ଭୁବନେଶ୍ୱର: କୋଭିଡ୍ କଟକଣାରେ ଓସିଏସ୍ ପରୀକ୍ଷା ଏବଂ ଆସିଷ୍ଟାଣ୍ଟ ସର୍ଜନ ପରୀକ୍ଷା ଅନୁଷ୍ଠିତ କରାଇବାକୁ ଓଡ଼ିଶା ପବ୍ଲିକ୍ ସର୍ଭିସ୍ କମିସନ ନିଷ୍ପତ୍ତି ନେଇଛନ୍ତି । ରାଜ୍ୟରେ କରୋନା ସଂକ୍ରମଣ ବୃଦ୍ଧି ଦୃଷ୍ଟିରୁ ପରୀକ୍ଷା ସ୍ଥଗିତ ରଖିବାକୁ ପରୀକ୍ଷାର୍ଥୀମାନେ ଦାବି କରିଥିଲେ । ମାତ୍ର ଏହି ଦାବିକୁ କମିସନ ଗ୍ରହଣ କରିନାହାନ୍ତି । କୋଭିଡ୍ କଟକଣା ମଧ୍ୟରେ ନିର୍ଦ୍ଧାରିତ ସମୟରେ ପରୀକ୍ଷା ହେବ ବୋଲି ଓପିଏସସି ସଚିବ ଆଜି ଏକ ପ୍ରେସ୍ ରିଲିଜ୍ ରେ ସ୍ପଷ୍ଟ କରିଛନ୍ତି ।
ଓପିଏସସି ଦ୍ୱାରା ପରିଚାଳିତ ଓଡ଼ିଶା ସିଭିଲ୍ ସର୍ଭିସ୍ ମୁଖ୍ୟ ଲିଖିତ ପରୀକ୍ଷା ଜାନୁଆରୀ ୨୦ ରୁ ଫେବ୍ରୁଆରୀ ୮ ମଧ୍ୟରେ ଅନୁଷ୍ଠିତ ହେବ । ସେହିଭଳି ଆସିଷ୍ଟାଣ୍ଟ ସର୍ଜନ ପରୀକ୍ଷା ଜାନୁଆରୀ ୨୩ ରେ ଅନୁଷ୍ଠିତ ହେବ । ପରୀକ୍ଷାର୍ଥୀମାନେ କୋଭିଡ୍ ଗାଇଡ ଲାଇନ୍ ମାନିବେ ଏବଂ ଏନ- ୯୫ ମାସ୍କ ପିନ୍ଧିବାକୁ ପରାମର୍ଶ ଦିଆଯାଇଛି । କୋଭିଡ୍ ଲକ୍ଷଣ ରହିଥିବା ପରୀକ୍ଷାର୍ଥୀମାନଙ୍କ ପାଇଁ ସ୍ୱତନ୍ତ୍ର ପ୍ରକୋଷ୍ଠର ବ୍ୟବସ୍ଥା କରାଯିବ । ଓଡ଼ିଶାର ବିଭିନ୍ନ ସହରରେ ହୋଇଥିବା କେନ୍ଦ୍ରରେ ପାଖାପାଖି ୫ ହଜାର ପିଲା ଓସିଏସ୍ ପରୀକ୍ଷା ଦେବେ ।
ସୂଚନାଥାଉକି, କରୋନାର ସଂକ୍ରମଣ ବଢ଼ି ଚାଲିଥିବାରୁ ଓସିଏସ୍ ପରୀକ୍ଷା ସ୍ଥଗିତ ରଖିବାକୁ ପରୀକ୍ଷାର୍ଥୀମାନେ ଦାବି କରିଥିଲେ । ଦୁଇଦିନ ତଳେ ଟୁଇଟରରେ ଏହି ଦାବି ଜୋର ଉଠିଥିଲା । ଭୁବନେଶ୍ୱରରେ ସଂକ୍ରମଣ ଦ୍ରୁତ ଗତିରେ ବଢ଼ୁଛି ଏବଂ ଏଠାରେ ୬୦% ପରୀକ୍ଷାର୍ଥୀଙ୍କ ସେଣ୍ଟର ପଡ଼ିଥିବାରୁ ପରୀକ୍ଷା ଦେବା ସମ୍ଭବପର ହେବ ନାହିଁ ବୋଲି ସେମାନେ ଯୁକ୍ତି କରିଥିଲେ । ଇତିମଧ୍ୟରେ କରୋନାରେ କିଛି ପରୀକ୍ଷାର୍ଥୀ ଆକ୍ରାନ୍ତ ହୋଇଥିବାରୁ ସେମାନେ ପରୀକ୍ଷା ଦେବାକୁ ଆସିପାରିବେ ନାହିଁ ବୋଲି କୁହାଯାଇଥିଲା ।