ଭୁବନେଶ୍ୱର: ଦିଲ୍ଲୀ ଡେପୁଟେସନ୍ ରେ ଥିବା ୧୯୯୦ ବ୍ୟାଚ୍ ଆଇଏଏସ୍ ମନୋଜ ଆହୁଜାଙ୍କୁ ଆଜି କେନ୍ଦ୍ର ସରକାର ତାଙ୍କର ହୋମ୍ କ୍ୟାଡର ଓଡ଼ିଶାକୁ ଫେରାଇ ଦେଇଛନ୍ତି । ରାଜ୍ୟର ପ୍ରଥମ ବିଜେପି ସରକାରଙ୍କ ଅନୁରୋଧକ୍ରମେ କେନ୍ଦ୍ର ସରକାର ଏହି ପଦକ୍ଷେପ ନେଇଥିବାରୁ ଶ୍ରୀ ଆହୁଜା ଓଡ଼ିଶାର ପରବର୍ତ୍ତୀ ମୁଖ୍ୟ ଶାସନ ସଚିବ ହୋଇପାରନ୍ତି ବୋଲି ଏକପ୍ରକାର ସ୍ପଷ୍ଟ ହେଉଛି । ଏଥିସହ ବର୍ତ୍ତମାନର ମୁଖ୍ୟ ଶାସନ ସଚିବ ପ୍ରଦୀପ ଜେନାଙ୍କ କାର୍ଯ୍ୟକାଳ ବୃଦ୍ଧିକୁ ନେଇ ଚାଲିଥିବା ଆଲୋଚନାରେ ଅନ୍ତ ଘଟିବାକୁ ଯାଉଥିଲେ ମଧ୍ୟ ତାଙ୍କୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତି ମିଳିପାରେ ବୋଲି କୁହାଯାଉଛି ।
ମନୋଜ ଆହୁଜା ଏବେ କେନ୍ଦ୍ର ସରକାରଙ୍କ କୃଷି ଓ କୃଷକ କଲ୍ୟାଣ ବିଭାଗର ସଚିବ ଭାବେ କାର୍ଯ୍ୟ କରୁଛନ୍ତି । ତାଙ୍କର କେନ୍ଦ୍ରୀୟ ଡେପୁଟେସନ୍ ଅବଧିକୁ ସମାପ୍ତ କରି ଓଡ଼ିଶା ଫେରାଇଦେବାକୁ ରାଜ୍ୟର ବିଜେପି ସରକାର କେନ୍ଦ୍ରକୁ ଅନୁରୋଧ କରିଥିଲେ । ଶ୍ରୀ ଆହୁଜା ହେଉଛନ୍ତି ପ୍ରଥମ ଆଇଏଏସ୍ ଅଫିସର, ଯାାହାଙ୍କୁ ରାଜ୍ୟର ପ୍ରଥମ ବିଜେପି ସରକାର ଦିଲ୍ଲୀରୁ ଫେରାଇ ଆଣିବାକୁ ଚାହିଁଥିଲେ । ରାଜ୍ୟ ସରକାରଙ୍କ ଅନୁରୋଧକୁ ନିଯୁକ୍ତି ସଂକ୍ରାନ୍ତ କେନ୍ଦ୍ର କ୍ୟାବିନେଟ୍ କମିଟି ଆଜି ବିଚାର କରି ତାଙ୍କୁ ଓଡ଼ିଶା ଫେରିବାକୁ ଅନୁମତି ଦେଇଛନ୍ତି ।
ଜଣେ ଦକ୍ଷ ଆଇଏଏସ୍ ଅଫିସର ଭାବେ ଶ୍ରୀ ଆହୁଜାଙ୍କର ଯଥେଷ୍ଟ ସୁନାମ ରହିଛି । ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ବିଭିନ୍ନ ବିଭାଗରେ ସେ ଅତ୍ୟନ୍ତ ଦକ୍ଷତାର ସହ କାର୍ଯ୍ୟ କରିଛନ୍ତି । ଆସନ୍ତା ଡିସେମ୍ବରରେ ସେ ଚାକିରିରୁ ଅବସର ନେବେ । ଅବଶ୍ୟ ପରବର୍ତ୍ତୀ ସମୟରେ ରାଜ୍ୟ ସରକାର ତାଙ୍କର କାର୍ଯ୍ୟକାଳକୁ ବୃଦ୍ଧି କରିପାରନ୍ତି ।
ଏଥିସହ ଓଡ଼ିଆ ଅସ୍ମିତାର ନାରା ଦେଇ ସରକାରକୁ ଆସିଥିବା ବିଜେପି ଅଣଓଡ଼ିଆ ଅଫିସରଙ୍କୁ କମ ଗୁରୁତ୍ୱ ଦେବେ ବୋଲି କିଛି ମହଲରେ ଯେଉଁ ବିଶ୍ୱାସ ଥିଲା, ତାହା ଭୁଲ୍ ପ୍ରମାଣିତ ହେବାକୁ ଯାଉଛି । ରାଜ୍ୟର ସମସ୍ତ ପ୍ରଶାସନିକ କାର୍ଯ୍ୟରେ ଓଡିଆ-ଅଣଓଡ଼ିଆ ଭେଦଭାବ ନ ରଖି ଟିମୱାର୍କ ଭାବେ କାମ କରିବାକୁ ରାଜ୍ୟର ବିଜେପି ସରକାର ନୀତିଗତ ନିଷ୍ପତ୍ତି ନେଇଥିବା ଜଣାପଡ଼ିଛି ।
ବର୍ତ୍ତମାନର ମୁଖ୍ୟ ଶାସନ ସଚିବ ପ୍ରଦୀପ ଜେନାଙ୍କର ୬ ମାସିଆ ବର୍ଦ୍ଧିତ କାର୍ଯ୍ୟକାଳ ଆସନ୍ତା ୩୦ ତାରିଖରେ ଶେଷ ହେଉଛି । ତାଙ୍କୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ମୁଖ୍ୟ ଶାସନ ସଚିବ ପାହ୍ୟାର କୌଣସି ଏକ ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତି ମିଳିପାରେ । ଏଥିସହ ରଥଯାତ୍ରା ପୂର୍ବରୁ ପ୍ରଶାସନର ନବ କଳେବର ହେବ ବୋଲି ସୂଚନା ମିଳିଛି ।
