ଭୁବନେଶ୍ୱର: ଭାରତୀୟ ଜାତୀୟ କଂଗ୍ରେସର ନୂଆ ସଭାପତି ଭାବେ ମଲ୍ଲିକାର୍ଜୁନ ଖଡଗେ ନିର୍ବାଚିତ ହୋଇଛନ୍ତି । ମୋଟ ୯, ୩୮୫ ଭୋଟ ମଧ୍ୟରୁ ଖଡଗେଙ୍କୁ ୭, ୮୯୭ ଖଣ୍ଡ ଭୋଟ ମିଳିଛି । ତାଙ୍କ ବିପକ୍ଷରେ ପ୍ରାର୍ଥୀ ହୋଇଥିବା ଶଶୀ ଥରୁରଙ୍କୁ ମିଳିଛି ମାତ୍ର ୧୦୭୨ ଭୋଟ । ୪୧୬ ଭୋଟ ନାଚକ ହୋଇଛି । ନିର୍ବାଚନ ଅଧିକାରୀ ମଧୁସୂଦନ ମିସ୍ତ୍ରୀ ବିଧିବଦ୍ଧ ଭାବେ ଏହି ଫଳାଫଳ ଘୋଷଣା କରିଛନ୍ତି ।
ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ଜାଗାରେ କଂଗ୍ରେସର ମଙ୍ଗୁଆଳ ହୋଇଛନ୍ତି ଖଡଗେ । ଦୀର୍ଘ ୨୪ ବର୍ଷ ପରେ ଭାରତୀୟ ଜାତୀୟ କଂଗ୍ରେସର ସେ ହୋଇଛନ୍ତି ଅଣଗାନ୍ଧୀ ସଭାପତି । ୧୯୯୭ରେ ସୀତାରାମ କେଶରୀ କଂଗ୍ରେସ ସଭାପତି ନିର୍ବାଚିତ ହୋଇଥିଲେ । ୨୦୦୦ ମସିହାରେ ସୋନିଆ ଗାନ୍ଧୀ ସଭାପତି ନିର୍ବାଚିତ ହୋଇଥିଲେ । ୨୦୧୭ ରୁ ୨୦୧୯ ପର୍ଯ୍ୟନ୍ତ ରାହୁଲ ଗାନ୍ଧୀ ଦଳର ସଭାପତି ଥିଲେ । ୨୦୧୯ ସାଧାରଣ ନିର୍ବାଚନରେ ଦଳର ବିପର୍ଯ୍ୟୟ ଯୋଗୁଁ ସେ ଦାୟିତ୍ୱ ଛାଡ଼ିଦେଇଥିଲେ । ସେବେଠାରୁ ସୋନିଆ ଗାନ୍ଧୀ ଅନ୍ତରୀଣ ସଭାପତି ଭାବେ ଦାୟିତ୍ୱ ତୁଲାଉଛନ୍ତି ।
କଂଗ୍ରେସର ୧୩୭ ବର୍ଷ ଇତିହାସରେ ଏହା ଷଷ୍ଠ ନିର୍ବାଚନ । ସଭାପତି ଭାବେ ନିର୍ବାଚିତ ହୋଇଥିବା ମଲ୍ଲିକାର୍ଜୁନ ଖଡଗେ ଗାନ୍ଧୀ ପରିବାରର ଏକାନ୍ତ ଅନୁଗତ ଭାବେ ଜଣାଶୁଣା । ତାଙ୍କୁ ଗାନ୍ଧୀ ପରିବାରର ‘ଅନଅଫିସିଆଲ୍ ଅଫିସିଆଲ୍ କ୍ୟାଣ୍ଡିଡେଟ୍’ କୁହାଯାଉଥିଲା । ଦଳର ବରିଷ୍ଠ ନେତାମାନଙ୍କର ସମର୍ଥନରେ ସେ ପ୍ରାର୍ଥୀ ହୋଇଥିଲେ । ଦଳରେ ପରିବର୍ତ୍ତନ ଆଣିବା ପାଇଁ ଶଶୀ ଥରୁର ନିଜେ ନିଜେ ପ୍ରାର୍ଥୀ ହୋଇଥିଲେ ।
ଖଡଗେ ଏକତରଫା ନିର୍ବାଚିତ ହେବା ପରେ ଶଶୀ ଥରୁର ତାଙ୍କୁ ଅଭିନନ୍ଦନ ଜଣାଇ ଦଳର ପୁନରୁଦ୍ଧାର କାର୍ଯ୍ୟ ଆଜିଠାରୁ ଆରମ୍ଭ ହେଲା ବୋଲି କହିଛନ୍ତି । ଭାରତୀୟ ଜାତୀୟ କଂଗ୍ରେସର ସଭାପତି ହେବା ବହୁତ ବଡ଼ ସମ୍ମାନ ଓ ଦାୟିତ୍ୱର କଥା । ଖଡଗେ ତାଙ୍କ କାର୍ଯ୍ୟରେ ସଫଳ ହେବେ ବୋଲି ସେ କାମନା କରିଛନ୍ତି ।