ଭୁବନେଶ୍ୱର: ହାଇଦ୍ରାବାଦରେ ଆଜି ଅନୁଷ୍ଠିତ ନିବେଶକ ସମ୍ମିଳନୀରେ ଯୋଗଦେଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆସନ୍ତା ନଭେମ୍ବର ୩୦ ରୁ ଡିସେମ୍ବର ୪ ପର୍ଯ୍ୟନ୍ତ ଭୁବନେଶ୍ୱରରେ ଅନୁଷ୍ଠିତ ହେବାକୁ ଥିବା ମେକ୍ ଇନ ଓଡ଼ିଶା କନକ୍ଲେଭ୍ ରେ ଭାଗ ନେବା ଲାଗି ମୁଖ୍ୟମନ୍ତ୍ରୀ ନିବେଶକମାନଙ୍କୁ ଆମନ୍ତ୍ରଣ କରିଥିଲେ । ଦିନରେ ୫ ଘଣ୍ଟା ଧରି ସେ ପ୍ରାୟ ୪୦ ଶିଳ୍ପପତି/ନିବେଶକଙ୍କ ସହ ୱାନ୍ ଟୁ ୱାନ୍ ଆଲୋଚନା କରିଥିଲା ବେଳେ ସଂଧ୍ୟାରେ ଇନଭେଷ୍ଟର୍ସ ମିଟ୍ କାର୍ଯ୍ୟକ୍ରମରେ ୩୫୦ ନିବେଶକଙ୍କୁ ଉଦବୋଧନ ଦେଇଥିଲେ ।
ନିବେଶକଙ୍କୁ ଓଡ଼ିଶା ଆମନ୍ତ୍ରଣ କରି ମୁଖ୍ୟମନ୍ତ୍ରୀ କହିଥିଲେ, ଆମେ ନୂଆ ସମ୍ପର୍କ ଗଢ଼ିବାକୁ ଚାହୁଁଥିବା ବେଳେ ପୁରୁଣା ସମ୍ପର୍କକୁ ଆହୁରି ଦୃଢ଼ୀଭୂତ କରିବାକୁ ଚାହୁଁଛୁ । ଓଡ଼ିଶାର ଆଖିଦୃଶିଆ ଅଭିବୃଦ୍ଧିରେ ଆପଣ ସମସ୍ତଙ୍କର ସହଭାଗିତା ଆମେ ଚାହୁଁ । ଚଳିତବର୍ଷର ଓଡ଼ିଶା କାର୍ଯ୍ୟକ୍ରମ ସଫଳ ପାଇଁ ଆପଣ ସମସ୍ତଙ୍କ ସହଯୋଗ ଦରକାର କରୁଛୁ ।
ମୁଖ୍ୟମନ୍ତ୍ରୀ କହିଥିଲେ, ଆମେ ଶିଳ୍ପାୟନର ଏକ ନୂଆ ଯୁଗରେ ପାଦ ଦେଇଛୁ । ସରକାର, ଶିଳ୍ପସଂସ୍ଥା ଏବଂ ଜନସାଧାରଣଙ୍କ ସମ୍ମିଳିତ ଉଦ୍ୟମରେ ନିରନ୍ତର ଅଭିବୃଦ୍ଧି ସମ୍ଭବ ହୋଇପାରିବ । ଗତ ଦେଢ଼ ଦଶନ୍ଧିରେ ଓଡ଼ିଶାର ଅର୍ଥନୀତି ଦ୍ରୁତ ଗତିରେ ବଢ଼ି ଚାଲିଛି । ଜାତୀୟ ହାର ଠାରୁ ଏହାର ଅଭିବୃଦ୍ଧି ଅଧିକ ହୋଇଛି । ପ୍ରାକୃତିକ ସମ୍ପଦ, ଦକ୍ଷ ମାନବସମ୍ବଳ ଏବଂ ସ୍ଥିର ସରକାର ରାଜ୍ୟରେ ଶିଳ୍ପ ପ୍ରତିଷ୍ଠା ପାଇଁ ଅନୁକୂଳ ପରିବେଶ ସୃଷ୍ଟି କରିଛି । ମ୍ୟାନଫ୍ୟାକଚରିଂ ଇନଭେଷ୍ଟମେଣ୍ଟରେ ଓଡ଼ିଶା ଦେଶର ପ୍ରମୁଖ ରାଜ୍ୟ ମଧ୍ୟରେ ଅନ୍ୟତମ ଏବଂ ନିକଟରେ ଭାରତ ସରକାର ଓଡ଼ିଶାକୁ ଆକଚିଭର୍ ମାନ୍ୟତା ଦେଇଛନ୍ତି ।
ଓଡ଼ିଶାର ଏହି ରୂପାନ୍ତର ଯାତ୍ରାରେ ସାମିଲ ହୋଇ ମେକ୍ ଇନ ଓଡ଼ିଶା କନକ୍ଲେଭ୍ ରେ ଯୋଗଦେବା ପାଇଁ ମୁଖ୍ୟମନ୍ତ୍ରୀ ଉପସ୍ଥିତ ଶିଳ୍ପପତି ଏବଂ ନିବେଶକମାନଙ୍କୁ ଅନୁରୋଧ କରିଥିଲେ ।
