ଭୁବନେଶ୍ୱର: ଭାରତର ମହାମହିମ ରାଷ୍ଟ୍ରପତି ଓଡ଼ିଆ ଝିଅ ଶ୍ରୀମତୀ ଦ୍ରୌପଦୀ ମୁର୍ମୁଙ୍କର ଗତକାଲି ବିଧାନସଭା ଗସ୍ତ ଅବସରରେ କିଛି ଫଟୋ ଏବେ ସୋସିଆଲ୍ ମିଡିଆରେ ଭାଇରାଲ୍ ହେଉଛି । ସେଥି ମଧ୍ୟରୁ ଦୁଇଟି ଫଟୋ ସମସ୍ତଙ୍କର ବେଶୀ ଦୃଷ୍ଟି ଆକର୍ଷଣ କରିଛି । ଦୁଇଟି ଯାକ ଫଟୋରେ ଜଣେ ଚେହେରା ହେଉଛନ୍ତି ଲମ୍ବା ସମୟର ପୂର୍ବତନ ମୁଖ୍ୟମନ୍ତ୍ରୀ ତଥା ଏବେକାର ବିରୋଧୀ ଦଳ ନେତା ନବୀନ ପଟ୍ଟନାୟକ । ଗୋଟିଏ ଫଟୋରେ ତାଙ୍କୁ ରାଷ୍ଟ୍ରପତିଙ୍କ ସହ ଦେଖିବାକୁ ମିଳୁଥିବା ବେଳେ ଅନ୍ୟଟିରେ ତାଙ୍କୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ଦେଖିବାକୁ ମିଳୁଛି ।
ଗତକାଲି ବିଧାନସଭା ପରିସରରେ ବିଧାୟକମାନଙ୍କ ସହ ଫଟୋ ସେସନ୍ ପାଇଁ ରାଷ୍ଟ୍ରପତି ଆସୁଥିବା ବେଳେ ନବୀନ ପଟ୍ଟନାୟକ ବସିଥିବା ଆସନ ପାଖରେ ଅଟକି ଯାଇଥିଲେ । ଅତି ଆଦର ଓ ସମ୍ମାନପୂର୍ବକ ଆଗୁଆ ନବୀନଙ୍କୁ ହାତଯୋଡ଼ି ପ୍ରଣାମ କରିଥିଲେ । ସେତେବେଳକୁ ନବୀନ ବାବୁ ନମସ୍କାର ଭଙ୍ଗୀରେ ନିଜ ଆସନରୁ ଉଠି ସାରିଥିଲେ । ଆସନ ପାଖରେ ଛିଡ଼ା ହୋଇ ରାଷ୍ଟ୍ରପତିଙ୍କୁ ସମ୍ମାନ ଜଣାଉଥିଲେ । ବୟସାଧିକ କାରଣରୁ ଦୁର୍ବଳ ହୋଇଯାଇଥିବା ନବୀନଙ୍କୁ ଏଭଳି ଛିଡ଼ା ହେବା ରାଷ୍ଟ୍ରପତିଙ୍କୁ ସମ୍ଭବତଃ ଭଲ ଲାଗିଲା ନାହିଁ । ଲାଗୁଥିଲା, ନବୀନଙ୍କ ସ୍ନେହ ଓ ଶ୍ରଦ୍ଧା ଆଗରେ ସେ ନିଜକୁ ଛୋଟ ମନେ କରୁଥିଲେ । ସେତିକିବେଳେ ରାଷ୍ଟ୍ରପତିଙ୍କ ଆବେଗଭରା ଚାହାଣୀ, ନବୀନଙ୍କ ପ୍ରତି ଶ୍ରଦ୍ଧା ଓ ସମ୍ମାନ ସେହି ଫଟୋରେ ଲିପିବଦ୍ଧ ହୋଇଛି ।
ଉଭୟଙ୍କ ଭିତରେ ଭାଇ-ଭଉଣୀର ପ୍ରେମ ସମ୍ପର୍କ ଅନୁଭବ କରୁଥିଲେ ଉପସ୍ଥିତ ନେତୃଗଣ । ସେହି ଦୃଶ୍ୟ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଏମିତି ବିଭୋର କରିଦେଲା ଯେ ସେ ପ୍ରୋଟୋକଲ୍ ଭୁଲିଗଲେ । ନିଜ ଆସନରେ ବସି ଗୋଟିଏ ଲୟରେ ସତେ ଯେମିତି ଉଭୟଙ୍କ ସମ୍ପର୍କର ଗଭୀରତା ମାପୁଥିଲେ ।
ଅନ୍ୟ ଫଟୋରେ ନବୀନଙ୍କ ସହ ଦେଖିବାକୁ ମିଳୁଛି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ । ଉଭୟ ପାଖାପାଖି ଚେୟାରରେ ବସିଛନ୍ତି । ନବୀନ ବାବୁ ଅତି ଆଦର ସହକାରେ ଧର୍ମେନ୍ଦ୍ରଙ୍କୁ କ’ଣ କହୁଛନ୍ତି, ଆଉ ଧର୍ମେନ୍ଦ୍ର ଅତି ସ୍ନେହ ଓ ସମ୍ମାନପୂର୍ବକ ତାଙ୍କର ବାମହାତକୁ ଜୋରରେ ଜାବୁଡ଼ି ଧରିଛନ୍ତି । ସେତିକିବେଳେ ତାଙ୍କ ମୁହଁରୁ ଶ୍ରଦ୍ଧାର ହସ ଫୁଟୁଛି । ରାଜନୀତିରେ ଉଭୟ ଉଭୟଙ୍କର ଶତ୍ରୁ ହୋଇଥିଲେ ମଧ୍ୟ ସେହି ସମୟରେ ଉଭୟଙ୍କ ସମ୍ପର୍କର ପରିଭାଷା ଅଲଗା ଥିଲା । ଠିକ୍ ବାପ-ପୁଅର ସମ୍ପର୍କ ଭଳି ।
ପୂର୍ବରୁ ରାଜନୀତିରେ ଶିଷ୍ଟାଚାରର ଅନେକ ଉଦାହରଣ ରଖିଛନ୍ତି ଧର୍ମେନ୍ଦ୍ର । ପ୍ରତିପକ୍ଷଙ୍କୁ ରାଜନୈତିକ ଆକ୍ରମଣ କରିବାରେ ତାଙ୍କ ସ୍ୱର ଯେତେ ଟାଣ, ବ୍ୟକ୍ତିଗତ ଭାବେ ବରିଷ୍ଠଙ୍କ ପ୍ରତି ତାଙ୍କର ସମ୍ମାନ ଓ ହୃଦୟ ସେତିକି ନରମ । ୨୦୨୪ରେ ମୋହନ ମାଝୀ ସରକାରଙ୍କ ଶପଥ ଗ୍ରହଣ ଉତ୍ସବରେ ନବୀନଙ୍କ ପ୍ରତି ତାଙ୍କର ସମ୍ମାନବୋଧ ସମସ୍ତେ ଦେଖିଛନ୍ତି । ଶପଥ ଗ୍ରହଣ ଉତ୍ସବରେ ଦେଶର ପ୍ରଧାନମନ୍ତ୍ରୀଙ୍କ ସମେତ ଅନ୍ୟ ବରେଣ୍ୟ ଅତିଥିମାନେ ମଞ୍ଚାସୀନ ଥିଲା ବେଳେ ମଞ୍ଚ ତଳୁ ନବୀନଙ୍କୁ ପାଛୋଟି ଆଣିଥିଲେ ଗୃହମନ୍ତ୍ରୀ ଅମିତ୍ ଶାହା ଏବଂ ଧର୍ମେନ୍ଦ୍ର ପ୍ରଧାନ । ସେତିକିବେଳେ ପ୍ରଧାନମନ୍ତ୍ରୀ ବି ନିଜ ଆସନରୁ ଉଠି ନବୀନଙ୍କୁ ସମ୍ମାନ ଜଣାଇଥିଲେ ।
ପରବର୍ତ୍ତୀ ସମୟରେ ପୁରୀ ରଥଯାତ୍ରା ବେଳେ ରାଷ୍ଟ୍ରପତି ଶ୍ରୀମତୀ ମୁର୍ମୁଙ୍କ ସହ ମଞ୍ଚାସୀନ ହେବାକୁ ନବୀନଙ୍କୁ ଆମନ୍ତ୍ରଣ କରାଯାଇଥିଲା । ମୁଖ୍ୟମନ୍ତ୍ରୀ ପଦରେ ନ ଥାଇ ଏହା ଥିଲା ନବୀନଙ୍କର ପ୍ରଥମ ରଥଯାତ୍ରା ଦର୍ଶନ । ନବୀନ ମଞ୍ଚ ଉପରକୁ ଆସୁଥିବା ବେଳେ ଧର୍ମେନ୍ଦ୍ର ତାଙ୍କ ପାଖକୁ ଦୌଡ଼ିଯାଇଥିଲେ ଏବଂ ତାଙ୍କୁ ମଞ୍ଚ ଉପରକୁ ସସମ୍ମାନେ ପାଛୋଟି ଆଣିଥିଲେ । ଟିଭିରେ ଏହି ଦୃଶ୍ୟ ବେଶ୍ ଉପଭୋଗ୍ୟ ହୋଇଥିଲା ।
