ଭାରତ ଯୋଡ: ଅକ୍ଟୋବର ୩୧ରୁ ୨୨୫୦ କିମି ପଦଯାତ୍ରା

ଭୁୁବନେଶ୍ୱର: ଓଡ଼ିଶାରେ କଂଗ୍ରେସର ‘ଭାରତ ଯୋଡ’ ଯାତ୍ରା ଆସନ୍ତା ଅକ୍ଟୋବର ୩୧ ତାରିଖରେ ଆରମ୍ଭ ହେବ । ଭୁବନେଶ୍ୱରର ଇନ୍ଦିରା ଗାନ୍ଧୀ ପାର୍କରୁ ଏହି ଯାତ୍ରା ଆରମ୍ଭ ହେବ । ୨୦ ଟି ସଂସଦୀୟ କ୍ଷେତ୍ରରେ ୨୨୫୦ କିଲୋମିଟର ପଦଯାତ୍ରା ହେବ । କେବଳ କଂଗ୍ରେସ କର୍ମୀ ନୁହଁନ୍ତି, ସାମାଜିକ କର୍ମୀଙ୍କୁ ମଧ୍ୟ ଏଥିରେ ସାମିଲ କରାଯିବ ।

ଓଡ଼ିଶାରେ ଭାରତ ଯୋଡ ଯାତ୍ରାର ଆୟୋଜନ ନେଇ କଂଗ୍ରେସ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ଆଜି ଏହି ସୂଚନା ଦିଆଯାଇଛି । ପିସିସି ସଭାପତି ଶରତ ପଟ୍ଟନାୟକ ପଦଯାତ୍ରା ଆୟୋଜନ ସଂକ୍ରାନ୍ତରେ ବିସ୍ତୃତ ସୂଚନା ଦେଇଥିଲେ ।

ଭାରତ ଯୋଡ ଯାତ୍ରା ପ୍ରସ୍ତୁତିର ତଦାରଖ ପାଇଁ ଦୁଇଦିନିଆ ଓଡ଼ିଶା ଗସ୍ତରେ ଆସିଥିବା ବରିଷ୍ଠ ନେତା ଦିଗବିଜୟ ସିଂହ ଏବଂ ଜୟରାମ ରମେଶ ଆଜି ଏହି ସାମ୍ବାଦିକ ସମ୍ମିଳନୀରେ ଯୋଗଦେଇଥିଲେ । ଜୟରାମ ରମେଶ ଭାରତ ଯୋଡ ଯାତ୍ରାର ଆଭିମୁଖ୍ୟ ଜଣାଇଥିଲେ । ମୋଦି ସରକାର ଅମଳରେ ବେକାରୀ, ଦରଦାମ ବୃଦ୍ଧି, ଧାର୍ମିକ ଧ୍ରୁବୀକରଣ ବୃଦ୍ଧି ବିରୋଧରେ ଏହି ଯାତ୍ରା ।

ତେବେ ଓଡ଼ିଶାରେ ଏହି ଯାତ୍ରା କେବଳ ବିଜେପି ବିରୋଧରେ ନୁହେଁ, ବିଜେଡି ବିରୋଧରେ ମଧ୍ୟ ଉଦ୍ଦିଷ୍ଟ ବୋଲି ସେ ସ୍ପଷ୍ଟ କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ବର୍ଷିଥିଲେ ଜୟରାମ । ସେ କହିଥିଲେ, ଓଡ଼ିଶାରେ ବିଜେପି-ବିଜେଡି ଲଢ଼ାଲଢ଼ି ହେଉଛନ୍ତି । ମାତ୍ର ଦିଲ୍ଲୀରେ ସେମାନେ ଏକାଠି । ପ୍ରଧାନମନ୍ତ୍ରୀ ଉଠ କହିଲେ ମୁଖ୍ୟମନ୍ତ୍ରୀ ଉଠନ୍ତି ଏବଂ ବସ କହିଲେ ବସନ୍ତି । ଉଭୟ ସରକାରର କୁଶାସନର ବାର୍ତ୍ତା ଲୋକଙ୍କ ପାଖରେ ପହଞ୍ଚାଯିବ ବୋଲି ସେ କହିଥିଲେ । ଏହି ପଦଯାତ୍ରାକୁ ଆମେ ପରିବର୍ତ୍ତନ ଯାତ୍ରା କହିପାରିବା । ଏହି ଯାତ୍ରା ପରିବର୍ତ୍ତନ ଆଣିବ ବୋଲି ସେ ଆଶା ପ୍ରକାଶ କରିଥିଲେ ।

ଅନ୍ୟପକ୍ଷରେ ଜୟରାମଙ୍କ ମନ୍ତବ୍ୟ ଉପରେ ଉଭୟ ବିଜେପି ଓ ବିଜେଡି ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । କଂଗ୍ରେସର ଏହା ଭାତ ଯୋଡ ନୁହେଁ ବରଂ କଂଗ୍ରେସ ଯୋଡ ଅଭିଯାନ ବୋଲି ବିଜେପି ମୁଖପାତ୍ର କହିଥିବା ବେଳେ କଂଗ୍ରେସ ନତାଙ୍କ ହତାଶ ଭାବର ଏହା ପରିପ୍ରକାଶ ବୋଲି ବିଜେଡି ମୁଖପାତ୍ର କହିଛନ୍ତି ।