ଭୁବନେଶ୍ୱର: ମାର୍ଚ୍ଚ ୨୫ ରୁ ଆରମ୍ଭ ହେବ ବିଧାନସଭାର ବଜେଟ୍ ଅଧିବେଶନ । ଏହା ୩୧ ତାରିଖ ପର୍ଯ୍ୟନ୍ତ ଚାଲିବ । ଏଥର ଅଧିବେଶନରେ ୨୦୨୨-୨୩ ଆର୍ଥିକ ବର୍ଷର ସମ୍ପୂର୍ଣ୍ଣ ବଜେଟ୍ ଉପସ୍ଥାପିତ ହୋଇପାରିବ ନାହିଁ । ଭୋଟ୍ ଅନ୍ ଆକାଉଣ୍ଟ ବା ଲେଖାନୁଦାନ ପ୍ରସ୍ତାବ ଜରିଆରେ ଆସନ୍ତା ଆର୍ଥିକ ବର୍ଷର ପ୍ରଥମ ୪ ମାସର ଖର୍ଚ୍ଚ ବିଧାନସଭାର ଅନୁମୋଦନ ଲାଭ କରିବ ।
ବିଧାନସଭା ପକ୍ଷରୁ ଆଜି ଜାରି ହୋଇଥିବା ବିଜ୍ଞପ୍ତି ଅନୁଯାୟୀ, ମାର୍ଚ୍ଚ ୨୫ ତାରିଖରେ ରାଜ୍ୟପାଳଙ୍କ ଅଭିଭାଷଣରୁ ଆରମ୍ଭ ହେବ ଅଧିବେଶନ । ସେହିଦିନ ରାଜ୍ୟପାଳଙ୍କ ଅଭିଭାଷଣ ଉପରେ ଗୃହରେ ଧନ୍ୟବାଦ ପ୍ରସ୍ତାବ ଆଗତ ହେବ । ମାର୍ଚ୍ଚ ୨୬ ଏବଂ ୨୮ ଦୁଇଦିନ ଏହି ଧନ୍ୟବାଦ ପ୍ରସ୍ତାବ ଉପରେ ଆଲୋଚନା ହେବ ।
ମାର୍ଚ୍ଚ ୨୭ ତାରିଖ ରବିବାର ପାଇଁ ବିଧାନସଭା ବନ୍ଦ ରହୁଥିବା ବେଳେ ୨୯ ତାରିଖକୁ ସରକାରୀ କାର୍ଯ୍ୟ ଦିବସ ଧାର୍ଯ୍ୟ କରାଯାଇଛି । ୩୦ ତାରିଖରେ ଗୃହରେ ଲେଖାନୁଦାନ ପ୍ରସ୍ତାବ ଆଗତ ହୋଇ ଆଲୋଚନା ଆରମ୍ଭ ହେବ । ମାର୍ଚ୍ଚ ୩୧ ତାରିଖରେ ଲେଖାନୁଦାନ ଉପରେ ବିନିଯୋଗ ବିଲ୍ ବିଧାନସଭାରେ ଗୃହୀତ ହେବ ।
ରାଜ୍ୟରେ ପଞ୍ଚାୟତ ଓ ପୌର ନିର୍ବାଚନ ପାଇଁ ଆଦର୍ଶ ଆଚରଣ ବିଧି ଲାଗୁ ପରିପ୍ରେକ୍ଷୀରେ ରାଜ୍ୟ ସରକାର ଭୋଟ୍ ଅନ୍ ଆକାଉଣ୍ଟ ବା ଲେଖାନୁଦାନ ଆଣିବାକୁ ବାଧ୍ୟ ହେଉଛନ୍ତି । କାରଣ ଗୋଟିଏ ଆର୍ଥିକ ବର୍ଷ ଶେଷ ପୂର୍ବରୁ ରାଜ୍ୟ ସରକାର ପରବର୍ତ୍ତୀ ଆର୍ଥିକ ବର୍ଷର ବଜେଟ୍ କୁ ବିଧାନସଭାର ମଂଜୁର କରାଇବା ବାଧ୍ୟତାମୂଳକ । ବିଧାନସଭାର ବିନା ଅନୁମୋଦନରେ ରାଜକୋଷରୁ ଟଙ୍କାଟିଏ ବି ଖର୍ଚ୍ଚ ହୋଇପାରିବ ନାହିଁ ।
ବାର୍ଷିକ ବଜେଟ୍ ଉପସ୍ଥାପନ ପାଇଁ ରାଜ୍ୟ ସରକାରଙ୍କ ଅର୍ଥ ବିଭାଗ ସବୁ ପ୍ରସ୍ତୁତି ସାରିଥିଲେ ମଧ୍ୟ ଆଦର୍ଶ ଆଚରଣ ବିଧି ଲାଗୁ ଦୃଷ୍ଟିରୁ ତାହା ସମ୍ଭବ ହେଉନାହିଁ । ପୂର୍ବରୁ ୨୦୦୯, ୨୦୧୪ ଏବଂ ୨୦୧୯ ସାଧାରଣ ନିର୍ବାଚନ ସମୟରେ ଏଭଳି ଲେଖାନୁଦାନ ପ୍ରସ୍ତାବ ଆସିଥିଲା ।
