ଭୁବନେଶ୍ୱର: ବିଜେଡିରୁ ରାଜ୍ୟସଭାକୁ ଯାଇଥିଲେ । ଇସ୍ତଫା ଦେଇ ବିଜେପିକୁ ଚାଲିଗଲେ । ଏବେ ବିଜେପି ତାଙ୍କୁ ରାଜ୍ୟସଭା ପ୍ରାର୍ଥୀ କରିଛି । ଅର୍ଥାତ୍ ମମତା ମହାନ୍ତଙ୍କ ଜାଗାରେ ମମତା ମହାନ୍ତ ଯିବେ ରାଜ୍ୟସଭା । ବିଜେଡି ରାଜ୍ୟସଭା ପଦରୁ ଇସ୍ତଫା ଦେଇ ବିଜେପିରେ ମିଶିବା ପରେ ତାଙ୍କ ରାଜ୍ୟସଭା ପ୍ରାର୍ଥୀତ୍ୱ ଏକ ପ୍ରକାର ସ୍ପଷ୍ଟ ଥିଲା କହିଲେ ଚଳେ । କାରଣ ଅନ୍ୟ ରାଜ୍ୟରେ ଏଭଳି ଘଟଣାରେ ବିଜେପିର ରଣନୀତି ସେୟା ହିଁ ଥିଲା ।
ମୟୁରଭଞ୍ଜ ଜିଲ୍ଲା କୁଡୁମୀ ସମ୍ପ୍ରଦାୟର ନେତ୍ରୀ ମମତା ମହାନ୍ତଙ୍କୁ ୨୦୨୦ ଏପ୍ରିଲ୍ ରେ ବିଜେଡି ରାଜ୍ୟସଭା ପଠାଇଥିଲା । ୨୦୨୬ ରେ ତାଙ୍କର କାର୍ଯ୍ୟକାଳ ସରିବାକୁ ଥିଲେ ମଧ୍ୟ ଗତ ଜୁଲାଇ ୩୧ ତାରିଖରେ ସେ ଅପ୍ରତ୍ୟାଶିତ ଭାବେ ରାଜ୍ୟସଭା ସଦସ୍ୟ ପଦରୁ ଇସ୍ତଫା ଦେଇଥିଲେ । ଏଥିସହ ବିଜେଡିର ପ୍ରାଥମିକ ସଦସ୍ୟ ପଦରୁ ମଧ୍ୟ ଇସ୍ତଫା ଦେଇଥିଲେ । ମମତାଙ୍କୁ ମନାଇ ରାଜ୍ୟସଭାରେ ନିଜର ସଂଖ୍ୟା ବଢ଼ାଇବାକୁ ବିଜେପିର ଏହା ଗେମ୍ ପ୍ଲାନ୍ ବୋଲି ଚର୍ଚ୍ଚା ହୋଇଥିଲା ।
ଏହି ଚର୍ଚ୍ଚାକୁ ସତ ବୋଲି ଅବିଳମ୍ବେ ପ୍ରମାଣ କରିଥିଲେ ମମତା । ଅଗଷ୍ଟ ୧ରେ ଦିଲ୍ଲୀ ବିଜେପି ମୁଖ୍ୟାଳୟରେ ସାଧାରଣ ସମ୍ପାଦକ ଅରୁଣ ସିଂହ, ପ୍ରଭାରୀ ବିଜୟପାଲ୍ ସିଂ ତୋମାର, ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଏବଂ ସାଂସଦମାନଙ୍କ ଉପସ୍ଥିତିରେ ସେ ବିଜେପିରେ ମିଶିଥିଲେ ।
ମମତାଙ୍କ ଇସ୍ତଫା ପରେ ଖାଲି ପଡ଼ିଥିବା ଆସନଟି ବିଜେପି ହାତକୁ ଚାଲିଯାଇଥିବାରୁ ନେତୃତ୍ୱ ଯାହାଙ୍କୁ ଚାହିଁଥାନ୍ତେ ତାଙ୍କୁ ପ୍ରାର୍ଥୀ କରିପାରିଥାନ୍ତେ । ଏଥିପାଇଁ ମନମୋହନ ସାମଲ, ସମୀର ମହାନ୍ତି ଆଦି ନେତାମାନଙ୍କ ନାଁ ଚର୍ଚ୍ଚା ହୋଇଥିଲା । ମାତ୍ର ଜାତୀୟସ୍ତରରେ ଦଳୀୟ ରଣନୀତି ଦୃଷ୍ଟିରୁ ମମତାଙ୍କୁ ବିଜେପି ପ୍ରାର୍ଥୀ କରିବ ବୋଲି ସ୍ପଷ୍ଟ ଜଣାପଡୁଥିଲା ।
ବିଧାନସଭାରେ ବିଜେପିର ସଂଖ୍ୟା ଦୃଷ୍ଟିରୁ ମମତା ମହାନ୍ତିଙ୍କ ବିଜୟ ସୁନିଶ୍ଚିତ ଥିବାରୁ ରାଜ୍ୟସଭାରେ ସେ ତାଙ୍କର ୬ ବର୍ଷର କାର୍ଯ୍ୟକାଳ ସମ୍ପୂର୍ଣ୍ଣ କରିବେ ।
