ଭୁବନେଶ୍ୱର: ଓଟିଭି ଚାନେଲ୍ ର କିଛି କର୍ମଚାରୀଙ୍କ ଦ୍ୱାରା ଜଣେ ୧୩ ବର୍ଷର ନାବାଳିକାଙ୍କୁ ଗଣଦୁଷ୍କର୍ମ ଅଭିଯୋଗ ମାମଲା ଆଜି ଜଟିଳ ମୋଡ଼ ନେଇଛି । ମାମଲାକୁ ଚପାଇ ଦେବା ପାଇଁ ଓଟିଭି ଏମଡି ଜାଗୀମଙ୍ଗତ ପଣ୍ଡା ଉଦ୍ୟମ କରିଥିବା ପୀଡ଼ିତାଙ୍କ ମାଆ ଆଣିଥିବା ଅଭିଯୋଗକୁ ଗୁରୁତ୍ୱର ସହ ଗ୍ରହଣ କରିଛନ୍ତି ଓଡ଼ିଶା ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗ । ଏହି ଅଭିଯୋଗର ଜବାବ ରଖିବା ପାଇଁ ଜାଗୀଙ୍କୁ ଏକ ନୋଟିସ୍ ଜରିଆରେ ୪୮ ଘଣ୍ଟା ମହଲତ ଦେଇଛନ୍ତି ଆୟୋଗ । ଏଥିସହ ଅଭିଯୁକ୍ତଙ୍କୁ ୪୮ ଘଣ୍ଟା ମଧ୍ୟରେ ଗିରଫ ସହ ପୀଡ଼ିତା ଓ ତାଙ୍କ ପରିବାରକୁ ସୁରକ୍ଷା ଦେବା ପାଇଁ ପୁଲିସ କମିଶନରକୁ ନୋଟିସ୍ ଦେଇଛନ୍ତି ।
ସୂଚନାଯୋଗ୍ୟ, ପୀଡ଼ିତାଙ୍କ ବିଧବା ମା ଓଟିଭିରେ ରିସେପସିନିଷ୍ଟ ଭାବେ କାର୍ଯ୍ୟ କରୁଥିଲେ । ଅଭିଯୋଗ ଅନୁଯାୟୀ, ତାଙ୍କ ଡୁ୍ୟଟି ବେଳର ସୁଯୋଗ ନେଇ ଘରେ ଏକୁଟିଆ ରହୁଥିବା ୧୩ ବର୍ଷର ଝିଅକୁ ଓଟିଭିର ଦୁଇଜଣ କର୍ମଚାରୀ, ଦୁଇଜଣ ସୁରକ୍ଷା କର୍ମୀ ଏବଂ ରାଉରକେଲାର ଜଣେ ପୁଲିସ ସାଙ୍ଗ ଏହିଭଳି ୭ ଜଣ ୧୫ ଦିନ ଧରି ଗଣଦୁଷ୍କର୍ମ କରିଥିଲେ । ଏକଥା ପ୍ରଘଟ କଲେ ମାଆ ଓ ଝିଅଙ୍କୁ ଜୀବନରୁ ମାରିଦେବାର ଧମକ ଦେଇଥିଲେ । ଗତ ଅଗଷ୍ଟ ୩୦ ତାରିଖରେ ପୀଡ଼ିତାଙ୍କ ମା ମହିଳା ଥାନାରେ ଏତଲା ଦେବା ପରେ ଘଟଣା ସାମନାକୁ ଆସିଥିଲା ।
ଦୁଇଦିନ ତଳେ ଓଡ଼ିଶା ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗଙ୍କୁ କରିଥିବା ଆବେଦନରେ ଅଭିଯୋଗକାରିଣୀ ମହିଳାଙ୍କ କହିବାନୁଯାୟୀ, ଏହି ଜଘନ୍ୟ ଘଟଣା ସମ୍ପର୍କରେ ଝିଅଠାରୁ ଜାଣିବା ପରେ ସେ ସିଧାସଳଖ ଓଟିଭି ଏମଡି ଜାଗୀମଙ୍ଗତ ପଣ୍ଡାଙ୍କୁ ରିପୋର୍ଟ କରି ନ୍ୟାୟଭିକ୍ଷା କରିଥିଲେ । ମାତ୍ର ଜାଗୀ ଏଥିପ୍ରତି ଆଖି ବୁଜିଦେଇଥିଲେ । ନା ସେ ସଂପୃକ୍ତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଲେ ନା ପୁଲିସକୁ ଜଣାଇଲେ । ଜାଗୀଙ୍କୁ ଭେଟିବାକୁ ସେ ବାରମ୍ବାର ଉଦ୍ୟମ କରିଥିଲେ ମଧ୍ୟ ସେ ଭେଟ ଦେଇ ନ ଥିଲେ । ବରଂ ମାମଲାକୁ ଚପାଇ ଦେବାକୁ ଚାହିଁଥିଲେ । ଶେଷରେ ନିରୁପାୟ ହୋଇ ମହିଳା ଥାନାରେ ଅଭିଯୋଗ କଲି ବୋଲି ପୀଡ଼ିତାଙ୍କ ମାଆ ଦର୍ଶାଇଛନ୍ତି ।
ଇତିମଧ୍ୟରେ ଓଟିଭି ନିଜ ଆଡୁ ସ୍ପଷ୍ଟୀକରଣ ଦେଇ ଅଭିଯୋଗକୁ ମିଛ ବୋଲି ରାୟ ଶୁଣାଇ ଦେଇଛି । ମହିଳାଜଣଙ୍କ ଓଟିଭି କର୍ତ୍ତୃପକ୍ଷଙ୍କୁ ବ୍ଲାକ୍ ମେଲିଂ କରି ଅର୍ଥ ଆଦାୟ କରିବାକୁ ଚାହୁଁଥିଲେ ବୋଲି ନିର୍ଲଜ ସଫେଇ ଦେଇଛି ।
ଏତେବଡ଼ ଗମ୍ଭୀର ମାମଲା ପ୍ରମୁଖ ଗଣମାଧ୍ୟମଗୁଡ଼ିକରେ ଖବର ନ ହେବା ସମସ୍ତଙ୍କୁ ବିସ୍ମିତ୍ କରିଛି । ପ୍ରମୁଖ ବିରୋଧୀ ଦଳର ମହିଳା ମୋର୍ଚ୍ଚା ନେତ୍ରୀମାନଙ୍କର ପାଟି ଚୁପ୍ ରହିଛି । ମହିଳା ସାମାଜିକ ସଂଗଠନଗୁଡ଼ିକର ବି ସ୍ୱର ଆସୁନାହିଁ । ଆହୁରି ଗମ୍ଭୀର କଥା କି ପୁଲିସ ତଦନ୍ତ ମଧ୍ୟ ଧୀମା ଗତିରେ ଚାଲିଛି । ଏତଲା ହେବାର ୧୦ ଦିନ ବିତିଯାଇଥିଲେ ମଧ୍ୟ ଅଭିଯୁକ୍ତଙ୍କ ପାଖରେ ପହଞ୍ଚିପାରୁନି ପୁଲିସ । ଏତେବଡ଼ ମାମଲାକୁ ମିଳିମିଶି ଚପାଇ ଦେବା ଉଦ୍ୟମ ପଛରେ କ’ଣ ରହସ୍ୟ ତାହା ଏବେ ଚର୍ଚ୍ଚାର ବିଷୟ ହୋଇଛି ।
