ଭୁବନେଶ୍ୱର: ବିଦ୍ୟୁତ ବ୍ୟବହାର କରୁଥିବା ସାଧାରଣ ଉପଭୋକ୍ତାଙ୍କ ପାଇଁ ଆଶ୍ୱସ୍ତିର ଖବର । ୨୦୨୨-୨୩ ଆର୍ଥିକ ବର୍ଷ ପାଇଁ ରିଟେଲ୍ ବିଦ୍ୟୁତ ଶୁଳ୍କ ବଢ଼ିବ ନାହିଁ । ଏହାକୁ ଅପରିବର୍ତ୍ତିତ ରଖାଯାଇଛି । ଓଇଆରସି ପକ୍ଷରୁ ଆଜି ଏକ ସାମ୍ବାଦିକ ସମ୍ମିଳନୀରେ ଏହି ନିଷ୍ପତ୍ତି ଘୋଷଣା କରାଯାଇଛି ।
ଓଇଆରସି ସଚିବ ପ୍ରିୟବ୍ରତ ପଟ୍ଟନାୟକ କହିଛନ୍ତି, ପୂର୍ବବର୍ଷ ଭଳି ଶୂନରୁ ୫୦ ୟୁନିଟ୍ ପର୍ଯ୍ୟନ୍ତ ୟୁନିଟ୍ ପିଛା ଦର ୩ ଟଙ୍କା, ୫୦ ରୁ ୨୦୦ ୟୁନିଟ୍ ଯାଏଁ ଦର ୪ ଟଙ୍କା ୮୦ ପଇସା ଏବଂ ୪୦୦ ୟୁନିଟ୍ ରୁ ଅଧିକ ବ୍ୟବହାରୀଙ୍କ ପାଇଁ ଦର ୬ ଟଙ୍କା ୨୦ ପଇସା ରହିବ ।
ଏଥିସହ ବିଭିନ୍ନ ବିଦ୍ୟୁତ ଉପଭୋକ୍ତାଙ୍କ ପାଇଁ କମିସନ ରିହାତି ଘୋଷଣା କରିଛନ୍ତି । ଡିଜିଟାଲ୍ ପେମେଣ୍ଟ ପାଇଁ ୩% ରିହାତି ମିଳିବ । ପୂର୍ବରୁ ଏହା ୨% ଥିଲା । ସେହିଭଳି ଗ୍ରାମାଞ୍ଚଳ ଉପଭୋକ୍ତାଙ୍କୁ ୟୁନିଟ୍ ପିଛା ୧୦ ପଇସା ରିହାତି, କୃଷିକ୍ଷେତ୍ର ଉଠାଜଳସେଚନ ପଏଣ୍ଟ ନିମନ୍ତେ ୨ ଟଙ୍କା ରିହାତି ଏବଂ କ୍ଷୁଦ୍ର ଶିଳ୍ପ ପାଇଁ ୧୦ ପଇସା ରିହାତି ମିଳିବ । ବିଦ୍ୟୁତଚାଳିତ ଯାନ ନିମନ୍ତେ ୫ ଟଙ୍କା ୫୦ ପଇସା ଟାରିଫ୍ ଧାର୍ଯ୍ୟ କରାଯାଇଛି ।
ବିଦ୍ୟୁତ ବିତରକ କମ୍ପାନୀମାନଙ୍କର ଖର୍ଚ୍ଚ ୟୁନିଟ୍ ପିଛା ୧୯ ପଇସା ବଢ଼ିଥିବାରୁ ସେମାନଙ୍କ ପାଖରେ ବଳକା ଥିବା ୩୫୫ କୋଟି ଟଙ୍କା ସେ ବାବଦରେ ଆଡଜଷ୍ଟ କରିବାକୁ କମିସନ ନିର୍ଦ୍ଦେଶ ଦେଇଛନ୍ତି । ବିଦ୍ୟୁତ ଦର ନବଢ଼ାଇବାକୁ ରାଜ୍ୟ ସରକାର କମିସନଙ୍କ ପାଖରେ ଦାବି ରଖିଥିବା ଓଇଆରସି ସଚିବ ସୂଚନା ଦେଇଥିଲେ ।
