ଭୁବନେଶ୍ୱର: ଗଣଶିକ୍ଷା ମନ୍ତ୍ରୀ ସମୀର ଦାଶଙ୍କ ନିଜ ଗଡ଼ରେ ତାଙ୍କୁ ଅପଦସ୍ଥ ହେବାକୁ ପଡ଼ିଛି । ଗୋପ ବ୍ଲକ୍ ୧୧ ନମ୍ବର ଜିଲ୍ଲା ପରିଷଦ ଉପନିର୍ବାଚନରେ ଦଳୀୟ ପ୍ରାର୍ଥୀଙ୍କୁ ସେ ଜିତାଇ ପାରିନାହାନ୍ତି । ଏହି ଆସନଟି ତାଙ୍କ ପାଇଁ ଓ ତାଙ୍କ ଦଳ ବିଜେଡି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା । ମାତ୍ର ବିଜେପି ସେଇ ଆସନଟିକୁ ଛଡ଼ାଇ ନେବା ମନ୍ତ୍ରୀଙ୍କ ପତିଆରା ଉପରେ ଶକ୍ତ ଚାପୁଡ଼ା ଲଗାଇଛି । ପୂର୍ବତନ ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁ ଆତ୍ମହତ୍ୟା ଅପବାଦରେ ପଡ଼ିଥିବା ସମୀରଙ୍କ ପାଇଁ ଏହା ରାଜନୈତିକ ବିପଦ ଆଣିଥିବା କୁହାଯାଉଛି ।
ବିଜେଡି ହାତଛଡ଼ା କରିଥିବା ଏହି ୧୧ ନମ୍ବର ଜୋନ୍ ରୁ ମନ୍ତ୍ରୀଙ୍କର ଏକଦା ବିଶ୍ୱସ୍ତ ଧର୍ମେନ୍ଦ୍ର ସାହୁ ପ୍ରତିନିଧିତ୍ୱ କରୁଥିଲେ । ମାତ୍ର ଦୁର୍ଭାଗ୍ୟଜନକ ଘଟଣାକ୍ରମରେ ଗତ ସେପ୍ଟେମ୍ବର ମାସରେ ତାଙ୍କର ଶିଶୁପାଳଗଡ଼ସ୍ଥିତ ବାସଭବନରେ ଧର୍ମେନ୍ଦ୍ର ଆତ୍ମହତ୍ୟା କରିଦେଇଥିଲେ । ଆତ୍ମହତ୍ୟା ପୂର୍ବରୁ ଜଣେ ବନ୍ଧୁଙ୍କ ସହ କରିଥିବା ଟେଲିଫୋନ୍ କଥାବାର୍ତ୍ତାରେ ତାଙ୍କର ବ୍ୟକ୍ତିଗତ ସମସ୍ୟା ଉଲ୍ଲେଖ କରି ମନ୍ତ୍ରୀ ସମୀର ଦାଶଙ୍କ ନାଁ ନେଇଥିଲେ । ଏହାକୁ ନେଇ ରାଜନୈତିକ ହଇଚଇ ସୃଷ୍ଟି ହୋଇଥିଲା । ସମୀର ଦାଶଙ୍କୁ ମନ୍ତ୍ରୀ ପଦରୁ ବହିଷ୍କାର କରିବା ସହ ମାମଲାରେ ତଦନ୍ତ ପରିସରଭୁକ୍ତ କରିବାକୁ ବିରୋଧୀ ଦଳ ଦାବି କରିଥିଲେ । ବିଜେପି ରାଜରାସ୍ତାକୁ ଓହ୍ଲାଇଥିଲା ।
ହେଲେ ବିରୋଧୀଙ୍କ ଚାପର କିଛି ପ୍ରଭାବ ପଡ଼ିଲାନି । ଆଇନ ତା ବାଟରେ ଯାଉଛି କହି ସମୀରଙ୍କୁ ତାଙ୍କ ଦଳ ଓଲଟି ସୁରକ୍ଷା ଦେବାକୁ ଚେଷ୍ଟା କରିଥିଲା । ଏହି ପରିପ୍ରେକ୍ଷୀରେ ଧର୍ମେନ୍ଦ୍ରଙ୍କ ମୃତ୍ୟୁ ଯୋଗୁଁ ଖାଲି ପଡ଼ିଥିବା ଆସନରେ ଦଳୀୟ ପ୍ରାର୍ଥୀଙ୍କୁ ଜିତାଇବା ବିଜେଡି ଓ ସମୀରଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇପଡ଼ିଥିଲା ।
ସେପଟେ ବିଜେପି ଏହି ଆସନକୁ ବିଜେଡି ହାତରୁ ଛଡ଼ାଇ ଆଣିବାକୁ ସମୀର ଦାଶଙ୍କୁ ଟାର୍ଗେଟ୍ କରିଥିଲା । ଦଳର ତୁଙ୍ଗ ନେତାମାନେ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିଥିଲେ । ସମୀରଙ୍କ ବିରୋଧରେ ଜନମତ ସୃଷ୍ଟି କରିବାକୁ ଆପ୍ରାଣ ଉଦ୍ୟମ କରିଥିଲେ । ଶେଷରେ ବିରୋଧୀ ଶିବିର ସେଥିରେ ସଫଳ ହୋଇଛନ୍ତି ।
୧୧ ନମ୍ବର ଜିଲ୍ଲା ପରିଷଦ ଉପନିର୍ବାଚନରେ ବିଜେପି ପ୍ରାର୍ଥୀ ପ୍ରମୋଦ ରାୟ ତାଙ୍କର ନିକଟତମ ପ୍ରତିଦ୍ୱନ୍ଦୀ ବିଜେଡିର ଭାଗିରଥୀ ସେନାପତିଙ୍କୁ ୧୭୬ ଖଣ୍ଡ ଭୋଟ ବ୍ୟବଧାନରେ ପରାସ୍ତ କରିଛନ୍ତି । ବିଜେପି ପ୍ରାର୍ଥୀ ୧୧ ହଜାର ୨୪୦ ଖଣ୍ଡ ଭୋଟ୍ ପାଇଥିବା ବେଳେ ବିଜେଡି ପ୍ରାର୍ଥୀ ୧୧ ହଜାର ୬୪ ଖଣ୍ଡ ଭୋଟ୍ ପାଇଛନ୍ତି ।
