ନବୀନ-ଜଗନ ଆଲୋଚନା

ଭୁବନେଶ୍ୱର: ଓଡ଼ିଶା ଓ ଆନ୍ଧ୍ର ପ୍ରଦେଶ ମଧ୍ୟରେ ଥିବା ବିଭିନ୍ନ ପ୍ରସଙ୍ଗର ଆପୋଷ ସମାଧାନ ପାଇଁ ଏକ ଆନୁଷ୍ଠାନିକ ମେକାନିଜିମ୍ ବା ଉଚ୍ଚସ୍ତରୀୟ କମିଟି ଗଠନ ହେବ । ଦୁଇ ରାଜ୍ୟର ମୁଖ୍ୟ ଶାସନ ସଚିବ ଏହାର ଦାୟିତ୍ୱ ନେବେ । ଉଭୟ ରାଜ୍ୟର ହିତକୁ ଦୃଷ୍ଟିରେ ରଖି ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକର ସମାଧାନ ପାଇଁ ଏହି କମିଟି ବାଟ ବାହାର କରିବ ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇ ଏସ୍ ଜଗନ ମୋହନ ରେଡ୍ଡିଙ୍କ ମଧ୍ୟରେ ଆଜି ଲୋକସେବା ଭବନରେ ଦୀର୍ଘ ୪୫ ମିନିଟ୍ ଧରି ଆଲୋଚନା ହୋଇଥିଲା । ଦୁଇ ରାଜ୍ୟର ମୁଖ୍ୟ ଶାସନ ସଚିବଙ୍କ ସହ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ଏହି ଆଲୋଚନା ବେଶ୍ ସୌହାର୍ଦ୍ଦପୂର୍ଣ୍ଣ ଏବଂ ଫଳପ୍ରଦ ଥିଲା ବୋଲି ଦୁଇ ରାଜ୍ୟର ମୁଖ୍ୟମନ୍ତ୍ରୀଙ୍କ ପକ୍ଷରୁ ଜାରି ଏକ ମିଳିତ ବିବୃତିରେ କୁହାଯାଇଛି ।

ବୈଠକରେ ଉଭୟ ରାଜ୍ୟ ମଧ୍ୟରେ ଥିବା ଜଳ ବିବାଦ, ସୀମା ବିବାଦ, ବିଦ୍ୟୁତ ଉତ୍ପାଦନ ଏବଂ ମାଓ ସମସ୍ୟା ଉପରେ ଆଲୋଚନା ହୋଇଥିଲା । କୋଟିଆ ଗ୍ରାମପୁଞ୍ଜ, ନେରାଡ଼ି ବ୍ୟାରେଜ୍, ଝଞ୍ଜାବତୀ ଜଳଭଣ୍ଡାର, ପୋଲାଭରମ୍, ବହୁଡ଼ା ନଦୀରୁ ଜଳ ନିଷ୍କାସନ ପ୍ରସଙ୍ଗ ଏଥିରେ ସ୍ଥାନିତ ହୋଇଥିଲା । ବାଲିମେଳା ଏବଂ ଅପର୍ ସିଲେରୁ ବିଦ୍ୟୁତ ପ୍ରକଳ୍ପ ଉପରେ ମଧ୍ୟ ଆଲୋଚନା ହୋଇଥିଲା । ସୀମାରେ ମାଓ ଉପଦ୍ରବ ଏବଂ ଗଞ୍ଜେଇ ଚାଷ ଉପରେ ରୋକ୍ ଲଗାଇବା ପାଇଁ ଦୁଇ ରାଜ୍ୟ ମିଳିତ ଭାବେ କାର୍ଯ୍ୟ କରିବେ ବୋଲି ନିଷ୍ପତ୍ତି ହୋଇଛି ।

ଏହାଛଡ଼ା, ଶ୍ରୀକାକୁଲମ୍ ସ୍ଥିତ ବି.ଆର.ଆମ୍ବେଦକର ବିଶ୍ୱବିଦ୍ୟାଳୟରେ ଏକ ଓଡ଼ିଆ ଚେୟାର ଏବଂ ବ୍ରହ୍ମପୁର ବିଶ୍ୱବିଦ୍ୟାଳୟରେ ଏକ ତେଲୁଗୁ ଚେୟାର ସ୍ଥାପନ ପାଇଁ ଉଭୟ ରାଜ୍ୟ ପଦକ୍ଷେପ ନେବେ ବୋଲି ସ୍ଥିର ହୋଇଛି । ସେହିଭଳି ସୀମାବର୍ତ୍ତୀ ଜିଲ୍ଲାରେ ଥିବା ବିଦ୍ୟାଳୟଗୁଡ଼ିକରେ ଭାଷା ଶିକ୍ଷକ ନିଯୁକ୍ତି ପାଇଁ ଉଭୟ ରାଜ୍ୟ ପଦକ୍ଷେପ ନେବେ । ବିଦ୍ୟାଳୟ ପାଠ୍ୟପୁସ୍ତକ ଯୋଗାଣ ଏବଂ ଭାଷା ପରୀକ୍ଷାରେ ଦୁଇ ରାଜ୍ୟ ପରଷ୍ପରକୁ ସହଯୋଗ କରିବାକୁ ବୈଠକରେ ନିଷ୍ପତ୍ତି ହୋଇଛି ।

ଆଜି ଅପରାହ୍ନ ପ୍ରାୟ ୪.୪୫ରେ ଆନ୍ଧ୍ର ମୁଖ୍ୟମନ୍ତ୍ରୀ ଶ୍ରୀ ରେଡ୍ଡି ଭୁବନେଶ୍ୱରରେ ପହଞ୍ଚିଥିଲେ । ବିମାନବନ୍ଦରରୁ ସେ ସିଧା ରାଜ୍ୟ ଅତିଥି ଭବନକୁ ଆସିଥିଲେ । ସେଠାରୁ ସାଢ଼େ ୫ଟାରୁ ବାହାରି ଲୋକସେବା ଭବନ ବୈଠକରେ ଯୋଗଦେଇଥିଲେ । ବୈଠକ ସରିବା ପରେ ଶ୍ରୀ ରେଡ୍ଡି ଆନ୍ଧ୍ର ଫେରିଯାଇଥିଲେ ।