ଭୁବନେଶ୍ୱର: ଆଇଏଏସ୍ ଚାକିରି ଛାଡ଼ି ରାଜନୀତିକୁ ଆସିଥିବା ସୁଜାତା ରାଉତ କାର୍ତ୍ତିକେୟନ ଖବରକାଗଜରେ ଏକ ଆର୍ଟିକିଲ୍ ଲେଖି ଚର୍ଚ୍ଚାକୁ ଆସିଛନ୍ତି । ଏକ ପ୍ରମୁଖ ଦୈନିକ ଖବରକାଗଜରେ ଲେଖିଥିବା ଆର୍ଟିକିଲ୍ ଜରିଆରେ ବର୍ତ୍ତମାନର ବନ୍ୟା ପରିଚାଳନାରେ ରାଜ୍ୟର ଡବଲ ଇଞ୍ଜିନ ସରକାରଙ୍କ ଅପାରଗତାକୁ ଲୋକଲୋଚନକୁ ଆଣିଛନ୍ତି ।
ସେ ଲେଖିଛନ୍ତି ଯେ ବିଜେଡି ଶାସନ ସମୟରେ ବିପର୍ଯ୍ୟୟ ପ୍ରଶମନ କ୍ଷେତ୍ରରେ ଉଲ୍ଲେଖନୀୟ କାମ ପାଇଁ ଓଡ଼ିଶା ମିଳିତ ଜାତିସଂଘ ଦ୍ୱାରା ପ୍ରଶଂସିତ ହୋଇଥିଲା । ତେବେ ୨୪ ବର୍ଷରେ ଗଢ଼ି ଉଠିଥିବା ଏକ ଦୃଢ଼ ଓ ସଫଳ ପରିଚାଳନା ବ୍ୟବସ୍ଥା ୨୪ ମାସରେ ଭୁଶୁଡ଼ି ଯାଇଛି । ବର୍ତ୍ତମାନ ରାଜ୍ୟ ସମ୍ମୁଖୀନ ହୋଇଥିବା ଏକ ମଧ୍ୟମ ଧରଣର ବନ୍ୟା ପରିଚାଳନାରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀଙ୍କ ଏକ ମନ୍ତବ୍ୟ ‘ନବୀନ ବାବୁ ଇନ୍ଦ୍ରଙ୍କ ଫୋନ୍ ନମ୍ବର ଦିଅନ୍ତୁ’ ବନ୍ୟା ମୁକାବିଲାରେ ସରକାରଙ୍କ ଦୁର୍ବଳତାକୁ ସାମ୍ନାକୁ ଆଣୁଛି ।
ବନ୍ୟାରେ ଆଜି ଯାଜପୁର, କେନ୍ଦ୍ରାପଡ଼ା, ଭଦ୍ରକ, କେନ୍ଦୁଝର, ବାଲେଶ୍ୱର ଆଦି ଜିଲ୍ଲାର କିଛି ଅଂଶ ଭୟଙ୍କର ଭାବେ ପ୍ରଭାବିତ ହୋଇଛି । ସାଳନ୍ଦୀ, ଜଳକା, ବୈତରଣୀ, ବ୍ରାହ୍ମଣୀ ଓ ସୁବର୍ଣ୍ଣରେଖା ନଦୀ ପ୍ରଣାଳୀରେ ବନ୍ୟା ଆସିଛି । ୧୦ରୁ ଅଧିକ ଲୋକଙ୍କର ମୃତ୍ୟୁ ହୋଇଛି । ହଜାର ହଜାର ହେକ୍ଟର ଫସଲ ନଷ୍ଟ ହୋଇଛି । ଅଗଣିତ ଗୋରୁଗାଈଙ୍କ ଜୀବନ ଯାଇଛି ଏବଂ ୧୦ ଲକ୍ଷରୁ ଅଧିକ ଲୋକ ଏବେ ବି ପାଣି ଘେରରେ ଦହନୀୟ ଅବସ୍ଥାରେ ଜୀବନ ବିତାଉଛନ୍ତି । ଖୋଲା ଛାତ ଉପରେ ଲୋକମାନେ ରହିଛନ୍ତି । ଖାଦ୍ୟ, ବିଶୁଦ୍ଧ ପାଣି, ପରିମଳ ବ୍ୟବସ୍ଥା ଓ ସ୍ୱାସ୍ଥ୍ୟସେବା ଆଦି କିଛି ନେଇ ସମସ୍ୟା ଭୋଗୁଛନ୍ତି । ଅନେକ ଘର ଭାଙ୍ଗିଯାଇଛି । ବନ୍ୟାଘେରରୁ ଉଠି ଆସି ନଦୀ ବନ୍ଧରେ ଆଶ୍ରୟ ନେଇଛନ୍ତି । ଜୀବନଜୀବିକା ଉଜୁଡ଼ି ଯାଇଛି ।
ଆଜି ଓଡ଼ିଶା ସାମ୍ନାରେ ମୌଳିକ ପ୍ରଶ୍ନ ହେଉଛି- ନଦୀ ପ୍ରଣାଳୀ, ବର୍ଷା ପୂର୍ବାନୁମାନ ବ୍ୟବସ୍ଥା, ପ୍ରଶାସନିକ କଳ, ପଞ୍ଚାୟତିରାଜ ଢ଼ାଞ୍ଚା ସବୁ ଅପରିବର୍ତ୍ତିତ ରହିଛି । ବିପର୍ଯ୍ୟୟ ପରିଚାଳନା ବ୍ୟବସ୍ଥା ବି ପୂର୍ବପରି ରହିଛି । ତେବେ ସରକାର କାହିଁକି ବନ୍ୟା ପରିଚାଳନା ପାଇଁ ଇନ୍ଦ୍ରଙ୍କୁ ଦାୟୀ କରୁଛନ୍ତି? ଲୋକେ କାହିଁକି କଷ୍ଟ ପାଉଛନ୍ତି?
ଯେତେବେଳେ କର୍ମୀମାନେ ରିଲିଫ୍ ବଣ୍ଟନକୁ ନେଇ ପ୍ରତିଯୋଗିତା କରନ୍ତି, ସେତେବେଳେ ବନ୍ୟା ସେବା ନୁହେଁ ଉପାର୍ଜନର ଏକ ଉତ୍ସ ହୋଇଥାଏ । ଏହି ସମୟରେ ବନ୍ୟା ପରିଚାଳନା ଦଳୀୟ ଭିତ୍ତିରେ କରାଯିବା ପରି ସ୍ପର୍ଶକାତର ଅଭିଯୋଗ ଶାସନ ଏବଂ ରାଜଧର୍ମର ପ୍ରତ୍ୟେକ ନୀତିକୁ ଉଲ୍ଲଂଘନ କରୁଛି । ବିଜେପି ସବୁବେଳେ ଦାବି କରୁଛି ଯେ ଲୋକେ ପରିବର୍ତ୍ତନ ଚାହୁଁଥିଲେ । ବନ୍ୟା ପରିଚାଳନାରେ ବିଫଳତା ଓ ଲୋକଙ୍କ ଦୁର୍ଦ୍ଦଶା କ’ଣ ପରିବର୍ତ୍ତନର ପ୍ରତିଫଳନ ବୋଲି ସୁଜାତା ପଚାରିଛନ୍ତି । ବନ୍ୟା ମୁକାବିଲାକୁ ଦଳୀୟ ରାଜନୀତିରୁ ଉଦ୍ଧ୍ୱର୍ରେ ରଖିବାକୁ ସେ ଆହ୍ୱାନ ଦେଇଛନ୍ତି ।
