ମୋକିମ୍ ଙ୍କ ମନସ୍କାମନା ପୂରଣ !

ଭୁବନେଶ୍ୱର: କଂଗ୍ରେସର ବରିଷ୍ଠ ନେତା ପୂର୍ବତନ ବିଧାୟକ ମହମ୍ମଦ ମୋକିମ୍ ଙ୍କ ମନସ୍କାମନା ପୂରଣ ହୋଇଛି । ଦିଲ୍ଲୀ ହାଇକମାଣ୍ଡ ଦଳର ପ୍ରାଥମିକ ସଦସ୍ୟ ପଦରୁ ତାଙ୍କୁ ବହିଷ୍କାର କରିଛନ୍ତି । ଗତ ରାଷ୍ଟ୍ରପତି ନିର୍ବାଚନ ବେଳୁ କଂଗ୍ରେସ ନିଷ୍ପତ୍ତିରେ ସହମତ ହୋଇ ନ ଥିବା ମୋକିମ୍ ପିସିସି ନେତୃତ୍ୱ ଭକ୍ତ ଦାସଙ୍କୁ ମିଳିବା ପରେ କଂଗ୍ରେସରୁ ମନ ଛଡ଼ାଇ ଦେଇଥିଲେ । ଏକ ନୂଆ ଦଳ ଗଠନର ପରିକଳ୍ପନାରୁ କଂଗ୍ରେସ ହାଇକମାଣ୍ଡଙ୍କୁ ଚାଲେଞ୍ଜ କରିବାର ସାହାସ ଗୋଟାଇଲେ । ଜାତୀୟ ଦଳରେ ହାଇକମାଣ୍ଡଙ୍କୁ ଖୋଲା ଚାଲେଞ୍ଜ କରିବାର ପରିଣତି ସେ ଜାଣି ମଧ୍ୟ ତାହାକୁ ବରଣ କଲେ । ମୋକିମ୍ ଙ୍କ ମନ ଜାଣି ହାଇକମାଣ୍ଡ ତାଙ୍କୁ ଦଳରୁ ବିତାଡ଼ିତ କରିଛନ୍ତି । ଆଜି ଭୋରରୁ ଏଆଇସିସି ପକ୍ଷରୁ ମୋକିମ୍ ଙ୍କ ଦଳରୁ ବହିଷ୍କାର ଆଦେଶ ଜାରି ହୋଇଛି ।

କଂଗ୍ରେସରୁ ବହିଷ୍କୃତ ହେବା ପରେ ମୋକିମ୍ ତାଙ୍କ ପ୍ରତିକ୍ରିୟାରେ କହିଛନ୍ତି, ମୁଁ କିଛି ଭୁଲ୍ କରିନି । ମୁଁ ରାଜନୀତି କରିଛି, ଏବେ ବି କରିବି । ଆଇନା ଦେଖାଇଥିଲି । ଭାବିଥିଲି କଂଗ୍ରେସ ସୁଧାର ଆଣିବ । କିନ୍ତୁ ମୋ ଉପରେ ଦଳ କାର୍ଯ୍ୟାନୁଷ୍ଠାନ ହେଲା । ଏହାକୁ ଗ୍ରହଣ କରୁଛି । ଆମେ ରାହୁଲଙ୍କୁ ଅନୁସୁରଣ କରୁଥିଲୁ, ସେ କୁହନ୍ତି କଂଗ୍ରେସ କର୍ମୀ କାହାକୁ ଡରନ୍ତିନି । ତେଣୁ ମୁଁ କାହାକୁ ନ ଡରି ଚିଠି ଲେଖିଥିଲି । ଯାହା କରିଛି ଅନୁଶୋଚନା ନାହିଁ । ଏବେ ନହେଲେ ନାହିଁ ପରବର୍ତ୍ତୀ ସମୟରେ କଂଗ୍ରେସ ପଦକ୍ଷେପ ନେବ ବୋଲି ମୁଁ ଭାବୁଛି । ସୋନିଆ ଗାନ୍ଧୀଙ୍କୁ ଲେଖିଥିବା ଚିଠିକୁ ଗୁରୁତ୍ୱର ସହ ନେଇଥିବାରୁ ମିଡିଆକୁ ଧନ୍ୟବାଦ ଜଣାଉଛି ।

ଝିଅ ସୋଫିଆଙ୍କ ଭବିଷ୍ୟତ ସମ୍ପର୍କରେ ସାମ୍ବାଦିକମାନେ ପଚାରିବାରୁ ମୋକିମ୍ କହିଥିଲେ, ସେ କଂଗ୍ରେସ ଦଳର ବିଧାୟିକା ଅଛନ୍ତି । ତାଙ୍କର ଏହା ସହ କୌଣସି ସମ୍ପର୍କ ନାହିଁ । ନିଜ ନିଷ୍ପତ୍ତି ନିଜେ ସୋଫିଆ ନେବେ ।

ସୂଚନାଥାଉକି, କିଛି ଦିନ ତଳେ ମହମ୍ମଦ ମୋକିମ୍ କଂଂଗ୍ରେସର ସର୍ବୋଚ୍ଚ ନେତ୍ରୀ ସୋନିଆ ଗାନ୍ଧୀଙ୍କୁ ଏକ ୫ ପୃଷ୍ଠାର ଚିଠି ଲେଖିଥିଲେ । ସେଥିରେ ସେ ଉଭୟ ରାଜ୍ୟ ଓ କେନ୍ଦ୍ର ନେତୃତ୍ୱ ବିରୋଧରେ ବିଷୋଦଗାର କରିଥିଲେ । ପିସିସି ନେତୃତ୍ୱ ନେବା ପାଇଁ ଭକ୍ତ ଚରଣ ଦାସ ଅଯୋଗ୍ୟ ବୋଲି ଜଣାଇ ତାଙ୍କର ଗୋହି ଖୋଳିଥିଲେ । ରାହୁଲ ଗାନ୍ଧୀ ଏବଂ ଏଆଇସିସି ସଭାପତି ମଲ୍ଲିକାର୍ଜୁନ୍ ଖଡ଼ଗେଙ୍କୁ ମଧ୍ୟ ସେ ଛାଡ଼ି ନ ଥିଲେ । ରାହୁଲଙ୍କ କାର୍ଯ୍ୟତରିକାକୁ ପ୍ରଶ୍ନ ଉଠାଇବା ସହ ୮୩ ବର୍ଷ ବୟସ୍କ ଖଡ଼ଗେଙ୍କ ହାତରେ କଂଗ୍ରେସର ନେତୃତ୍ୱକୁ ସମାଲୋଚନା କରିଥିଲେ । ଏହି ଚିଠିଟିକୁ ମୋକିମ୍ ଗଣମାଧ୍ୟମରେ ପ୍ରଘଟ କରିବା ସହ ଟିଭି ଚାନେଲ ଗୁଡ଼ିକରେ ବସି ଝାଡ଼ିଥିଲେ ।

କଂଗ୍ରେସକୁ ନେଇ ତାଙ୍କ ଚିନ୍ତା ଓ ଉଦବେଗ ସୋନିଆଙ୍କୁ ଖାଲି ଚିଠିରେ ଲେଖିଥିଲେ ଚଳିଥାନ୍ତା । ମାତ୍ର ଚିଠି ପ୍ରଘଟ କରିବା ଏବଂ ଗଣମାଧ୍ୟମ ଷ୍ଟୁଡିଓରେ ବସି ମୋକିମ୍ ଚର୍ଚ୍ଚା କରିବା ହାଇକମାଣ୍ଡଙ୍କୁ ଉତକ୍ଷିପ୍ତ କରିଥିଲା । ଯିଏ ବିଜେପି ସମ୍ପର୍କରେ ଅଛନ୍ତି ବିଜେପିକୁ ଚାଲିଯାଅ ବୋଲି ଗତକାଲି ଦିଲ୍ଲୀରେ ପିସିସି ସଭାପତି ଭକ୍ତ ଦାସ ପ୍ରତିକ୍ରିୟା ଦେଇଥିଲେ । ମୋକିମ୍ ଙ୍କ ବିରୋଧରେ କାର୍ଯ୍ୟାନୁଷ୍ଟାନ ଅବଶ୍ୟାମ୍ଭାବୀ ଏବଂ ଖୁବ୍ ଶୀଘ୍ର ଏହା ହେବାକୁ ଯାଉଛି ବୋଲି ଭକ୍ତଙ୍କ ବୟାନରୁ ଇସାରା ମିଳିସାରିଥିଲା ।

ମୋକିମ୍ ଙ୍କ ସପକ୍ଷରେ ବାହାରିଲେ ନିରଞ୍ଜନ

ମୋକିମ୍ ଏକ ନୂଆ ଦଳ କଥା ଚିନ୍ତା କରିଛନ୍ତି କି ବିଜେପିରେ କଥାବାର୍ତ୍ତା ସାରିଛନ୍ତି ତାହା ସ୍ପଷ୍ଟ ହୋଇନାହିଁ । ହେଲେ ହାଇକମାଣ୍ଡଙ୍କୁ ସମାଲୋଚନା କରି କଂଗ୍ରେସରୁ ବହିଷ୍କୃତ ହୋଇଥିବା ମୋକିମ୍ ଙ୍କ ସପକ୍ଷରେ ବାହାରିଛନ୍ତି ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ । ଦଳ ପ୍ରତି ମୋକିମ୍ ଙ୍କର ଅବଦାନକୁ ଭୁଲି ହେବ ନାହିଁ । ତାଙ୍କ ଝିଅ ମଧ୍ୟ ନିର୍ବାଚନମଣ୍ଡଳୀରେ ଭଲ କାମ କରୁଛନ୍ତି । ନେତୃତ୍ୱକୁ ନେଇ ତାଙ୍କ ମନରେ ଯେଉଁ ଅଶାନ୍ତି ଥିଲା ତାହା ଦୂର କରିବା ପ୍ରଥମ କର୍ତ୍ତବ୍ୟ ଥିଲା । କଂଗ୍ରେସ ନୀତି ଆଦର୍ଶରୁ ଦୂରେଇବା କଥା ସେ କହିନାହାନ୍ତି । ମୋକିମ୍ ଙ୍କ ଭଳି ବ୍ୟକ୍ତିଙ୍କ ଦଳରେ ଆବଶ୍ୟକତା ଅଛି ବୋଲି ନିରଞ୍ଜନ ପ୍ରତିକ୍ରିୟା ଦେଇଛନ୍ତି ।