ଭୁବନେଶ୍ୱର: ଚଳିତବର୍ଷ ମାଟ୍ରିକ୍ ପରୀକ୍ଷା ପାଇଁ ୫ ଲକ୍ଷ ୩୨ ହଜାର ୬୦୩ ପିଲା ଫର୍ମ ପୂରଣ କରିଥିଲେ । ଏ ପର୍ଯ୍ୟନ୍ତ ସରିଥିବା ଓଡିଆ ଓ ଇଂରାଜୀ ଦୁଇଟି ବିଷୟରେ ୧୩ ହଜାର ୫୮ ଜଣ ପିଲା ପରୀକ୍ଷା ଦେଇନାହାନ୍ତି । ଆଜି ବିଧାନସଭାରେ ଗଣଶିକ୍ଷା ବିଭାଗର ଖର୍ଚ୍ଚ ଦାବି ଆଲୋଚନାର ଉତ୍ତର ଦେବା ବେଳେ ମନ୍ତ୍ରୀ ସମୀର ଦାଶ ଏହି ସୂଚନା ଦେଇଛନ୍ତି । ଏହି ଡ୍ରପଆଉଟ୍ ପିଲାଙ୍କୁ ଚିହ୍ନଟ କରାଯିବ ଏବଂ ଅଭିଭାବକମାନଙ୍କ ସହ ଆଲୋଚନା କରାଯାଇ ସପ୍ଲିମେଣ୍ଟାରୀ ପରୀକ୍ଷାରେ ବସିବାର ସୁଯୋଗ ଦିଆଯିବ ବୋଲି ମନ୍ତ୍ରୀ କହିଛନ୍ତି ।
ପରୀକ୍ଷା ହଲ୍ ରେ ମାଟ୍ରିକ୍ ପରୀକ୍ଷାଙ୍କ ଅନୁପସ୍ଥିତି ଏକ ଚିନ୍ତାଜନକ ବିଷୟ । ଫର୍ମଫିଲପ୍ କରି ଆଡମିଟ୍ କାର୍ଡ ପାଇଥିଲେ ମଧ୍ୟ ୧୩ ହଜାରରୁ ଅଧିକ ପିଲା ପରୀକ୍ଷା ଦେବାକୁ କାହିଁକି ଆସିଲେନି? ତାହାକୁ ନେଇ ଘଣ୍ଟାଚକଟା ଆରମ୍ଭ ହୋଇଥିବା ବେଳେ ରାଜ୍ୟର ବିଭିନ୍ନ ଅଞ୍ଚଳରୁ ଉଦବେଗଜନକ ଖବର ଆସୁଛି । କିଏ ଦାଦନ ଖଟିବାକୁ ସେମାନଙ୍କ ବାପାମାଆଙ୍କ ସହ ବାହାର ରାଜ୍ୟକୁ ଚାଲିଯାଇଛି ତ ଆଉ କେହି ନିଜର ରୋଗିଣା ବାପାମାଆଙ୍କ ପାଇଁ ଅସହାୟତା ପାଇଁ ପରୀକ୍ଷା ଦେବାକୁ ଆସିପାରିନାହିଁ । ବଡ଼କଥା ହେଲା ଏଥିରୁ ଅଧିକାଂଶ ଛାତ୍ରୀଙ୍କର ଏହା ଭିତରେ ବିବାହ ହୋଇଯାଇଛି । ଏହି ସବୁ ତଥ୍ୟ ସରକାରଙ୍କୁ ଚିନ୍ତାରେ ପକାଇଥିଲା ବେଳେ ଗଣଶିକ୍ଷା ବିଭାଗ ପଦକ୍ଷେପ ନେବା ଆରମ୍ଭ କରିଛନ୍ତି ।
ବିଧାନସଭାରେ ମନ୍ତ୍ରୀ ଏହାକୁ ନେଇ ଉଦବେଗ ପ୍ରକାଶ କରିଥିଲେ ମଧ୍ୟ ବିଭାଗର ଦୋଷ ଦୁର୍ବଳତାକୁ ଘୋଡାଇବାକୁ ଯତପରୋନାସ୍ତି ଚେଷ୍ଟା କରିଥିଲେ । ଗତବର୍ଷର ପରିସଂଖ୍ୟାନ ଦେଇ ବରଂ ବାହାବା ନେବାକୁ ଚେଷ୍ଟା କରିଥିଲେ ।
ମନ୍ତ୍ରୀ କହିଥିଲେ, ଗତବର୍ଷ ୨୦୨୧-୨୨ ରେ ୫ ଲକ୍ଷ ୭୧ ହଜାର ୯୦୯ ଜଣ ପିଲା ମାଟ୍ରିକ୍ ପରୀକ୍ଷା ପାଇଁ ଫର୍ମ ପୂରଣ କରିଥିଲେ । କିନ୍ତୁ ୪୫ ହଜାର ୯୧ ଜଣ ପିଲା ପରୀକ୍ଷା ଦେଇ ନ ଥିଲେ । ଶତକଡ଼ା ହାରରେ ଦେଖିଲେ ଏହି ସଂଖ୍ୟା ୭.୭ ପ୍ରତିଶତ । ଚଳିତ ବର୍ଷ ୫ ଲକ୍ଷ ୩୨ ହଜାର ୬୦୩ ପିଲା ଫର୍ମ ପୂରଣ କରିଥିଲେ ମଧ୍ୟ ୧୩ ହଜାର ୫୮ ପିଲା ଅନୁପସ୍ଥିତ ଅଛନ୍ତି । ଏହି ଅନୁପସ୍ଥିତ ପିଲାଙ୍କ ସଂଖ୍ୟା ୨.୫ ପ୍ରତିଶତ । ବିଭାଗ ପକ୍ଷରୁ ଡୋର ଟୁ ଡୋର୍ କ୍ୟାମ୍ପେନ୍ ଯୋଗୁଁ ଗତବର୍ଷ ତୁଳନାରେ ଏବର୍ଷ ଡ୍ରପଆଉଟ୍ ହାର ସଂଖ୍ୟା କମିଥିବା ସେ ସଫେଇ ରଖିଥିଲେ ।