖଞ୍ଜି ଦେଇଥିବା ବେଳେ ତାଙ୍କୁ ମୁମ୍ବାଇ ନେଇ ଅତ୍ୟାଧୁନିକ ଲେଜର ଚିକିତ୍ସା ଦ୍ୱାରା ତାଙ୍କ ଶରୀରକୁ ଅଧିକ ଆକର୍ଷଣୀୟ କରାଇଥିଲେ ।
ମାଳ ମାଳ ନେତା, ବ୍ୟବସାୟୀ, ବିଲଡର ଏବଂ ଅଧିକାରୀଙ୍କ ଛଡ଼ା ଅର୍ଚ୍ଚନାଙ୍କ ଗରାଖ ତାଲିକାରେ ଏକାଧିକ ପୁଲିସ ଇନସପେକ୍ଟର/ ଏସିପି ବି ଅଛନ୍ତି । ଅର୍ଚ୍ଚନା ସେମାନଙ୍କ ସହାୟତାରେ ନିଜର କଳାସାମ୍ରାଜ୍ୟକୁ ଆହୁରି ବିସ୍ତାରିତ କରିଥିବା ଏକ ସୂତ୍ରରୁ ସୂଚନା ମିଳିଛି ।