ଭୁୁବନେଶ୍ୱର: ପଞ୍ଚଭୂତରେ ବିଲୀନ ହୋଇଛନ୍ତି ଡାକ୍ତର ଦେବେନ୍ଦ୍ର ପ୍ରଧାନ । ପୁରୀ ସ୍ୱର୍ଗଦ୍ୱାରଠାରେ ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି । ସାନପୁଅ ଧର୍ମେନ୍ଦ୍ର ଏବଂ ନାତିନାତୁଣୀମାନଙ୍କ ଉପସ୍ଥିତିରେ ବଡ଼ପୁଅ ସୌମେନ୍ଦ୍ର ମୁଖାଗ୍ନି ଦେଇଥିଲେ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଅଧିକାଂଶ ମନ୍ତ୍ରୀ, ବିଧାୟକ, ସାଂସଦ ତଥା ବରିଷ୍ଠ ନେତାମାନେ ସେଠାରେ ଉପସ୍ଥିତ ରହି ସ୍ୱର୍ଗତ ପ୍ରଧାନଙ୍କୁ ଶେଷ ସମ୍ମାନ ଦେଇଥିଲେ । ବିଶିଷ୍ଟ ଯୋଗଗୁରୁ ରାମଦେବ ମଧ୍ୟ ଏହି ଅନ୍ତେଷ୍ଟିକ୍ରୟାରେ ସାମିଲ ହୋଇଥିଲେ । ସେହି ମହାନ୍ ଜନନେତାଙ୍କ ପାର୍ଥିବ ଶରୀରରେ ପୁଷ୍ପମାଲ୍ୟ ଓ ଘିଅ ଅର୍ପଣ କରି ବିଦାୟ ଦେଇଥିଲେ ।
ସ୍ୱର୍ଗତ ପ୍ରଧାନଙ୍କ ପାର୍ଥିବ ଶରୀର ତାଙ୍କର ପୁଅ ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବାସଭବନରେ ଗତକାଲି ରାତିରେ ରହିଥିଲା । ଶେଷକୃତ୍ୟ ସମ୍ପନ୍ନ ପାଇଁ ଆଜି ସକାଳୁ ପୁରୀ ସ୍ୱର୍ଗଦ୍ୱାରକୁ ଅଣାଯାଇଥିଲା । ବାଟସାରା ବିଭିନ୍ନ ଜାଗାରେ ସାଧାରଣ ଜନତା ଶେଷ ଦର୍ଶନ ପାଇଁ ଭିଡ଼ ଜମାଇଥିଲେ ।
ଏହି ମହାନ୍ ନେତାଙ୍କୁ ଅନ୍ତିିମ ବିଦାୟ ଜଣାଇବା ପାଇଁ ସ୍ୱର୍ଗଦ୍ୱାରରେ ଶୁଭେଚ୍ଛୁମାନଙ୍କର ପ୍ରବଳ ଭିଡ଼ ହୋଇଥିଲା । ଭୁବନେଶ୍ୱରରୁ ଶହ ଶହ ସଂଖ୍ୟାରେ ନେତା ଓ କର୍ମୀମାନେ ସ୍ୱର୍ଗଦ୍ୱାରରେ ଆଗୁଆ ପହଞ୍ଚି ଯାଇଥିଲେ ।
ହିନ୍ଦୁ ରୀତିନୀତିରେ ବିଧି ସମ୍ପନ୍ନ ହେଲା ପରେ ତାଙ୍କୁ ଗାର୍ଡ ଅଫ୍ ଅନର୍ ପ୍ରଦାନ କରାଯାଇଥିଲା । ଏହାପରେ ପାର୍ଥିବ ଶରୀରକୁ ୨୮ ନମ୍ବର ପିଣ୍ଡିରେ ଥିବା ଜୁଇ ଉପରେ ରଖାଯାଇଥିଲା । ହଜାର ହଜାର ଜନତାଙ୍କର ଦେବେନ୍ଦ୍ର ପ୍ରଧାନ ଅମର ରହେ ସ୍ୱରରେ ଗଗନ ପବନ ପ୍ରକମ୍ପିତ ହୋଇଥିଲା । କେନ୍ଦ୍ରମନ୍ତ୍ରୀ ଜୁଏଲ୍ ଓରାମ, ମୁଖ୍ୟମନ୍ତ୍ରୀ ମୋହନ ମାଝୀ, ରାଜସ୍ୱମନ୍ତ୍ରୀ ସୁରେଶ ପୂଜାରୀ, ଯୋଗଗୁରୁ ରାମଦେବ, ସାଂସଦ ସମ୍ବିତ ପାତ୍ରଙ୍କ ସମେତ ଅନ୍ୟ ବରିଷ୍ଠ ନେତାମାନେ ଶେଷ ସମ୍ମାନ ପୂର୍ବକ ସେଠାରେ ଉପସ୍ଥିତ ଥିଲେ ।
