ସତ ମାନିଗଲେ ନିରଞ୍ଜନ ସେଠୀ

ଭୁବନେଶ୍ୱର: କ୍ୟାମେରାମ୍ୟାନ୍ ମାନସ ସ୍ୱାଇଁ ଅପହରଣ ଓ ହତ୍ୟା ମାମଲାରେ ଗିରଫ ଅନ୍ୟତମ ମୁଖ୍ୟ ଅଭିଯୁକ୍ତ ନିରଞ୍ଜନ ସେଠୀ କ୍ରାଇମବ୍ରାଞ୍ଚ ଆଗରେ ସତ ମାନିଯାଇଛନ୍ତି । ପ୍ରଥମରୁ ପାଟି ଖୋଲୁ ନ ଥିବା ନିରଞ୍ଜନ ଏବେ ତଦନ୍ତରେ ସହଯୋଗ କରୁଥିବା ଏବଂ ସତ ମାନିଯାଇଥିବା କ୍ରାଇମବ୍ରାଞ୍ଚ ପକ୍ଷରୁ ଆଜି ସୂଚନା ଦିଆଯାଇଛି । ଫେବ୍ରୁଆରୀ ୭ ତାରିଖ ଦିନ କ’ଣ ଘଟଣା ଘଟିଥିଲା ନିରଞ୍ଜନ ତାହା ଗୋଟି ଗୋଟି କରି କହିଛନ୍ତି ।

୭ ତାରିଖ ସଂଧ୍ୟା ୭ଟାରେ ନିରଞ୍ଜନ ସ୍କାଏ ଟାୱାର୍ ରେ ଥିବା ଶର୍ମିଷ୍ଠାଙ୍କ ସମ୍ପୂର୍ଣ୍ଣ ୱେବ୍ ଚାନେଲ୍ ଅଫିସ୍ ରେ ପହଞ୍ଚିଥିଲେ । ସେଠାରେ ଶର୍ମିଷ୍ଠା, ଝୁନା, ଝୁନାର ସ୍ୱାମୀ ଏବଂ ରାଜ୍ ଓରଫ ରଞ୍ଜନ ଆଗରୁ ଥିଲେ । ଜଣେ କମ୍ପ୍ୟୁଟର ଅପରେଟର ଏବଂ ଶର୍ମିଷ୍ଠାଙ୍କ ଭାଉଜ ମଧ୍ୟ ଥିଲେ । କ୍ୟାମେରାମ୍ୟାନ୍ ମାନସଙ୍କୁ ଦୟାଲ୍ ଆଶ୍ରମରୁ ସେଠାକୁ ଅଣାଯାଇଥିଲା । ସେଠାରେ ନିରଞ୍ଜନ ତାଙ୍କୁ ମାଡ଼ ମାରିଥିଲେ । ରାତି ୧୦ଟା ବେଳକୁ ନିରଞ୍ଜନ ସମ୍ପୂର୍ଣ୍ଣ ଅଫିସ୍ ଛାଡ଼ିଥିଲେ ।

ତା’ ପରଦିନ ୮ ତାରିଖରେ ଶର୍ମିଷ୍ଠା ଝୁନାକୁ ଧରି ନିରଞ୍ଜନଙ୍କ ପ୍ରଶାନ୍ତି ବିହାରସ୍ଥିତ ଘରକୁ ଯାଇଥିଲେ । ନିରଞ୍ଜନ ସେମାନଙ୍କୁୁ ଫେରାର କରାଇବାରେ ସହଯୋଗ କରିଥିଲେ । ଯାଜପୁର କାଳିଆପାଣିରେ ରହୁଥିବା ଶର୍ମିଷ୍ଠାଙ୍କ ଶାଶୁଙ୍କ ପାଖକୁ ଚାଲିଯିବାକୁ ସେ ଏକ କାର୍ ଭଡ଼ା କରିଦେଇଥିଲେ । ଆଉ ଶର୍ମିଷ୍ଠାଙ୍କୁ ୧୦ ହଜାର ଟଙ୍କା ହାତଖର୍ଚ୍ଚ ଦେଇଥିଲେ । ଏକ ଡକ୍ୟୁମେଣ୍ଟାରୀ ଫିଲ୍ମ ସୁଟିଂ ପାଇଁ ଆସିଥିବା ମିଛ କହି ଶର୍ମିଷ୍ଠା ଶାଶୁଙ୍କ ପାଖରେ ୩ ଦିନ ରହିଥିଲେ ।

ମୋଟାମୋଟି ଦେଖିଲେ ମାନସଙ୍କୁ ଅପହରଣ କରି ମାରିବା ଏବଂ ପ୍ରମାଣ ନଷ୍ଟ ପାଇଁ ଶବକୁ ପୋତିବା ପଛରେ କେବଳ ନିରଞ୍ଜନ ସେଠୀଙ୍କ ବୁଦ୍ଧି ଲାଗି ନ ଥିଲା । ୱେବ୍ ଚାନେଲ ମାଲିକାଣୀ ଶର୍ମିଷ୍ଠା ରାଉତଙ୍କ ସହ ତାଙ୍କର ସମ୍ପର୍କ ଏତେ ଗଭୀର ଥିଲା ଯେ ପୁଲିସର ଛାଇ ଯେଭଳି ମ୍ୟାଡାମ୍ ଙ୍କ ଉପରେ ନ ପଡ଼େ ତାହାର ବ୍ୟବସ୍ଥା ମଧ୍ୟ କରିଥିଲେ । ହତ୍ୟା ଅପରାଧ ପାଇଁ ମନରେ ସାମାନ୍ୟତମ ଅନୁତାପ କି ଅନୁଶୋଚନା ନ ଥିଲା ।

ଶର୍ମିଷ୍ଠା ଏବଂ ନିରଞ୍ଜନ ସତ ମାନିଲା ପରେ ଆଜି ଉଭୟଙ୍କୁ କ୍ରାଇମ୍ ସ୍ପଟ୍ ନେଇ ସିନ୍ ରିକ୍ରିଏସନ୍ କରିଥିଲା କ୍ରାଇମବ୍ରାଞ୍ଚ । ଉଭୟଙ୍କୁ ‘ସମ୍ପୂର୍ଣ୍ଣ’ ଅଫିସ୍ ଅଲଗା ଅଲଗା ନେଇ ଡେମୋ ଦେଖିଥିଲା । ନିରଞ୍ଜନ କେଉଁଠି ବସିଥିଲେ, ମାନସଙ୍କୁ କେମିତି ପିଟିଲେ ତାହା କହିଥିଲେ । ଶର୍ମିଷ୍ଠା ମଧ୍ୟ ଭୋ ଭୋ କାନ୍ଦି ସବୁକଥା ବର୍ଣ୍ଣନା କରିଥିଲେ । ଶର୍ମିଷ୍ଠାଙ୍କୁ ଦୁଇଥର ସେହି ଜାଗାକୁ ଅଣାଯାଇଥିଲା । ଦ୍ୱିତୀୟ ଥରରେ ଶର୍ମିଷ୍ଠାଙ୍କର ଏକ ମୋବାଇଲ୍ ଏବଂ ନିରଞ୍ଜନ ସେଠୀଙ୍କର ଏକ ଡାଏରୀ ସେଠାରୁ ମିଳିଥିବା ଜଣାପଡ଼ିଛି ।

ଏଥିସହ ଅଭିଯୁକ୍ତମାନଙ୍କର ୫ ଦିନିଆ ରିମାଣ୍ଡ ଅବଧି ଆଜି ସରିଯାଇଛି । ଆସନ୍ତାକାଲି ସେମାନଙ୍କୁ ଚାନ୍ଦବାଲି କୋର୍ଟରେ ହାଜର କରାଯିବ । ଶର୍ମିଷ୍ଠା ଓ ନିରଞ୍ଜନଙ୍କୁ ଆଉ କିଛି ଦିନ ରିମାଣ୍ଡରେ ଆଣିବାକୁ କ୍ରାଇମବ୍ରାଞ୍ଚ ଆବେଦନ କରିପାରେ ବୋଲି ଜଣାପଡ଼ିଛି । ମାନସଙ୍କ ହତ୍ୟା ପଛରେ ଚିପସ୍ ମୁଖ୍ୟ କାରଣ ବୋଲି କୁହାଯାଉଥିଲେ ମଧ୍ୟ ଏ ପର୍ଯ୍ୟନ୍ତ କ୍ରାଇମବ୍ରାଞ୍ଚ ପକ୍ଷରୁ ଏହାର ଖୁଲାସା କରାଯାଇନାହିଁ ।