ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ୱାସ୍ଥ୍ୟାବସ୍ଥାକୁ ନେଇ ଗୁଜବ ରଚିଥିବା ବିରୋଧୀଙ୍କୁ ଆଜି ଉଚିତ ଜବାବ ମିଳିଛି । ମୁଖ୍ୟମନ୍ତ୍ରୀ ଯେ ସମ୍ପୂର୍ଣ୍ଣ ଫିଟ୍ ଆଣ୍ଡ ଫାଇନ୍ ଆଜି କାହାରିକୁ ତାହାର ସ୍ପଷ୍ଟୀକରଣ ଦେବାକୁ ପଡ଼ିନି । ବରଂ ଖୋଦ୍ ମୁଖ୍ୟମନ୍ତ୍ରୀଙ୍କ ଚାଲିଚଳନରୁ ତାହାର ଜବାବ ମିଳିଯାଇଛି ।
ଆଜି ଭୁବନେଶ୍ୱରର ଗାନ୍ଧୀମାର୍ଗରେ ରାଜ୍ୟସ୍ତରୀୟ ୭୩ ତମ ସାଧାରଣତନ୍ତ୍ର ଦିବସ ପାଳନ ସମାରୋହ ଅନୁଷ୍ଠିତ ହୋଇଥିଲା । ମୁଖ୍ୟ ଅତିଥି ଭାବେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଯୋଗଦେଇ ପତାକା ଉତ୍ତୋଳନ କରିଥିଲା ବେଳେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ସମ୍ମାନିତ ଅତିଥି ଭାବେ ଯୋଗଦେଇଥିଲେ । ତେବେ ସମାରୋହସ୍ଥଳକୁ ମୁଖ୍ୟମନ୍ତ୍ରୀଙ୍କ ଆଗମନରେ ଆଜି କିଛି ସ୍ୱତନ୍ତ୍ରତା ଦେଖିବାକୁ ମିଳିଥିଲା । ମୁଖ୍ୟମଞ୍ଚର କିଛି ଦୂରରେ ମୁଖ୍ୟମନ୍ତ୍ରୀଙ୍କ ଗାଡ଼ି ଅଟକିଲା ପରେ ମୁଖ୍ୟମନ୍ତ୍ରୀ ଗାଡ଼ିରୁ ଓହ୍ଲାଇ ମଞ୍ଚ ଆଡକୁ ଖୁବ୍ ଜୋର୍ ରେ ଚାଲି ଚାଲି ଯାଇଥିଲେ । ବାପା ବିଜୁ ବାବୁଙ୍କ ଠାଣିରେ ପାଦ ପକାଉଥିଲେ ମୁଖ୍ୟମନ୍ତ୍ରୀ । ପ୍ୟାରେଡ୍ ସଙ୍ଗୀତର ତାଳେ ତାଳେ ହାତ ହଲେଇ ଆଗକୁ ଚାଲିଥିଲେ ।
ସାଧାରଣତନ୍ତ୍ର ଦିବସର ସମ୍ପୂର୍ଣ୍ଣ କାର୍ଯ୍ୟକ୍ରମରେ ଉପସ୍ଥିତ ରହିବା ପରେ ମୁଖ୍ୟମନ୍ତ୍ରୀ ଲୋକସେବା ଭବନର ଉଦ୍ୟାନ ବୁଲିବାକୁ ଆସିଥିଲେ । ପ୍ରକୃତି ଓ ଉଦ୍ୟାନପ୍ରେମୀ ନବୀନ ପୂର୍ବରୁ ସମୟ ପାଇଲେ ଯେମିତି ଉଦ୍ୟାନ ବୁଲୁଥିଲେ ଆଜି ସେମିତି ବୁଲିଥିଲେ । ସେଠାରେ ବିଭିନ୍ନ ଫୁଲ ଦେଖି ଖୁସି ହୋଇଥିଲେ । ଉଦ୍ୟାନର ଯତ୍ନ ଠିକ୍ ଥିବାରୁ ସନ୍ତୋଷବ୍ୟକ୍ତ କରିଥିଲେ । ପାଖାପାଖି ୧୦ ମିନିଟ୍ ମୁଖ୍ୟମନ୍ତ୍ରୀ ସେଠି କଟାଇ ନବୀନ ନିବାସ ଅଭିମୁଖେ ବାହାରିଥିଲେ ।
