ଭୁବନେଶ୍ୱର: ୨୦୨୪ ନିର୍ବାଚନ ଲଢ଼ିବା ପାଇଁ ବିଜେଡି ହାତରେ ପଦ୍ମପୁର ମଡେଲ ଥିଲେ ଆମ ପାଖରେ ଅଛି ଧାମନଗର ମଡେଲ୍ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଜି ଗଣମାଧ୍ୟମକୁ ଏହା କହିଛନ୍ତି । ଧର୍ମେନ୍ଦ୍ର କହିଛନ୍ତି, ଧାମନଗର ଓ ପଦ୍ମପୁର ଉପନିର୍ବାଚନ ଆମକୁ ଶିକ୍ଷା ଦେଇଛି । ଆଗାମୀ ନିର୍ବାଚନରେ ଓଡିଶା ସରକାରଙ୍କ ଅପାରଗତା, ସ୍ଥାଣୁତା, ଭ୍ରଷ୍ଟାଚାରକୁ ପ୍ରମୁଖ ପ୍ରସଙ୍ଗ କରାଯିବ ।
ତେବେ ଧର୍ମେନ୍ଦ୍ରଙ୍କୁ ଜବାବ ଦେଇଛି ବିଜେଡି । ଦଳର ରାଷ୍ଟ୍ରୀୟ ମୁଖପାତ୍ର ତଥା ସାଂସଦ ଡ. ସସ୍ମିତ୍ ପାତ୍ର କହିଛନ୍ତି, ବିଜେଡିର ମଡେଲ କୌଣସି ଉପନିର୍ବାଚନ ବିଜୟ ନୁହେଁ । ବିଜେଡିର ମଡେଲ ହେଉଛି ଉତ୍ତମ ପ୍ରଶାସନର ମଡେଲ । ଓଡ଼ିଶାର ସାଢ଼େ ୪ କୋଟି ଲୋକଙ୍କ ସେବା । ବିଜେଡି ପାଇଁ ନିର୍ବାଚନ ବିଜୟ ନୁହେଁ, ବିକାଶ ହିଁ ଏକମାତ୍ର ମଡେଲ ବୋଲି ସସ୍ମିତ୍ କହିଛନ୍ତି ।
ସେ ଆହୁରି କହିଛନ୍ତି ଯେ ରାଜ୍ୟରେ ସୁଶାସନ ପାଇଁ ନବୀନ ସରକାର ପ୍ରତିବଦ୍ଧ । ବିଜେଡି ସବୁବେଳେ ବିକାଶରେ ବିଶ୍ୱାସ କରେ । ୨୨ ବର୍ଷ ହେଲା ଓଡ଼ିଶାବାସୀଙ୍କ ସେବା କରି ଆସୁଛନ୍ତି ସରକାର । ୫-ଟି, ମୋ ସରକାର ଆଦି ସରକାରଙ୍କ ସୁଶାସନର ମଡେଲ । ସାଢ଼େ ୪ କୋଟି ଓଡ଼ିଆ ଆମର ଭାଗ୍ୟ ବିଧାତା । ନିର୍ବାଚନର ବିଜୟକୁ ମଡେଲ ଭାବେ ଗ୍ରହଣ ନ କରିବାକୁ ସେ କେନ୍ଦ୍ରମନ୍ତ୍ରୀଙ୍କୁ ପରାମର୍ଶ ଦେଇଛନ୍ତି ।
ସୂଚନାଯୋଗ୍ୟ, ପଦ୍ମପୁର ଉପନିର୍ବାଚନରେ ଦଳର ବିପୁଳ ବିଜୟ ନେତା ଓ କର୍ମୀଙ୍କୁ ଉତ୍ସାହିତ କରିଛି । ଆଗକୁ ସମସ୍ତେ ଏକାଠି ହୋଇ ଲଢ଼ିବାକୁ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପରାମର୍ଶ ଦେଇଛନ୍ତି । ଏହାକୁ ବିଜେଡିର ପଦ୍ମପୁର ମଡେଲ ବୋଲି କୁହାଯାଉଛି । ବିଜେପି କ୍ଷେତ୍ରରେ ବି ସମାନ କଥା । ଏଠି ଧାମନଗର ମଡେଲ କଥା ଖୋଦ୍ କେନ୍ଦ୍ରମନ୍ତ୍ରୀଙ୍କ ମୁହଁରୁ ବାହାରିଛି । ଯାହାକୁ ନେଇ କଥା କଟାକଟି ହୋଇଛି ।
ସେ ଯାହା ହେଉ, ୨୦୨୪ ନିର୍ବାଚନକୁ ଫୁଲ୍ ଜୋସ୍ ରେ ଲଢ଼ିବା ପାଇଁ ବିଜେପି ବି ଏବେଠାରୁ ରଣନୀତି ପ୍ରସ୍ତୁତିରେ ଲାଗିପଡ଼ିଲାଣି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପସ୍ଥିତିରେ କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲ ଆଜି ଦଳୀୟ କାର୍ଯ୍ୟାଳୟରେ କାର୍ଯ୍ୟକର୍ତ୍ତାଙ୍କ ସହ ବ୍ୟାପକ ବିଚାର ବିମର୍ଷ କରିଥିଲେ । ସାଧାରଣ ନିର୍ବାଚନ ପ୍ରସ୍ତୁତି ଏବଂ ସଂଗଠନ ମଜବୁତ ନେଇ ବୈଠକରେ ଆଲୋଚନା ହୋଇଥିଲା । ପ୍ରଥମ ପର୍ଯ୍ୟାୟରେ ଜିଲ୍ଲା ସଭାପତି ଏବଂ ପଦାଧିକାରୀଙ୍କ ବୈଠକ ହୋଇଥିଲା ବେଳେ ଦ୍ୱିତୀୟ ପର୍ଯ୍ୟାୟରେ କୋର୍ କମିଟି ବୈଠକ ଅନୁଷ୍ଠିତ ହୋଇଥିଲା ।
ଆରମ୍ଭରୁ ଧାମନଗର ଏବଂ ପଦ୍ମପୁର ଉପନିର୍ବାଚନ ଫଳାଫଳର ସମୀକ୍ଷା କରାଯାଇଥିଲା । ଧାମନଗର ଉପନିର୍ବାଚନ ଫଳାଫଳର ବିସ୍ତୃତ ରିପୋର୍ଟ ମନମୋହନ ସାମଲ ଉପସ୍ଥାପନ କରିଥିଲା ବେଳେ ପଦ୍ମପୁର ଫଳାଫଳ ରିପୋର୍ଟ ଜୟନାରାୟଣ ମିଶ୍ର ଉପସ୍ଥାପନ କରିଥିଲେ । ଦଳ କେଉଁଠି କାହିଁକି ଭଲ କି ଖରାପ ପ୍ରଦର୍ଶନ କଲା ତାହା ଶ୍ରୀ ବଂଶଲଙ୍କୁ ଅବଗତ କରାଯାଇଥିଲା ।
ବ୍ୟାପକ ଆଲୋଚନା ପରେ ରାଜ୍ୟରେ ତୃଣମୂଳସ୍ତରରେ ସଂଗଠନକୁ ମଜବୁତ କରିବା ଏବଂ ରାଜ୍ୟ ସରକାରଙ୍କ ବିଭିନ୍ନ ଜନବିରୋଧୀ କାର୍ଯ୍ୟକ୍ରମ ବିରୋଧରେ ବ୍ୟାପକ ଆନେ୍ଦାଳନ କରିବାକୁ ଦଳ ନିଷ୍ପତ୍ତି ନେଇଛି । ଆସନ୍ତାକାଲିଠାରୁ କାର୍ଯ୍ୟକ୍ରମ ଆରମ୍ଭ ହୋଇଯିବ ବୋଲି କୁହାଯାଇଛି ।
